СЭКИ ТЭКӦД

Катыд помсяньыс кывтыд помӧдз
Бӧрсянь вӧтчывліс тувсов вой.
Сэки тэкӧд ми вӧлім томӧсь,
Да и сьӧлӧмын эз вӧв дой.

Синмӧ кольччыліс енэж лӧзыс,
Ворсіс бандзибын шонді дзирд,
Весиг шулісны сиктса йӧзыс:
Чоя-вока кодь ми пӧ дзик.

Ставыс колис тай... Мый нӧ керан?
Асьным мыжаӧсь, абу йӧз...
Тэтӧг гажтӧммис сиктсай керӧс,
Да и енэжыс абу лӧз.

Медым мыжалӧ олӧм судыс:
Важсӧ бергӧдны вывті сёр.
Нуин томлунӧс; гашкӧ-й, шудӧс,
Но ме тэнӧ ог вид ни ёр.