БУР КЫВ

Старик и юалӧ: «Тэ нӧ мый нуан?»
Салдат шуӧ: «Ме тӧвар нуа».
Старик шуӧ: «Та вылӧ уна-ӧ коран?»
«Мый сетан», — шуӧ салдат.
— «Босьт куимсё шайт либӧ бур кыв».
                  «Бур кыв» коми мойдысь



Гижи кывбур.
			Базар вылӧ петі.
Гижӧмторйӧс бур кыв вылӧ сета.
«Нэм чӧж лоан шудтӧмӧн
					да гӧльӧн», —
шуис меным кывбур босьтысь пӧльыс.

Гижи кывбур.
			Базар вылӧ петі.
Пӧрысь пӧльлы бур кыв вылӧ сеті.
«Тэнӧ сотас енмӧн сетӧм биыс», —
кывбур доныс шуис меным сійӧ.

Гижи кывбур.
			Базар вылӧ петі.
Пӧрысь пӧльлы бур кыв вылӧ сеті.
Зарни сьӧмӧн
			вештысьӧмыс пыдди
сійӧ меным ассьым
			кывбуръясӧс лыддис.