САРАПАН ДӦРА

Ньӧблі тэд, мамук, сарапан дӧра,
Мыйлакӧ сійӧс эн и тэ шӧрав.
Дӧраыс кӧть и грӧш дон оз сулав.
Вевттьыны тшӧктан, мыйӧн пӧ кулан.
Яндзимсьыс ӧні кытчӧ ме пышъя? —
Эг ӧд тэд ньӧблы платтьӧ ни чышъян.
Кӧсйылі, медым шӧвк пиын вӧлін,
Сӧмын тай ачыд ньӧбӧмсьыс ӧлін.
Шӧвк пыдди воймӧм ситеч тэ новлін,
Штапель кӧ сюрліс, шудаӧн овлін.
Сэки жӧ некор менӧ эн вунӧд, —
Козьнавлін мыйкӧ быд чужан лунӧ.
Козьнавлін меным, новлы пӧ, тӧрас...
Ме тэныд ньӧблі дзик ӧти дӧра.
Выльысь кӧ чужи, кужи ме эськӧ,
Но ӧд он некыдз лоӧмсӧ веськӧд.
Тэныд оз ло нин кӧдзыд ни жар ни,
Сиктсянь кӧть гуӧдз вольсала зарни.