ОЛАСНОГВӧлі баксӧм кылас, — Шогӧ усяс дед: Сылӧн карта вылас Некод шы эз сет. Эз кӧть орлы йӧлысь, Мӧскыс тай эз ло. Оз нин мӧдлапӧлысь Рытгорувнас во. Оз нин ю дор пӧлӧн Дедӧ зорӧд чӧвт. Гӧтырыскӧд йӧлӧн Оз нин кынӧм пӧт. Челядьыс ӧд карын Овмӧдісны жыр. Вотӧсыдла арын Воласны и — жбыр! Олӧны сэн бура, налы мӧссьыд мый?— Магазинысь сюрӧ Йӧв, и нӧк, и вый. Веськыда кӧ шуны, Такӧдны кӧ лов, Дедлы йӧлыс юны Ёнасӧ оз ков. Но ӧд быттьӧ орис Сылӧн сьӧлӧм вуж, Быттьӧ шоныд сорыс Локтіс кыськӧ пуж. Ӧткодь сьӧдӧн лоис Дедлы лун и вой, Быттьӧ кыськӧ воис Олӧм босьтан дой. Тадзи-й оліс-выліс Кувтӧдз, гашкӧ, дед, Гӧтырыс кӧ сылы Гӧлӧссӧ эз сет: «Кутшӧм бара шогысь Нёрпалан тэ сідз? Дугды вай, ен могысь, Кӧзаӧс кӧть видз». Шогыс пыр и бырис, Кыптіс ловнас дед, Быттьӧ гортас пырис Шонді да эз пет. Лои лӧсьыд, долыд, Кыськӧ петіс нюм. Мыйла нӧ эз волы Сылы татшӧм дум? Кӧзаыд, дерт, эськӧ Абу мӧслы пӧв, Но ӧд нӧкйыс веськодь, Веськодь вый и йӧв. Медым сюра чӧртысь Тӧлкыс кӧ оз ло. Карта пытшкад йӧртан, Бакӧстлас — и то. Радлӧмысь кор дугдіс, Шуис пӧчлы дед: «Турунсӧ ме пукта, Лысьтынысӧ — тэд. Кӧзаыдлы сюрас Туруныс и кор. Потша сылы бура Овны керка дор. Йӧв кӧ сетны мӧдас, — Век нин кынӧм нур. Кӧза йӧлыд, тӧдан, Зэв на ещӧ бур. Гашкӧ, внучка волас, Гашкӧ, волас внук. Кыдз нӧ йӧвтӧг олас, Он ӧд ньӧб быд здук?» Дыр на кӧза рӧдӧс Пӧся ошкис дед, Кӧть и сійӧс тӧдіс Омӧлика, дерт. Гӧгӧрвоам коркӧ Сылысь оласног: Нэмӧвӧйсяторкӧд Торйӧдчыны шог. Ловъя лолыс колӧ Мортлы сынӧд моз. Сытӧг — абу олӧм, Сытӧг — тыртӧм поз.
