ТА ВӦСНА И ЧУЖИ

Бара баддьыс келіс Эжва юӧ,
Лоис лӧзов енэжыслӧн дӧрӧм.
Чужан муӧй, кыддза раса муӧй,
Со и садьмин унсьыд, сьӧлӧмшӧрӧй.

Нюжаліс нин виччысьӧмла нырӧй,
Гашкӧ, мися, тулыс оз и волы.
Ёна жӧ и гажӧй сыысь бырӧ,
Кодыр бокын, ылын кӧнкӧ олӧ.

Колӧ сійӧ, медым пані сьылан,
Колӧ, медым вунӧді ме войсӧ,
Весьӧпӧрмӧн медым эськӧ кылі
Сэкся майӧн вайӧм шудсӧ-дойсӧ...

Медым эськӧ нинӧмсӧ эг вунӧд,
Медым уджын сотчыны ме кужи.
Та вӧсна ӧд ӧти мича лунӧ,
Чужан муӧй, тэ вылын ме чужи.