БОЛЬНИЧАЫН

Збодерӧн ме кӧсйи нэмсӧ лоны,
Мися, меӧ висьӧмыд оз пыр.
Кусыньтіс тай. Ковмис таӧдз воны,
Тӧдмавны и больничалысь жыр.

Ичӧтдырсянь гӧчӧй эз и ёнмы,
Быдмигчӧжым эг ме вӧвлы руй.
Ошкылісны: «Востер тайӧ зонмыс»,
Но эз мӧдлы коскас ставсьыс сюй.

Коса помысь ытшкигъясад вӧлі
Ёна мудзан. Рытнас быттьӧ мыр.
Батьтӧг оліг, уна уджыд сӧліс
Да и ӧні эз жӧ быттьӧ быр.

Врачлы, менсьым юасьӧ кор вӧлі,
Дерт, ме нинӧм висьтавны эг мӧд:
Гашкӧ, мися, кынтіс кӧдзыд тӧлыс,
Гашкӧ, мися, татшӧм миян рӧд.