ДЗОРИДЗАЛІС ЛЬӦМ

Помнитан, кыдз дзоридзаліс льӧм?
Вӧлі гӧгӧр веж да еджыд рӧм.
Асылӧдзыс войыс вӧлі том.
Окалі ме тэнсьыд шоныд вом.
Помнита, мый аддзим сёрни лад,
Но ог помнит, мыйта колис кад.

Со и бара дзоридзалӧ льӧм.
Бара гӧгӧр тулысыслӧн рӧм.
Льӧм пу дорас вайис менӧ кок.
Чунь моз ӧтнам. Талун тэ эн лок.
Мый нӧ вӧчан? Эн кӧ лок и мед.
Оз на тэтӧг пемды вӧльнӧй свет.

Эн, эн эскы, ен могысьӧн, мен.
Менам шонді, менам ӧти ен.
Тэд да меным дзоридзалӧ льӧм,
Тэд да меным олӧмыслӧн рӧм.