ПЫВСЯН

Куритчыссис пывсянлӧн рыт помын,
Регыд петас гырксьыс бӧръя тшын.
Лэччам сэтчӧ, медым лоны томӧн,
Вежон кежлӧ бара содтам вын.

Пуан ваын небзяс мича корӧсь,
Ок и бура швачкам сійӧн ми.
Жарыс пырас пытшкӧ ырӧш сорӧн,
Яйным лоас быттьӧ пачын би.

Сэсся юлань горулыс ми тюрам
Кӧдзыд ваӧн пальӧдыштны юр.
Челядь моз жӧ польскӧдчам да дурам,
Сьӧлӧм вылын лоӧ бурсьыс-бур.

Гортӧ воам, мудзӧмаӧсь, дышӧсь,
Юам сӧмын пузьӧдӧм на чай.
Пӧсялам да пӧрччам вылысь кышӧд,
Тасманымӧс личӧдыштам да-й.

Ок и лӧсьыд овны татшӧм здукӧ,
Лышкыд лолӧн быдӧн ен и сар...
Тайӧ каднас пывсьӧ баба чукӧр:
Налы колис буретш небыд жар.