ЕДЖЫД ДӦРӦМ

Мамӧ еджыд дӧрӧм вурис.
Вурис мичаа да бура.
Сэсся югыд, тувсов войӧ
сійӧс вышивайтіс чойӧй.

Вышивайтіс коми серӧн.
Татшӧм дӧрӧм новліс Пера.
Новлӧма и пӧльлӧн пӧльыс,
мортыс овлӧма кӧть гӧля.

Лым кодь югыд, сӧстӧм дӧрӧм
ӧвтӧ купальнича кӧрӧн.
Сійӧс пасьталан, да ловлы
сӧстӧмджык жӧ овлӧ.

Еджыд дӧрӧм — менам шудӧй —
куйлӧ ӧні камод кудйын.
Чойӧс дзебӧм бӧрын сьӧдӧс
пырджык пасьтавлыны мӧді.

Ичӧт чойӧс дзебӧм бӧрын
колис вышивайтӧм дӧрӧм.
Еджыд рӧмыс — сылӧн олӧм.
Дӧрӧмвывса серыс — лолыс.

Менам дӧрӧм — коми сера.
Татшӧм дӧрӧм новліс Пера.
Новлӧма и пӧльлӧн пӧльыс,
овлӧма кӧть мортыс гӧля.