ПАРМА МУ ВЫЛЫН

1

Кӧні Кува Иньва юӧ усьӧ.
Кӧні важӧн шӧйтліс сӧмын ош,
Ӧні кар эм. Кудымкарӧн шусьӧ,
Парма йирын дзирдалӧ, оз вош.

Татчӧ орчча Коми муысь волім,
Мыччим ӧта-мӧдлы ёрта ки.
Гӧгӧрвоим: ӧта-мӧдлы колам,
Ӧткодьӧсь ӧд оласногӧн ми.

Сӧмын бурсӧ миян сьӧлӧм сиӧ,
Шуам ӧтув татшӧм кӧртӧд-кыв:
Няньысь-солысь аттьӧ, Парма пиӧй,
Сьыланкывсьыд аттьӧ, Парма ныв.

Эжва бокӧ асьныд сэсся волӧй,
Тіян моз жӧ пызан лоӧ тыр.
Вай жӧ, чойяс-вокъяс, ӧтув олам,
Медым рӧдным му вылысь эз быр.

2

Мижуй сиктын небыд шаньга сёйи,
Пӧжалӧма кодӧс Парма чойӧй.
Зэв жӧ чӧскыд, кутшӧм гортын овлӧ,
Таысь кыпыд сьӧлӧмлы да ловлы.

Юмов чужва Иньва сиктын вӧлі,
Кага дырйи быттьӧ мамлӧн йӧлыс.
Кува сиктын быгъя ырӧш юи,
Сэтшӧмӧс жӧ, кутшӧм чужан муын.

Парма йирысь сэтшӧм кыв жӧ кылі,
Кодӧн ачым сёрнита да сьыла.
Сэтшӧм вӧр жӧ кежавлыны корис,
Коді быдмӧ миян Эжва дорын.
Сэтшӧм йӧз жӧ олӧ юяс пӧлӧн,
Коді медся дона век на вӧлі.

Сьӧлӧм вылын меным вывті долыд.
Мыйла сӧмын торйӧнсӧ ми олам?

3

Иньва бокысь аддзи басӧк нылӧс.
Сэтшӧм басӧк, — быдсӧн вошті кылӧс.
Мыйла татчӧ водзджыксӧ эг волы,
Гашкӧ, ӧні сыкӧд ӧтув олім?..
Нылыд-пиыд — кыдзи чери тывйын,
Баитӧны коми-пермяк кывйӧн.

Гашкӧ, тадзи збыльысь эськӧ вӧлі,
Но мен сюрис Эжва бокысь пӧлӧй.
Челядь эм, и ставыс гортын лада,
Медым сӧмын бура муніс кадыс.

Но со сьӧлӧм, сё мокасьтӧ, сыліс,
Кодыр аддзи Иньва бокысь нылӧс.