ВУНӦДЧИС

Суседъясас Дарья тьӧт
Совла эськӧ муніс.
Пырис жӧ да ассьыс вӧт
Мойдіс. Солыд вуніс.
Сэсся висьталіс, кыдз мӧс
Тӧрыт вайсис сылӧн,
Кыдзи зятьыс вайис тьӧс
Керка вевттьӧм вылӧ.
Ошйысьыштіс, кутшӧм шань
Гӧтыр ичӧт пилӧн,
Кутшӧм пӧжалӧма нянь,
Кодлӧн кутшӧм милӧй.
Сьӧлӧм бурмытӧдзыс тьӧт
Висьтасис да муніс.
Лоис мортыс сёйтӧг пӧт,
Сідзи кӧ нин шуны.
Со и гортыс. Орччӧн йӧр,
Бипур ӧшинь улас.
Бипур весьтын ыджыд пӧрт,
Кӧні кӧчан пулӧ.
Тьӧтлӧн быттьӧ тырис лов,
Горасӧ оз шу нин:
«Мен ӧд колӧ вӧлі сов,
Медым кӧчан пуны...»
Суседъясас Дарья тьӧт
Бара совла мунӧ.
Оз кӧ бара висьтав вӧт,
Гашкӧ, оз нин вунӧд.