НУӦД МЕНӦ

Нуӧд менӧ вай, нуӧд:
Гортысь мустӧммис жыр.
Ветлам кыдзьяслӧн дзуӧ,
Раскӧд ветлӧдлам дыр.

Пӧся топӧдлам найӧс
Да и асьнымӧс тшӧтш.
Сэні, раскас, и райыс,
Сэні муслунлӧн кӧдж.

Тэа-меалы вояс
Лыддяс мудзтӧдзыс кӧк.
Юмов чӧдсӧ сэсь сёям,
Юам ёльыслысь нӧк.

Сэні миянлы сьылас
Лэбач котырлӧн хор.
Сэні бурджыка кылам:
Миян муслун оз ор.

Кокыд кӧтасяс мыйӧн,
Ӧзта бипур ме тэд.
Билысь жарсӧ ми кыям,
Сьӧлӧм ӧзйис жӧ мед.

Нуӧд менӧ вай, нуӧд:
Гортысь мустӧммис жыр.
Ветлам кыдзьяслӧн дзуӧ,
Раскӧд ветлӧдлам дыр.