ЙӦРАПИ

Гашкӧ, енмыс миянӧс нин ёрӧ,
Мыйла лоим зверъяс кодьӧсь ми:
Парма шӧрысь локтіс кильчӧ дорӧ,
Сиктысь мамсӧ корсьӧ йӧрапи.

Веськӧдчылас коньӧр мӧсъяс шӧрӧ,
Но оз сэтысь мамыс сылы сюр.
Кӧсъяс пырны кукань дінӧ йӧрӧ, —
Потшӧс костӧ сибдӧ сылӧн юр.

Ветлас корсьны мамсӧ ю кыр йылысь,
Но оз тӧлыс сылысь дуксӧ вай.
Мамсӧ важӧн жаритлісны сылысь,
Вина сорӧн кылӧдлісны яй.

Йӧрапиыс чайтӧ: мамыс сюрӧ,
Эз жӧ сійӧс муса мамыс коль.
Вай жӧ пышйы татысь ловъя юрӧн,
Мед эз вӧчны кокъяс улӧ воль.