«ВЕРМАМ ВРАГӦС! ВИЧЧЫСЬӦЙ».

Бӧръя зорӧд чӧвтысьяс война вылӧ мунісны.
«Вермам врагӧс! Виччысьӧй», — бабаяслы шуисны.
Бӧръя гудӧкасьысьяс война вылӧ мунісны.
«Локтам, сэки гажӧдчам», — мусаяслы шуисны.

Нёль во чӧжӧн бабаяс уна зорӧд чӧвтісны,
Банъяясьӧм косаӧн эбӧс быртӧдз ӧвтісны.
Гӧрисны и кӧдзисны, вундісны и вартісны...
Мыйта найӧ вӧчисны, верман ӧмӧй артыштны?

Сэні, сотчысь Рытылын, сьӧкыдджыкӧд вӧлі на:
Сэні враглӧн пуляяс швачкысьлісны сьӧлӧмӧ.
Рытыввылын му-васӧ бияс помся нюлісны...
Уна тӧдтӧм юясысь коми зонъяс юлісны.

Нёльысь Коми муаныс кыдзьяс корсӧ вежлісны...
«Вермам врагӧс! Виччысьӧй», — гортсаяслы гижлісны.
Нёльысь Коми муаныс юяс кырйӧдз тулісны...
«Нӧйтӧй врагӧс! Виччысям!» — гортсаясыс шулісны.

...Нёль во сьӧкыд пушкаяс мудзӧмнысла упкисны,
Нёльӧд шуда тулысын враглысь вомсӧ тупкисны.

... Эз став зорӧд чӧвтысьсӧ туйяс гортас вайӧдны:
Броняыс ни вӧр-ваыс эз тай кужны сайӧдны.
Эз став гудӧкасьысьыс рытас нывкӧд сетчыны:
Кысь нин дзескыд гуясысь дитяяслы чеччыны?..

...«Вермам врагӧс! Виччысьӧй», — письмӧясын шулісны,
Бойӧ коммунистъяслысь нимсӧ найӧ нулісны.

Враглӧн дженьыд паметьысь Брестъясыс кӧ вунасны, —
Талун зорӧд чӧвтысьяс, миян гудӧкасьысьяс
Кыв шутӧг кӧть мунасны,
Медым шудсӧ дорйыны, коді сьӧкыд бойясын
Шедіс ыджыд дойясӧн.