ДЖЫДЖ

Чужан сиктысь важӧн берді,
Бокын олан кытш.
Керка пытшкам, матич бердӧ,
Поздысьӧма джыдж.

Керка подув — быттьӧ рокӧс,
Вежны али не?..
Гашкӧ, кувны аслам кокӧн
Татчӧ локта ме?..

Оз ӧд, гашкӧ, сувтны паныд
Пияныд да код?..
Мамкӧд орччӧн эськӧ тані
Лэдзисны мед горт.

Йӧзсӧ чукӧстлыны лоӧ,
Отсыштасны мед.
Эг ӧд войнабӧрся воӧ
Кыськӧ йӧзысь пет.

Накӧд шогсӧ зэв жӧ юки,
Сёйлі кыд и кач.
Тані, сідзкӧ, бӧръя здукӧ
Трачкӧдчас мед пач.

Тані, сідзкӧ, лэбув улӧ
Овмӧдчас мед джыдж,
Вӧчас, гортын мыйӧн кула,
Керка весьтӧд кытш.