ЭГ ВУНӦД

Эг вунӧд тэнӧ ме, эг вунӧд,
Но кувтӧдз ӧмӧй пӧжны дой?
Зэв мича прӧстӧ тувсов луныс,
Зэв югыд прӧстӧ зэрлӧн войт.

Зэв кузя прӧстӧ кӧкыс кӧкӧ,
И прӧстӧ дзоридзалӧ сад.
И прӧстӧ ачым — том на сӧкӧл,
И абу шогсьынысӧ кад.

И прӧстӧ казьтыштсис, мый вӧлі
Дзик татшӧм коркӧ тувсов лун,
Кор тэкӧд ветлім мӧдлапӧлӧ,
И чайтсьӧ: паметьсьыд эг вун.

И прӧстӧ, керка весьтӧд муніг,
Мен ыстіс нылан сьӧлӧм мич.
И прӧстӧ, веськыда кӧ шуны,
Мен талун мыйкӧ да не сідз.