УЗЬТӦМ ВОЙ

Войыс дженьыд и кузь,
Кодыр мӧвпавны колӧ.
Войбыд, ёртъяс, эг узь,
Асъя кыаӧдз олі.
Ассьым юалі ме:
«Мыйла свет вылас чужи?
Дойсӧ чукӧртны мед
Либӧ водзсасьны кужны?
Вӧчны йӧзыслы бур
Либӧ кодӧскӧ пурны?
Тӧлкӧн уджӧдны юр
Либӧ ылӧсас дурны?»
Аслым шуи ме сэк:
«Дойыс унакодь сюрлі,
Но тэ уджалін век,
Олӧм чӧжыд эн дурлы.
Босьтін колана пас:
Лёклы паныдыс мунан.
Кӧть и нӧйтысьыс дас,
Повтӧг тышас век сунан,
Ӧні чорзьӧма кос,
Ӧні бан бокад вурыс.
Он кӧ вӧчыштлы кост, —
Ещӧ ёнджыка сюрас».
Лои ас вылӧ скӧр —
Артмӧ: лёксьыс ме пола?
Сідзкӧ-й, водзӧ ог дзӧр,
Татшӧм этшӧн жӧ ола.