ПИЛЫ

Со и чужин тэ, ичӧтик мортӧй,
Дыр нин виччыси, нюжаліс ныр.
Менӧ батьӧнас чукӧстан кор тэ?
Мыйла, бӧрддзыны видзӧдан пыр?

Тэ ӧд, кагукӧй менам, зэв ичӧт,
Быттьӧ, босьта да, абу и нем.
Видзӧд ме вылӧ, пиукӧй, видзӧд:
Ме ӧд тэнад со батьыд и эм.

Он ӧд тӧд на, дерт, дитяӧй менам,
Но со, нюмдін да, кыпӧдчис лов.
Тэкӧд, быдман да, быдтор ми венам,
Сӧмын морт моза свет вылас ов.

Он и тӧдлы — тэ джодж кузя тюран.
Кутан тёльгыны, ворстӧг он ов.
Он и тӧдлы — тэ школаӧ сюран,
Он и тӧдлы — тэ аддзан любов.

Мед жӧ кыпыдӧн вӧлі пыр лолыд,
Сиа та вылӧ батьыс кузь нэм.
Эськӧ тӧдін кӧ, кутшӧм мен долыд,
Мый тэ мамыдкӧд свет вылас эм.