МЕДВОДДЗА ВОСЬКОВЪЯС

Ставӧн гӧгӧрвоӧны тайӧ кык кывсӧ: «ӧтувтчӧмын — вын». Мыйӧ кӧть он кутчысь, кутшӧм удж кӧть он понды керны — быдлаын колӧ ӧтувтчӧм, быд уджын колӧ мӧда-мӧдлы отсасьӧм. Уджсьыд некутшӧм сер оз пет, кор ӧти ёрт мунӧ (кыскӧ) ӧтарӧ, а мӧд — мӧдарӧ.

Коми литература, коми кывйыс ставнас воысь-во ёнмӧны, паськалӧны, крепаммӧны. Революция садьмӧдіс коми йӧзӧс. Революция на пӧвстысь петкӧдіс-кыпӧдіс уна сюсь, вежӧра йӧзӧс. Революция выль туй кузя мӧдӧдіс став коми йӧзӧс, вежис налысь олас ногсӧ. Революция чужтіс коми гижысьясӧс.

Ставныслы колӧ сетны индӧдъяс. Миян мог: отсавны выль чужысь коми гижысьяслы, ӧтувтны найӧс, ӧтувтны коми литературасӧ. Дугдывтӧг чуксавны коми йӧзӧс, садьмӧдны найӧс, чуйдӧдны котыра олӧмлань — со мый сулалӧ миян гижысьяс водзын.

Сыктывкарса коми гижысьяс сьӧлӧмсяньыс кутчысисны тайӧ уджас. Найӧ таво лым сылігас (коми гижысь чукӧрыд, майбырӧй, оз сыв — паськалӧ) ӧтувтчисны, панісны КАПП. 12 мортсянь (пансигас пырисны сӧмын 12 морт) КАПП-ыд ёна нин содіс. Ӧні кежлӧ 30 морт олӧны ӧти ног мӧвпаліг, ӧтитор виччысиг. 30 мортсьыс, кыдзи юр вемсянь сӧнъяс, 9 морт паськӧдчӧмаӧсь, разӧдчӧмаӧсь, уджалӧны сиктъясын.

Ӧні КАПП-лӧн вӧлі медводдза конференция. Коми гижысьяс чукӧртчылісны Изьвасянь, Эжвасянь, Сыктывсянь. Чукӧртчылісны вӧчӧм уджсӧ видзӧдлыны, паськӧдны ордымсӧ водзӧ.

Сьӧкыд вӧлі первойяссӧ... Вӧр пиын моз коми гижысьяс ӧтувтчисны... Джуджыд вӧр пиын моз. Югыдыс эз тыдав... Отсӧгыс, сьӧлӧмсӧ кыпӧдӧмыс весиг эз вӧв... Гӧгӧрбок судзсьытӧм, гӧльлунным торкис уджнымӧс. Отсӧгтӧг, куш кинад нӧ кытчӧ кутчысян?

Крепыд сьӧлӧма, сюсь коми гижысьяс повзьытӧг, эновтчытӧг мунӧны водзӧ. Ньӧжйӧник, вӧрзьывтӧм вылӧ тэчӧны выль керкалысь увтассӧ. Чуксалӧны йӧзӧс литература пыр выль олӧмӧ. Лэдзӧма асланым вынӧн торъя книга, дас вит лист бок (водзӧ кутам шедӧдны и вермам шедӧдны уна лист бока журнал).

Тайӧ сӧмын заводитчӧм. Тайӧ сӧмын медводдза воськовъяс коми гижысьяслӧн. Ӧні ми ӧтувъяӧсь, ӧні миянӧс воддза моз кедзовтны некод оз вермы.

КАПП сулалӧ зумыд туй вылын. КАПП веськыда мунӧ да нуӧдӧ ас бӧрсяыс став йӧзсӧ югыдлань. КАПП-лысь подувсӧ вӧрзьӧдны некод оз вермы.

Конференция пасйис водзӧ мунан туйсӧ коми гижысьяслы, ставныслы индіс удж. Ӧні кокньыдджык лоӧ вӧр пиӧд моз тувччавны, ӧні вӧр йывтіыс тыдовтчис кыпалысь шондіыслӧн югӧрыс. Збойджыка, некытчӧ кежлавтӧг тувччалам водзӧ!