МЕ ЛОИ УЧИТЕЛЬӦН

Ён кӧсйӧмӧс, чукӧрмӧм сямӧс
Эг ас пытшкын мич пыдди видз:
Ме лои учительӧн, мамӧ,
И ним дорам содыштіс вич.

Со первойысь классӧ ме пыра,
И рад зэв, и тірыштӧ ки...
Но полӧмӧй тӧдлытӧг бырӧ,
Кор челядькӧд тӧдмасям ми.

Со пукта нин первой отметка
И челядьысь дзебышта нюм.
Со войяснас пукала ӧткӧн,
Мед быдӧнлысь тӧдмавны дум...

Ме йӧзыслы петкӧдлі сямӧс
Эг сы вӧсна, содіс мед вич:
Мый тӧда да велӧдлі, мамӧ,
Ме челядьлы сета — ог видз.