ГАБОВ ГРЕЗДЫН

Тасянь ылын менам Габов грездӧй.
Воч ю бокын кодлӧн керка рад.
Сэні асыв руысь синсӧ мездӧ,
Сэні садьмӧ челядьдырся кад.

Сэні мамлӧн мӧскыс лудӧ петӧ,
Сэні узьӧ шонді водзын кань.
Сэні биа сорснас петук летӧ,
Сэні тӧлысь — визув ышмӧм чань.

Воч ю кузя сэні пыжа катӧ,
Вомас кутӧ мортыс кыснан сі...
Рытнас вӧлі грездсянь вель и матын
Юква пуны бипур ӧзтам ми.

Коркӧ кывбур чужис бипур дорас,
Лӧня овны водзӧ мен эз сет.
Габов грездӧй бара дінас корӧ,
Аски муна, талун кӧ ог пет.