ГӦТЫР ЙЫЛЫСЬ

Мый сылы коліс, томӧн вӧлім кор?..
Мед сійӧс мунны кытчӧкӧ ме кори,
Мед вӧлі ю, а этша вылӧ — шор,
Мед вӧлі видз и сэні уна дзоридз.

Мед вӧлім мирас сӧмын кыкӧн ми
Да весьтӧд лэбысь дзодзӧгъяслӧн кӧлысь.
Мед сьӧлӧмысь эз куслы ӧзйӧм би,
Мед водзын ставыс югыд, сӧстӧм вӧлі.

Мый ӧні колӧ, олӧм шӧр нин кор?..
Мед удж вылӧ ме мича юрӧн петі,
Мед локті гортӧ, вӧлі водз кӧть сёр,
Мед воча кывйӧс веськыда дзик сеті.

Мед ыджыд пилысь видлі гортса удж,
И ичӧт пилы, аддзи кад да, мойді.
Мед вошӧм морт моз олӧмсӧ эг вудж,
Мед вӧчи бур, кӧть кодкӧ менӧ дойдіс.

Мед индӧ, мед. Ӧд сы вылӧ и эм.
Мед тшӧктӧ мен, мед туяси да корси.
И аттьӧ лыддя енмыслы ме нэм,
Мый дона мортӧн коркӧ ме эг сорсьы.