* * *

Тэ менӧ, сӧстӧм ваа Вочӧй,
Эн дивит, пӧрысьми нин мый
Да вола кыркӧтш вылад шоча
И весиг черисӧ ог кый.

Ог эшты, ылын тэсянь ола,
Кӧн сьӧдас кольӧ вой да лун.
А сэсся-й шуӧмысь на пола:
Кысь локтін, сэтчӧ пӧ и мун.

А вӧлі — нывкӧд таті ветлі,
А вӧлі — вой оз помась мед.
Ме сылы лежнӧг сикӧтш сетлі
И пӧся окавлі жӧ, дерт.

Но ӧні нылыс ласта вылӧ
Оз меным воча юсь моз пет.
Кӧть быттьӧ эськӧ орччӧн кылӧ,
Но меным гӧлӧссӧ оз сет.

Оз пет, кӧть эськӧ кӧсъя шуны,
Мый эг на кывлы и ог тӧд,
Мый сійӧ татысь важӧн муніс,
Мый овыс сылӧн важӧн мӧд.

Ок, Вочӧй, сӧстӧм ваа Вочӧй,
Эн кылӧд менсьым югыд шог,
Эн дивит, вола мый зэв шоча,
А сэсся-й некор нин ог лок.