ПИЛӦН ЧЕЛЯДЬДЫР

Келалӧма няйт гуранъяс шӧрті
Менам пиӧй, мамыслӧн «сёшайт».
Быттьӧ сійӧс купайтӧма чӧртыс —
Юр вывсяньыс кок улӧдзыс няйт.

Ньӧрйӧн эськӧ. Сӧмын стрӧглун орӧ:
Эг жӧ этша коркӧ няйтсӧ кый.
Юалі ме пилысь серам сорӧн:
«Талун порськӧд узин али мый?»

Тӧдӧ: мыжа, сійӧ синсӧ тільӧ,
Бурӧн мынны, тӧдӧмысь, оз чайт.
Шуи сылы: «Вежсьы, пиӧ, зіля,
Сэсся тэкӧд книга лыддям вай».

Ог жӧ нӧйт ме сійӧс мыйӧн сюрӧ,
Ог жӧ сійӧс омӧль кывйӧн ёр.
Пиӧс ассьым велӧда ме бурӧн,
Медым сыысь бур жӧ лоис морт.