* * *

Векни, чукля туйӧд
нӧрыс паныд кая.
Висьталӧны йӧзыс:
«Тайӧ туйыс — райӧ...»
Кодкӧ, кодкӧ тонӧ
кайлӧма нин сэтчӧ.
Меным воча сійӧ
нӧрыс йылысь лэччӧ.

Крукасьлӧ да усьлӧ,
выныштчӧ да чеччӧ,
шойччыштас да бара
увлань, горув лэччӧ.
Вывлань, сылы воча
нӧрыс паныд кая.
Шуда жӧ и мортыс —
веськавлӧма райӧ.

Менам ордым визьӧд,
мекӧд ӧти кадӧ
нӧрысйывса райысь
сійӧ лэччӧ адӧ.
Гашкӧ, гашкӧ, ачым
сылӧн туйӧд кая.
Адӧ лэччысь туйӧд
Кая вывлань, райӧ.

Ӧти ордым вывті
нэм чӧж мунам кыкӧн.
Коркӧ, коркӧ сэсся
паныдасям сыкӧд.
Вочаасям сыкӧд,
Ӧта-мӧдӧс тӧдам.
Сэсся тӧдтӧм йӧз моз
разі-пели мӧдам.

Кӧть и сыкӧд ӧттшӧтш,
ӧти здукӧ чужим,
кӧть и ӧткодь миян
туша, мыгӧр, чужӧм,
кӧть и ӧткодь миян
нимным, вичным, овным,
пасьмунӧма шӧри
сыкӧд сьӧлӧм-ловным.

Нӧрыс паныд вывлань
мӧвпалігмоз кая.
Адӧ лэччысь туйӧд
кая вывлань, райӧ.
Менам олӧм туйӧд,
мекӧд ӧти кадӧ
нӧрысйывса райсьыс
сійӧ лэччӧ адӧ.