МЕНАМ КЕРКА

Мича керка ме лэптыны шуи,
Кутшӧм некор на некӧн эз вӧв.
Сійӧс кыпӧда батьяс моз пуысь,
Пожӧм керйысь, код веськыд, кыдз ньӧв.

Медым шондіыс керкаті уяс,
Паськыд ӧшиньяс вӧчала ме.
Керка гӧгӧрын садита пуяс,
Лэбач гӧлӧсысь садьмыны мед.

Уна жыръяса керкаӧй лоас,
Тӧрам, гӧсьтыс кӧть мыйта оз во.
Быттьӧ, рӧдвужӧй ставнас кӧ воас,
Оз жӧ некодлы дзескыдыс ло.

Мича керка ме лэптыны шуи,
Важӧн дасьтӧма пила и чер.
Сӧмын уджыс тай юр вывтыр суис —
Муртса сруб вылас пӧрӧді кер.