СІЙӦС МЕ РАДЕЙТА

— Кагаа бабаӧс он жӧ ӧд вай,
Этша мӧй сиктаным нылыс?
Абу зэв мича ни, пӧрысь нин да-й,
Дыш весиг видзӧдны вылас, —

Кызь куим арӧса быдтассӧ тадз
Янӧдіс бӧрдігмоз мамыс...
Пиыслӧн воча кыв вӧлі кӧть надз,
Тыдаліс сэтысь нин сямыс.

— Мамукӧй, мамукӧй, бӧрдны оз ков,
Мыйла нӧ омӧльтан сійӧс?
Ачыд ӧд шулін, мый уджысь оз пов,
Тэ кодь мый тэрыбӧсь кияс.

Ачыд ӧд шулін, мый мичтӧ он сёй,
Сьӧлӧмыс мича мый колӧ...
Кагасӧ видчӧмӧн некор ог дойд,
Мед нӧ мен пи пыдди олӧ.

Шуан тай, уна пӧ сиктаным ныв...
Эмӧсь, дерт, — збойӧсь и рамӧсь.
Сӧмын тай, шуа ме веськыда кыв,
Сійӧс ме радейта, мамӧ.