БУР ВӦЧЫСЬЯСЛЫ

И бӧръяысь нюмъялас луныс,
И бӧръяысь мӧвпалас юр...
Но сыӧдз ме найӧс ог вунӧд,
Код вӧчліс мен олігам бур.

Код синваӧс чужӧмысь косьтіс
Да бурӧдіс: «Тырмас жӧ, шань».
Код ӧдзӧссӧ таркӧдтӧг восьтіс
Да ыджыда шӧрыштліс нянь.

Код дӧрӧмӧ кизьяссӧ вурис,
Код дӧмыштліс ропмунӧм гач.
Код шылькнитліс куделя юрӧс
Да сетліс мен дӧраысь мач.

Ок, сьӧкыд жӧ свет вылас олӧм,
Кор батьтӧм, и висьӧдчӧ мам...
Ме сьӧлӧмлӧн измӧмысь полі,
А сійӧ ӧд шензьымӧн рам.

Вай лэдзӧй жӧ ставныслы шуны,
Код олігӧн вӧчліс мен бур,
Мый кувтӧдз ме найӧс ог вунӧд
И на водзын копырта юр.