МИЧА ОЛӦМ ВӦСНА

Понйӧс ме ог некор велӧд лёкас.
Сійӧ рам и меным зэв бур ёрт.
Жаль, мый ӧтчыд чужйис сылы бокас
Аслам сиктса шома юра морт.

Мортыс вылӧ лӧг, дерт, сэксянь петӧ,
Вывті мустӧм сійӧ лоис мен.
Кыдзи сійӧ олӧ вӧльнӧй светас?
Кутшӧм сылӧн сӧвесьт, чесьт да ен?

Понйӧй рам, но сійӧс пурӧ нэмыс,
Мыйӧн аддзас, пыр жӧ лэдзӧ гыж.
Тӧдӧ, вӧлӧм, весиг кывтӧм пемӧс:
Лёклы паныд колӧ нуны тыш.