* * *

Эн вай вежӧгты менӧ,
Вермас лоны мӧй сідз.
Мый ме эновта тэнӧ.
Сьӧлӧм пытшкын ог видз?

Меным медся ӧд колӧ,
Медым нюмъялін пыр.
Тэнӧ воштӧмысь пола,
Тэнӧ, беринӧсь ныр.

Некод миянӧс, чайта,
Некор юкысь оз сюр.
Сідзкӧ, донаӧй, вай тэ
Эн жӧ весьшӧрӧ дур.

Миян водзын на ставыс,
Водзын шудыс и шог.
Уна кывтас на ваыс.
Уна тӧдлам на мог.

Йӧзыс юксьӧны, овлӧ,
Но ӧд огӧ жӧ ми.
Тэ ӧд челядьӧс новлін,
Со тай кыкӧн — кык пи.

Эн вай вежӧгты менӧ.
Гажыд эз ӧмӧй быр?
Тэнӧ радейта, тэнӧ,
Тэнӧ, беринӧсь ныр.