МУСЛУН

Кор жоньлӧн кодь морӧса вӧрыс,
Сэк быттьӧ мен дас сизим ар.
Ме быттьӧкӧ радейтчи тӧрыт,
И сьӧлӧмын содӧма жар.

Ме радла, ме шуда, ме сьыла,
Ме медмуса кадын ог узь.
Но радлунӧй вошӧ, кор кыла.
Кыдз енэжын бӧрдӧдчӧ юсь.

Дерт, вошӧма мусаыс сылӧн
Да сы вӧсна гӧлӧсыс нор.
Дерт, кыпӧдчас лэбачыс вылӧ
Да пасьмунас, уськӧдчас кор.

И чепӧльтан шогӧ ме уся,
И ас вылам мыйлакӧ скӧр.
Ме гортланьым восьлала гусьӧн,
И син водзын рудӧдӧ вӧр.

И мӧвпала: «Вошас кӧ пӧлӧй,
Ме юсь мозыс верма ли ог?»
...А юсьыслӧн потіс нин сьӧлӧм,
А юсьыслы абу нин шог.