ВОРСЫСЬЯС

Шег ыджда вӧлі — мамӧ ньӧбис гудӧк,
А зонмӧн лои — паськӧді баян.
И мамӧ, гашкӧ, вӧлі меысь шуда,
Кор слабиника ворсі «Шондібан».

И сэксянь пыр на корся мича шыяс
И вывті рад, мен ладыс сюрӧ кор.
Сэк быттьӧ менӧ катлӧдлӧны гыяс,
Сэк пельпом сайын чужӧ быттьӧ борд.

А пиянлы оз некыдз сюр на ладыс,
Кӧть гудӧкӧйлысь босьтісны нин лов:
Ӧд ичӧтикыс ветлӧдлӧ на садӧ,
И ыджыдыс эз дасысь унджык ов.

Ме налы гудӧк бурджыкӧс на босьта,
Мед велӧдчасны кыны югыд висьт.
Кыдз нывъясыдлысь сьӧлӧмъяссӧ косьтан,
Он гудӧктӧ кӧ некымынӧс кисьт?