ГОРТЫН

Мен ставыс дона тайӧ вӧльнӧй светас,
Кӧть енэж йирыс корсюрӧ и сьӧд.
Ме тӧда: югдас гӧгӧр, шонді петас,
И саймовтчасны шер ли, зэр ли, слӧт.

И керка весьтті чикыш бара лэбас,
И бобув бӧрся вӧтчас ичӧт пи,
И мамӧ бара коса меысь дзебас,
Мед шойччышті, эг мудзты ёна ки.

Мен кӧса пыдди киам гудӧк сетас,
Код бӧръя кадас дыркодь нин оз сьыв.
И сэки, гашкӧ, кильчӧ вылӧ пета
Да ворса «Чужи-быдми...» сьыланкыв.

И аслым, гашкӧ, сэки ме и шуа,
Мый ставыс бур, кор чужанін он коль,
Мый шудыс мортлӧн сӧмын чужан муас,
Кӧн ставыс ас: и вӧр, и видз, и ёль.

Кӧн, кӧдзан кӧ, то век нин мыйкӧ петас,
Кӧн, сямман кӧ, то ставыс тэнад эм,
Кӧн батьлысь нимсӧ первой пилы сетан,
Кӧн, морт кӧ вӧлін, помнитасны нэм.