СТАВЫС ПАРМАСЯНЬ

Катӧдӧй менӧ кӧть райӧ,
Корсьӧй кӧть медмича му, —
Пармаӧс меысь он сайӧд,
Пармаӧс менсьым он гу.

Пармаыс менам и батьӧй,
Пармаыс менам и мам.
Пармасянь менам и статьӧй,
Пармасянь менам и сям.

Сы кодь ме варов и мелі,
Сы кодь ме веськыд и ён.
Сы моз жӧ сӧнъяснам зэлыд,
Сы моз жӧ сьӧлӧмнам дон.

Сы моз жӧ элясьтӧг ола,
Кӧдзыдыс сотӧ кӧть вем.
Сы моз жӧ кодлыкӧ кола,
Сы моз жӧ помасьтӧм нэм.