ЧУЖАН МУЛӦН КӦ ПИ

Кыдзи морелань шлывгӧны юяс,
Сідзи гортсьыным шлывгылам ми,
Медым аддзывны мичаджык муяс,
Медым восьтыны ассьыным ді.

Сӧмын юыс кӧ мореӧ кольччӧ,
Ми ог эновтӧй ас чужан му.
Кытчӧ мунам кӧть, сійӧ пыр орччӧн,
Медым миянӧс гажтӧм эз су.

Кӧнкӧ ыліын, йӧз енэж улын.
Чужан муӧ пыр нуӧдлӧ вӧт,
Кӧні тӧдса став чукыльыс юлӧн,
Кӧні муса и зэрыс, и слӧт.

Кысянь мамыдлӧн гӧлӧсыс воӧ.
Кӧні дзоридзысь нюмдӧма видз...
Ӧти лунӧ зэв шуштӧмӧн лоӧ
Ылі муыслӧн гажыс и мич.

Сэсся асьтӧ кӧть кыдзи он ылӧд,
Бокын некыдзи оз овсьы, оз.
Петан гортлань, и сьӧлӧмыд сьылӧ.
Тӧдтӧм муыскӧд прӧщайтчигмоз.

Кыдзи морелань шлывгӧны юяс,
Сідзи гортсьыным шлывгылам ми.
Эмӧсь му вылас зэв гажа муяс,
Сӧмын овнысӧ сэні мӧй туяс,
Чужан мулӧн кӧ збыльысь тэ пи?