ДӦРА ВЫЛЫН МОЙД

Кузьчышъян кор вышивайтліс мамӧ,
Пуксьылі ме орччӧн сэки пыр.
Пукалі ме рытгорулыс рама,
Медым мамӧ лэдзис овны дыр.

Кывзі, кыдзи сійӧ гусьӧн сьыліс,
Аддзи: ловзис дӧра, вылын мойд —
Катшасинъяс быдмисны видз вылын.
Дзоридз вылын ӧзйис лысва войт.

Чуклялігтыр шлывгис ичӧт юным,
Мулань шонді нюжӧдіс тшӧтш сыв.
Кӧсйылі век мыйкӧ мамлы шуны,
Но эз артмыв весиг ӧти кыв.

Оз нин ӧні вышивайтчы мамӧ,
Мудзӧм синъяс кысьӧмӧн оз дойд.
Но ме тӧда: вӧлі мамлӧн сямыс.
Помнита, кыдз рытнас овлі рама,
Кыдзи чужліс дӧра вылын мойд.