* * *

Кадыс петӧма лун шӧрысь,
Тьӧтӧ ректӧ турун додь.
Туруныслӧн чӧскыд кӧрыс —
Тӧвся луныс гожся кодь.

Быттьӧ воши лымъя эжыс,
Лои дзоридзьяса видз.
Быттьӧ сиктӧ шонді кежис.
Вайис йӧзлы гаж и мич.

Быттьӧ коса швичкӧ-сьылӧ,
Быттьӧ зорӧд сэн и тан.
Быттьӧ окала ме нылӧс
Зорӧд сайын, шондібан!

Быттьӧ, веськӧдчыштӧм бӧрын,
Сунлам ваӧ ставӧн — гузь...
Чӧскыд жӧ и турун кӧрыс,
Вод кӧть додь шӧрас да узь.