ЭЖВА

Тэ — менам медся-медся муса ю,
Зэв рад, мый нимтӧ сьыланкывйысь кыла.
Тэ йылысь тӧдӧ ставнас Коми му,
А сэтшӧм этша тэ йылысь ме сьыла.

А коліс эськӧ важӧн гижны мен,
Лӧз синъяс йывсьыд важӧн гижны коліс,
Мый мичнас тэнӧ любӧй ю оз вен,
Мый тэ дінӧ быд радейтчысь на воліс.

Мый тэтӧг тані олӧмыс эз вӧв,
Эз чужны сиктъяс тэнад кыръяс вылын,
Мый тэтӧг эськӧ парма вӧлі чӧв,
И ӧдвакӧ ми татшӧм гажа сьылім.

Тэ, менам Эжва, ыджыд, вына ю,
Здук весь он ов, тэ мудзлытӧг пыр мырсян.
Ме ог ӧд сӧмын ошкӧм ради шу,
Ме тайӧс, Эжва, аддза челядь дырсянь.

Но сьыла на ме. Мӧд ногыс оз ло.
Тэ сьӧкыд здукӧ вежан меным мамӧс.
Тэ — сьӧлӧм пытшкын сы мында нин во...
Он, гашкӧ, тӧд, а вӧчан менсьым сямӧс.