ТУЙЫН

Шофёрӧс зэрыс туйын суис,
Кор ылынкодь на вӧлі сикт.
Дзик пыдӧсӧдзыс нильзис муыс,
И сибдіс няйтӧ грузӧвик.

Кӧть эбӧс быртӧдз мырсьӧм лоис,
Эз отсав лӧм ни зыр, ни чер.
Шофёр дзик пикӧ сэсся воис...
А вывсянь личкис кӧдзыд зэр.

Но сетчыны эз кӧсйы мортыс.
Машинасӧ эз слабӧн чайт.
И шӧпкис сылы: «Воам гортӧ...
Но, матушкаӧй, пет жӧ вай».

И сійӧ быттьӧ мортӧс кыліс
И зэвтіс сӧн, кыдз мудзӧм вӧв,
Моторыс кыпыдджыка сьыліс
И содтіс ӧдсӧ уна пӧв.

И петіс няйтысь, дивӧ вылӧ,
Пӧсь лолӧн упкысь грузӧвик.
Шофёрлӧн шорӧн лэччис ньылӧм.
Кор петіс дӧрӧм кежсьыс дзик.

Кӧть енэжыслӧн ӧткодь вӧлі
Ён кӧдзыд зэрысь бан и гуг,
Капотсӧ шыльӧдіс, кыдз вӧлӧс,
И шӧпкис: «Аттьӧ, менам друг».