ТУРУНЛА ВЕТЛӦМ

Рӧдтам-гӧнитам, рӧдтам-гӧнитам,
Кыкнан боксяньным — рас да рас.
Мегыр увсяньным тільгун звӧнитӧ,
Лымсӧ серӧдӧ доддьын раз.

Кодкӧ радысла сьывны горӧдіс,
Зэв и лӧсьыда босьтіс лад.
Кӧнкӧ матын нин турун зорӧдыс,
Асьным чӧвтлім ми коркӧ кад.

Со тай терем моз сійӧ сулалӧ,
Эськӧ петіс кӧ ещӧ тшын.
— Эн на, ёртъяс, ті сэні кулалӧй?
Абу кодкӧ нин сэні кын?

Зіля турунсӧ вывсянь чапалам,
Аттӧ чӧскыд жӧ сылӧн кӧр.
Морӧс кудйӧдзным кӧрсӧ апалам,
Мед эз пышйы нин сійӧ бӧр.

— Вӧрзим?!
Вӧрзимӧй, гортлань мӧдімӧй!
Ӧти вӧла, кык, сизим... дас...
Вӧвъяс туйсӧ зэв бура тӧдӧны,
Ещӧ сьылыштам мыйкӧ час.