КӦСЙӦМ

Меным окота варышӧн лоны,
Медым видлыны, крепыд-ӧ борд,
Тӧдны, кутшӧм жӧ лэбӧмлӧн доныс,
Кывны борд улысь тӧлыслысь гор.

Меным окота пожӧмӧн лоны,
Медым тӧдмавны муыслысь вын,
Кыдзи тулысӧдз тӧвсяньыс воны,
Кодыр йывсяньыс вужйӧдзыс кын.

Меным окота Эжваӧн лоны,
Медым пӧттӧдзыс юктавны му,
Медым быдмис и слабыс, и ёныс,
Ичӧт кага и пуыс, и сю.

Меным окота шондіӧн лоны,
Медым пемыдлысь вештыны от,
Медым быдлаын вӧлі зэв шоныд,
Медым нюмъяліс му вылын морт.