ПОБЕДА

Эз некоді радлыны медав,
А шудысла солькъясис вир:
«Победа! Победа! Победа!» —
Тадз гораліс кумача мир.

Тадз гораліс миян держава,
И юргис сэк кывъяслӧн свод:
«Сӧветскӧй геройяслы — слава!
Мед олас сӧветскӧй народ!»

И сэк жӧ державаным бӧрдіс,
Кӧть крепитчӧм вылӧ и ён:
Йӧз паметьӧ гижӧма гӧрдӧн,
Мый воштім ми кызь миллион.

И ӧні на кырлалӧ дойыс
И кырлалас, думайта, пыр:
Ӧд нёль вося вир кисьтан бойыс
Эз паметьысь вушйы ни быр.

Ок, сьӧкыда вермӧмыс шедіс,
И казьтылам во бӧрся во:
И вермим мый врагӧс — Победа!
И ёнмим мый бӧрас — Победа!
И водзӧ мый мунам — Победа!
Победалы помыс оз ло!