МИЧА НЫВ

Талун вӧтӧ усьліс мича ныв,
Сэтшӧм мича, весиг он куж шуны.
Пидзӧс вылад усь кӧть, бӧрд кӧть сьыв,
Медым лэдзис кияс вылад нуны.

Унасӧ ӧд меным оз и ков,
Ышмӧм йылысь думыштнысӧ полан.
Первойысьтӧ сибдӧ медым лов,
Воас кад да быдторйӧдзыс волан.

Сӧмын тайӧс юрын ме эг кут,
Вӧтӧн нывсӧ окалі ме пӧся.
Думайті: со локтіс менам шуд,
Аттӧ кутшӧм нылыскӧд мен лӧсьыд.

Нылыд шуис: эн нӧ, зонмӧй, дур.
Нимӧс шуис. Быдсӧн сывліс сьӧлӧм...
Гашкӧ, вӧтӧй лёк, а гашкӧ-й, бур —
Мича нылыд — аслам гӧтыр вӧлӧм.