ЮГЫД ШОГ

Сьӧлӧм бара югыд шогӧ уси:
Мун пӧ, кӧні югыд ваа Воч,
Кӧні войяс шӧпкӧдчӧны гусьӧн,
Кӧні гудыр луныс овлӧ шоч.

Пельпом саяд лазйӧн кай пӧ вӧрӧ,
Пуяс костӧд сэтчӧ пӧ тэ кев,
Кӧні гажа яглӧн кыпыд нӧрыс,
Сэсь пӧ аддзан тӧдса керка вевт.

Сэн пӧ тэнӧ виччысьӧны важӧн
Песка пач и мӧвпӧн тырӧм вой.
Сэсь пӧ тэныд сюрас шуд и гажыс,
Сэн пӧ бурдас менӧ босьтӧм дой.

Сьӧлӧм, сьӧлӧм, мен ӧд зэв жӧ колӧ
Сэтчӧ, кӧні ставыс важ и выль.
Но вай аслад югыд шогӧн олышт:
Коркӧ тэкӧд гортӧ ветлам збыль.