КЕРКА-ПӦЛЬ

ЧУЖАН ЛУН

Талун Федялы тырӧ кӧкъямыс арӧс. Тӧв заводитчигас. Эз кӧ висьмы кольӧм восӧ, ёртъясыскӧд эськӧ велӧдчис нин мӧд классын, мамыс ордын. А ӧні... Быдса во ӧд наысь кольччис. Школаас нёль класс и эм. Мамыс велӧдӧ кыкас, а мӧд кыкас — первойын да коймӧдын — Анна Никитична, олӧма нин морт. Стрӧг. Абу эськӧ лёк, Федя оз норась сы вылӧ, но мамыс дорын, дерт, кокньыдджык эськӧ вӧлі.

Сиктныс налӧн ичӧтик, да челядьыс этша. Садикыс весиг абу. Пӧчӧяс и видзлісны татчӧс челядьсӧ. Федяӧс Феня чойыскӧд орчча керкаысь Марпа пӧч дӧзьӧритліс. Абу асланыс. Асланыс пӧчыс водз кувсьӧма, а пӧльыс оз нин ас сиктас ов, сылы сетлӧмаӧсь кар сяма роч посёлокысь патера, сэні и олӧ выль пӧчкӧд. Пӧрысь нин, да зэв гежӧда волӧ. А Феня чойыс матынджык пӧльсьыс олӧ, посёлокын жӧ, интернатын, витӧд классын велӧдчӧ. Жаль, мый арся каникулыс помасьліс нин, да батьыс лэччӧдліс чойсӧ Джуджыдъягас. Ӧні эськӧ чойыс мамыскӧд ноксис, вокыс чужан лунӧ чӧскыд сёян-юан отсаліс дасьтыны. Сы пыдди Федя водз асывсяньыс мамыскӧд пызан дорын бергаліс. Ноксьӧны, сёрнитӧны мамыскӧд быдтор йылысь.

— Мед эськӧ папыд кыйдӧсӧн локтас, — ышловзьӧ мамыс, — сійӧ тэнад быд чужан лунӧ на вӧрӧ кайліс, кӧчӧс ли дозмӧр-тарӧс вайліс. Вӧралысьӧс тэысь кӧсйӧ быдтыны. Вирыс кыскӧ. Сылӧн ӧд батьыс и пӧльыс, и пӧльыслӧн на пӧльыс вӧралысь рӧдысь вӧлӧмаӧсь.

— И найӧ ставныс тані овлісны? — юасьӧ Федя.

— Эз жӧ. Миян грездӧ папыдлӧн пӧльыс волӧма, а мукӧдыс Эжва йылын овлӧмаӧсь. Татчӧ, войвылас, Изъяю катыдас, зверь-пӧткаӧн озыр вӧр вӧснаыс вуджлӧмаӧсь пӧльясыд. Мортыд тай пыр корсьӧ, кӧні бурджыка да пӧтӧсджыка овсьӧ. Тэ, сідзкӧ, Педӧр Вань Петыр Педӧр лоан. Педӧр пӧльыдлӧн бӧжалысьыс.

— А мыйла бӧжалысьыс?

— А бырны нин кутіс грездыс да... Коркӧ ӧд зумыд, озыр сикт вӧлӧма. Ӧні, гашкӧ, оз нин и ловзьы: йӧзыс гырысь посёлок-каръясӧ сетчисны, мусир, газ да из шом перъянінъясӧ. Татчӧ сӧмын гожӧмнас шойччыны-вотчыны волӧны... И тэ ӧдвакӧ татчӧ вужъясян да выль петасъяс сетан. Сійӧн и бӧжалысьыс. Кодарӧ ӧд сэсся бӧжалан-веськӧдлан. Со и вӧралысьыд тані, батьыд моз, лыда коли.

— А тэнад, мамӧ, вӧралысьяс жӧ рӧдад вӧліны?

— Менам кыйсьылісны жӧ, но и видз-му вӧдитлісны, скӧт видзлісны. Менам пӧль-пӧчьяс ӧд Коми мулӧн лунвылысь, сэні водзті нянь быдтылісны. А тані, войвылын, няньыс прамӧясӧ эз волы. Ньӧблісны сійӧс, дона куяс вылӧ вежлісны. Сійӧн пармаыс тані вердысьыс и эм.

— Мамӧ, а кысь нӧ миян керканым лоис? — окота лои зонкалы тӧдмавны.

— Тайӧ папыдлӧн пӧльыс, Педӧрыс, и лэптылӧма. Гашкӧ, сё во нин сулалӧ да. Оз кӧ унджык. А пыр на керъясыс шонтӧны миянӧс, видзӧны турӧбысь да кӧдзыдысь, лымйысь да зэрысь. А кылан, кыдзи мойдӧны? — нюммуніс мамыс да мудера видзӧдліс Федя вылӧ.

— Кыдзи?! — чуймӧ Федя... Сылӧн мамыс пыр мыйкӧ думыштас.

— А дзуртӧны кор, тайӧ ӧд найӧ пӧрысь пӧль моз и мойдӧны ставсӧ, мый аддзылісны вӧрын быдмигӧн на, и татчӧс, керкапытшса олӧмсӧ висьталӧны.

Федялы тайӧс кылӧм бӧрын быттьӧ мусаджык лоис налӧн важ, пӧльӧ кодь пӧрысь керкаыс. И сэтшӧм окота лои топӧдчыны керъяс дінас да кывзыны налысь мойдсӧ. И кажитчис сылы, мый керъясыс и збыль ловъяӧсь, шувгӧны-мойдӧны вӧрын моз...

И аслас ичӧтик Ниакерӧс грездыс, джуджыд нӧрысыс, визув Изъяюыс вӧліны мусаӧсь. Юбердса ниа пуяса джуджыд кыркӧтш вылын сулаліс налӧн керкаыс.

Федялӧн во-мӧд сайын на быттьӧ воссисны синъясыс став вылас, мый сійӧс кытшаліс. И кутіс сійӧ вӧчавны серпасъяс. Гортас кӧ — карандашъясӧн альбомӧ. Ывлаын кӧ — лым вылӧ либӧ веськыда буса туй вылӧ. И ӧні друг сылӧн син водзын сэтшӧм ясыда сувтіс налӧн керка-пӧльыс, весиг окота лои ӧдйӧджык кватитны карандашъяссӧ.

— Часлы, мам, ме муртса... — кисӧ мыськытӧг и уськӧдчис альбом дорас.

— Но вот, ылаліс, — шуыштіс мамыс, но эз дӧзмы.

Думсьыс Татьяна Васильевна радліс, мый пиыслӧн ӧнісянь эм серпасалан сямлун. И Ен мед сетас водзӧ сӧвмыны, гашкӧ, быдмас да художникӧн лоӧ.

А батьыс Федялӧн мӧд ногджык мӧвпаліс...

ВЕРА ДА ТОЛИК

Федя ноксис на альбом дорас — некыдз колана ногӧн эз артмы керка-пӧльыс. А мамыслӧн ставыс нин вӧлі дась нимлун сёйигкежлӧ. Сылы ковмис торкны пиыслысь уджсӧ:

— Пиук, мун кор Вератӧ да Толиктӧ. Марпа бабтӧ эн вунӧд чукӧстны и. Ӧтлаын пажнайтам. Паптӧ, гашкӧ, войӧдзыс ковмас виччысьны.

Федялы ньӧти эз вӧв окота орӧдчыны альбом дорсьыс да эз и вочавидз.

— Мыйкӧ оз артмы, пиук? — матыстчис мамыс.

— Энлы на, бӧрыннас петкӧдла, — зонка тупкис альбомсӧ да кутіс пасьтасьны.

Регыд челядь воисны. Марпа пӧч пӧ сёрӧнджык локтас. Ныла-зонма пасьяснас да шапкаяснас быттьӧ ӧткодьӧсь вӧліны, а пӧрччысисны да пыр жӧ ас кодьныс лоины. Вера — бадь ньӧр кодь вӧсни да винёв, Толик — банйӧм кӧвдумъяс кодь бандзибъяса топыд зонка, дзик быттьӧ томиник, зумыд, пашкыр пожӧм. А Федя ёнджыкасӧ муніс нэриник, небыд лысъяса, вывланьӧ нюжӧдчысь ниа пулань. И юрсиыс сылӧн ниа лыскыс кодь жӧ небыдик.

А Федялы забеднӧ, мый кольччис ёртъяссьыс школаас. Толикыс кӧть и ыджыдджык сыысь, ӧдва велалӧ, шыпасъяссӧ век на прамӧя оз тӧд. А Федя важӧн нин велаліс и лыддьысьны, и артасьны, а со — первой классын.

Вера — зонка кодь збой, инас ӧшйытӧм нывка, пыр жӧ и перйис зепсьыс шоколад плитка да козьналіс Федялы. Сылӧн мамыс лавкаын вузасис, та вӧсна нывкалӧн вомыс тшӧкыдакодь чӧсмасьліс юмовторъяснад. Да и няр на вӧлі Вераыс: видлы, эн сет, сэтшӧма нюжйӧдлыны-дзайгыны кутас, оз кӧсйы да сетас мамыс чӧскыдтортӧ. Чеченитӧм нывка.

Толик ньӧжмыда мыччис ёртыслы наган, жалитӧмпырысь на весиг. Гашкӧ, ассьыс на вайис да. Федя тӧдіс, мый Толиклӧн батьыс некӧн оз уджав, тшӧкыда код юра овлӧ, да семьяас оз ёна лышкыдасьны чачаяс вылад. Зонка ёнджыкасӧ пӧчыс ордын оліс, да сылӧн сёян-юан, рокъяс да пӧжас вылын зумыдасӧ и быдмис, азыма сёйис да. Пӧчыс ӧд Федяясӧс видзысь Марпа бабыс и эм, орчча керкаысь суседкаыс. Сэні Толиккӧд ӧтлаын ворслывлісны да и велалісны ӧта-мӧд дінас.

Ёртъяс бӧрся и мамыс матыстчис Федя дінӧ. Зонка пытшкӧснас весиг лӧньыштіс, виччысис.

— Тайӧ тэныд, пиук, батьсяньыд, Феня чойсяньыд да месянь. Быдмы шаня да бура, эн вись, пыдди пукты верстьӧясӧс, ёртъястӧ да жалит ловъя ловъясӧс, — чолӧмаліс мамыс да мыччис Федялы ыджыдкодь куд.

О-о-о! Тайӧ вӧліны краскаяс! Уна рӧма краскаяс! Ылаліс весиг, лов шысӧ кутӧмӧн видзӧдіс донатор вылас, дась вӧлі ӧні жӧ шыбитчыны альбом дорас, но мамыс корис пызан сайӧ.

МАРПА ПӦЧ

— Ок, ок, ок! Удзӧдісны тай нимлун сёйысьясыд!.. — ӧдзӧс дорсянь кыліс Марпа пӧчлӧн гора гӧлӧсыс.

Ачыс ичӧт тушаа, тупыль кодь гӧгрӧс, а гӧлӧсыс брунган кодь гора да кыз.

— Пиукыслы бабыс шоныд латш гоз кыи, мед сэсся некор он вись. Эг на ӧд вунӧд: чужӧмсяньыд пошкин-висин, кымынысь бабыслы ковмис тэнӧ пӧсь пывсянын шонтыны да небыд корӧсьӧн шлачӧдны, лысьӧмтӧ небзьӧдны. Ин сэсся, дитяӧй, нёрпав, тшӧтшъяяссьыд ин кольччы.

Тайӧс шуалӧм бӧрын Марпа пӧч пӧттӧдзыс топӧдліс да окаліс зонкаӧс. Федя гӧрдӧдіс весиг ёртъяс водзас, но эз мынтӧдчы. Сылы Марпа пӧчыс важӧн нин аслас кодьӧн вӧлі. Ассьыс пӧчсӧ эз тӧдлы, ыджыд мамыскӧд гежӧда аддзысьліс, а Марпа бабыс век орччӧн.

— Часлы, тіян пызан вылӧ ёска шаньгаяс тшӧтш пукта. Ок эськӧ, унатор нин дасьтӧмныд да. Пельняньыд, пражитӧм чериыд, пирӧгыд — ставыс пызан вылад выйим. А тайӧ ёссӧ бабыс ачым на кӧвтлі визув Изъяюсьыс да солавлі. Забыль, а кӧн нӧ батьныд?

— Ягӧ кайис!

— Но, Ен мед сетас, оз жӧ мед куш киӧн лок. Марпа бабыс век на бурсӧ кевмыліс, да Енмыс из ӧткажитлы, отсавліс.

Пызан сайын суседкаыс бара на варовмис, Федя дінӧ шыӧдчис:

— Пиукӧ, ок и жебиник тэ вӧлін чужӧм бӧрад. Горзан и горзан, тайкӧ кулан! Бабыс и кори мамтӧ: вай, мися, кагатӧ пывсянын пыртам, вичкоыд абу жӧ-а, кисьтлісны антикристъясыд, а Енмыс синва сорӧн корӧмтӧ кылас. Сетіс мамыд, пывсянын мыськи-корӧсялі, бласлӧвиті, да ловзин ӧд, дитяӧй, ин кув. Бӧрас нин карса больничаын висьӧмыд сюри врачьяслы, отсалісны. Но и пывсяныд, веж корӧсьыд да пӧжӧм туруна ваыд абу бӧръя делӧ. Со тай Толик, Ен сыкӧдӧн, топыд кӧвдум кодь, мед сё во татшӧм лоӧ!

Марпа пӧч ланьтіс, кутіс тяпкӧдчыны пиньтӧм вомнас, небыд пирӧгӧн ырсниталіс блюдйысь пӧсь чай. А челядьлы телепит водзӧ кывзыны пӧчӧс. Корны кутісны, мед мыйкӧ тешкодьтор висьталас. А бабӧс мӧдысь корны оз и ков, вом дорсӧ чышъян помнас чышкыштіс да водзӧ варовитӧ.

— А, гашкӧ, ин на вунӧдӧ, пиукъяс, кыдз ме тіянӧс домавлі ӧшинювса йӧрӧ, мед он пышйӧ керка дорысь, — казьтылӧ Марпа баб да серӧктӧ. Сыкӧд тшӧтш пыльсмунӧны и зонкаяс.

— Мый нӧ чикъяланныд, мед бабыс висьталӧ, — дӧзмӧ ёртъяс вылас инас ӧшйытӧм Вера.

— А висьтала и эм, — сетчис Марпа пӧч да водзӧ варовитӧ, — ог ӧд вӧлі пыр вермы тайӧяс дорын бергавны, коркӧ и кытчӧкӧ могӧн ковмыліс ветлыны. Толик, кывзысьтӧмыд, пыр вӧлі ёртсӧ нуӧдас вӧрӧ ли ю дорӧ. Сійӧ вильшасьны востер, а Федюклы окота быдторсӧ аддзывны: ваын уялысь ёсъясӧс, видз вылысь бобув-гагъясӧс, вӧрысь лэбачьясӧс. Пыр ылалӧма. Быть ӧд пов вильышпозъяс вӧсна. Корсюрӧ ковмыліс домавны коскӧдныс гезйӧн да здук кежлӧ кольлыны ӧтнаннысӧ. Кужны на коліс кӧртавны гезсӧ, коскыслы мед абу дзескыд, и гӧрӧдсӧ разьны мед оз вермыны.

А ӧтчыд гартчасны ӧта-мӧдныскӧд, да и тышкӧ воасны. Пошкигтырйи локті Марпа бабыс, а сэні — синва и дуль — ставыс сорласьӧма бӧрдӧмсьыныс. Дугді сэсся бабыс домавны тіянӧс, вильышпозъясӧс.

Унатор на эськӧ казьтыштіс Марпа пӧч, но челядь мудзисны сэсся сёрниясысь, да и окота лои налы ворсыштны, чеччисны пызан дорысь. Регыд и, рӧмдігас нин, мӧдӧдчисны гортъясаныс. Сӧмын Толик пыксьыштіс, эз кӧсйы мунны пӧчыскӧд. Сылы окота вӧлі виччысьны Федялысь батьсӧ, но Марпа пӧч сойбордйӧдыс нуӧдіс и сійӧс. А Федя бара копыртчис альбом весьтӧ.

ПЕРА БАГАТЫР

Гӧстьяслӧн мунӧм бӧрын недыр мысти ӧшинь улын кылісны дзуртӧм шыяс да понъяслӧн увтӧм.

— Папыд! — шуис мамыс да уськӧдчис пачводзӧ лӧсьӧдны сёян.

— Катшыс да Шарик увтӧны, збыль, папӧ локтӧма! — радпырысь горӧдіс Федя.

Медводз керкаӧ чепӧсйисны сьӧдовруд Катшыс да сылӧн пиыс — арӧса Шарик. Сэсся ру пытшкысь и папыс тыдовтчис: ыджыд, топыд тушаа, ускыс и синкымыс гыӧралӧмаӧсь, но шоныд керкаад гыӧрыс ӧдйӧ сылі да пӧри дзирдалысь посни ва войтъясӧ. Дзик ӧд мойдвывса Пера багатыр кодь Федялӧн батьыс. Сӧмын паськӧмыс абу сэтшӧм, кутшӧмӧс зонка аддзыліс мойдъяса небӧгысь.

Понъяс эськӧ уськӧдчылісны Федялань, но кӧзяиныслӧн шытьнитӧм бӧрын пуксисны ӧдзӧс дорӧ да бӧжъяснас джоджӧ котшкигмоз кутісны виччысьны ассьыныс пай.

Папыс пуктіс тыра нопсӧ джоджӧ, перйис зепсьыс тубрас да мыччис Федялы:

— Ноко, пиӧ, видлы кӧч гӧснечсӧ.

Тубрасас вӧлі кынмӧм выя нянь шӧрӧм. Чӧскыд. Кӧч гӧснечтӧ Федя радейтӧ. Сэсся папыс перйис нопсьыс ыджыд кӧчӧс да пуктіс шоныдінӧ, пач дорӧ сывдыны, мед сэсся кульны да керны, а пытшкӧссӧ понъяслы юкны.

— Ӧти кӧч и шедӧма лэчкӧ, но ыджыд да ён, лэч гӧгӧрсӧ ставсӧ талялӧма пессигас.

«Да, Толик кӧ ӧні тані вӧлі, папкӧд тшӧтш радліс, вӧрӧ на вӧзйысис эськӧ, — кӧч вылӧ видзӧдігмоз, жугыля мӧвпаліс Федя да эз и казяв, кыдзи «кӧч гӧснечыс» киас сыліс да небзис. — Кӧчыс дзик быттьӧ узьӧ, сӧмын оз вӧр. Катшыс да Шарик тай кор узьӧны, пельныс и кокныс вӧрӧ, быттьӧ котӧртӧны, а тайӧ со — дзик кын». Мам-бать сёрнитігкості Федя весиг матыстчис кӧч дінас да кымыныськӧ пӧльыштіс сылы уска ныр-вомас, быттьӧ садьмӧм виччысис. Небыд гӧнсӧ малыштіс и. Но оз тай вӧрзьы кӧчилейыс.

Батьыс тайӧс казявтӧг эз коль... Сійӧ трактористаліс, но вирнас и ловнас вӧлі вӧралысьӧн. Кыйсян кадӧ став прӧст лунъяссӧ колляліс вӧрын, Педӧр пӧльысӧн на лӧсьӧдӧм чӧс туйясті ветлӧдліс. Федя вылӧ ыджыд лачаӧн видзӧдлывліс: быдмас да сиктса зонка пӧльяслӧн кок туй талялысьӧн лоӧ. Кӧть ӧні кыйдӧс вайӧм бӧрын эз на аддзыв пиыслысь ӧзъян синъяссӧ. Мӧдарӧ на — жугыля видзӧдіс пиыс лыйӧм дозмӧр-тар, утка либӧ кӧч вылӧ.

А Федялы и збыль жальӧсь вӧліны виӧм ловъясыс, сійӧн эз и радлы. Видзӧдіс, кыдзи мамыс куштӧ байдӧгсӧ, а мӧдыслӧн дзоля юрыс лётъялӧ. Сэсся, куштӧм бӧрас, лэбачыс дзик ичӧтик ёкмыльӧн кольліс. Зонка бӧр ловзьӧдліс тайӧ ловъяссӧ альбом лист бокъяс вылын. Серпасаліс ваын уялысь уткаӧс пияныскӧд, пув кокалысь тарӧс, пипу кырсь йирысь кӧчӧс, коз пу коль килльысь урӧс... Вӧр-ваын олысьяс йылысь сійӧ унатор нин тӧдіс батьсяньыс. Но и мамыс висьтавліс быдсяма пемӧсъяс йылысь мойдъяс. Мойдъясыс вӧліны шаньӧсь, помасьлісны бура. Татшӧм мойдъяссӧ зонкалы пыр вӧлі окота серпасавны...

Водігас нин, мӧд вежӧсас папыс матыстчис Федя дінӧ да кызӧктыштӧм бӧрын шуис:

— Тэ, пиӧ, эн дузъяв. Тӧдан, тэнад пӧльыд и пӧльыдлӧн пӧльыс вӧралысьясӧн вӧліны, семья-котыр вердысьясӧн. Тэ ӧні он на гӧгӧрво, ичӧт на, а быдман да ачыд кутан кыйсьыны. Сэсся и Катшысыд миян кыйсян пон, Шариктӧ велӧдам и. Шуам, нуӧда ме Катшыстӧ ягӧ, лэптас сійӧ кӧчӧс, увтыштас урӧс, а ме ог лый. Йӧй пӧ менам кӧзяиныс али мый, думыштас понйӧ.

Чӧв олысь пиыс вылӧ видзӧдлӧм бӧрын юаліс:

— Лоан ӧд вӧралысьнас?

— Ог, — нурбыльтіс Федя, — ме художникӧн лоа.

— Но мед... Узь. Гожӧмнас ме тэныд ловъя кӧчпиӧс вая. Найӧс ӧд мамыс чужтас да оз позйын видз. Сідз и котралӧны, турун да коръяс пӧвстӧ дзебсясигтыр. А нёньӧдӧ найӧс оз быть асланыс мамныс, но и мукӧд кӧчьяс тшӧтш, кодлы веськаласны. Коді аддзас, сійӧ и вердӧ кӧчпитӧ, кытчӧдз асьныс оз кутны небыд турун да коръяс йирны. Мунан мукӧддырйи вӧрӧд, а дзик кок увсьыд кепысь ыджда руд кӧчилей чепӧсъяс-звиркнитас! Ичӧтик, а кутшӧм тэрыб! Вот сэтшӧмӧс и вая.

Федялы тшӧтш лои окота батьсӧ бурӧдны. Чеччыліс вольпассьыс да вайис альбомсӧ:

— То, папӧ, тайӧ миян сё арӧса керка-пӧльным. Эзджык эськӧ артмы, но ме аски помала.

Альбом лист вылысь видзӧдіс и збыль пӧрысь пӧль кодь керка: синъяса и ус-тошка, керка вевтыс юркышӧд кодь и. Пукалӧ, быттьӧ, керка-пӧльыс ю дорын да видзӧдӧ мӧдлапӧлӧ, кӧні быдмӧны-шувгӧны том да зумыд пуяс, да казьтылӧ аслас томлун йылысь.

ШКОЛА

Федя радейтіс школасӧ. Ичӧтджык кор вӧлі, шуліс — мамыслӧн школа. А ӧні и сылӧн тшӧтш. И Толиклӧн, и Вералӧн. Школаыс важ, пачьяса, ӧти судта. Йӧрас быдмӧны коркӧя, медводдза велӧдчысьясӧн на садитлӧм пуяс. Бокынджык, пельӧсладорас, гырысь коз да ниа пуяс зымвидзӧны, а ӧшинь улас — кыдзьяс. Ӧні, дерт, найӧ гыӧрзьӧмаӧсь, узьӧны тӧвся унмӧн, а тулыс-гожӧмын школа йӧрыс зэв кыпыд да гажа. Сэки пуяс пӧвстын весиг важ школаыс томмыліс да тшапмыліс, а ӧні дзормӧм латшкӧс пӧчӧ кодь сулаліс, Федялӧн керка кодь жӧ важ да дзуртысь.

Вежӧсыс школаас вӧлі некымын, а велӧдчисны кыкын. Ӧтиас — первой да коймӧд классъяс, мӧдас — мӧд да нёльӧд. Нӧшта ӧти жырйын — библиотека, кытысь позис босьтлыны гортад небӧгъяс, лыддьыны газет-журналъяс, ворсны шашкиӧн. Школа посводзыс вӧлі ыджыд, сэні переменаяс дырйи челядь котралісны да ворсісны. Вӧлі школаын и физкультура жыр. А медся ичӧт жырйыс — велӧдысьяслӧн. Сэні Федялы медся лӧсьыд вӧлі. Кык пызан сайын пукалісны мамыс да Анна Никитична. Пызан вылас — лӧсьыда тэчӧм тетрадь, газет, журнал чукӧръяс, дозмукъясын — ручка-карандашъяс. Дзоляник коймӧд пызан вылын сулалісны чашка-блюдъяс, сакар, кампет да печенньӧ дозъяс, ичӧт электрическӧй самӧвар, а пач вылас — еджыд дзоридзьяса, руалысь гӧрд чайник. Стӧрӧжыс, сійӧ жӧ джоджъяс мыськалысьыс да школа шонтысьыс, кӧть и водз асывсянь ломтӧ пачьяссӧ, кӧдзыд тӧвся лунъясӧ школаыс важысла прамӧясӧ оз и шонавлы. Челядь тшӧкыда пальтоясӧн и пукалӧны урокъяс вылын, кынмӧны, а шонавлӧны сӧмын костъясас, кор пӧсявтӧдзныс котраласны кузь коридорын. Таысь найӧс некод оз дугӧд — мед шонтысьӧны.

Школаын и кружокъяс эмӧсь. Мамыс нуӧдӧ математика да вӧр-ва кружок, Анна Никитична — рисование да драмкружок. Федя пыр чуймалӧ, кыдзи найӧ ставсӧ удитӧны. Ӧтчыд Федя кольччыліс жӧ урокъяс бӧрын, но эз вермы бӧрйыны, кутшӧм кружок вылӧ пырны. Пукаліс велӧдысьяслӧн вежӧсын да видзӧдіс руалысь чайник вылӧ.

— Гашкӧ, чай юан? — казяліс да юаліс мамыс.

— Ог на, бӧрыннас. Мам, видзӧдлы, а тіян чайникныд сарапана.

— Да? — синсӧ чайниклань чӧвтліс мамыс. — Збыль тай, а ме ог и казяв. Талун тэ кутшӧм кружок вылӧ мунан?

— А тэнад кутшӧм?

— Математика.

— А-а, — нюжӧдыштіс Федя, сійӧ эз ёна радейт математикасӧ. — Мӧд классас нӧ мый?

— Рисование сэні талун, — нюммуніс мамыс.

— Вот сэтчӧ и муна! — радлыштіс Федя, босьтіс альбомсӧ да котӧртіс рисование вылӧ.

АННА НИКИТИЧНА

Олӧма нин Анна Никитичнаӧс кытшалӧмаӧсь морт кӧкъямысӧн, кыкнан классьыс пӧшти ставныс. Велӧдысьыс — неыджыд косіник тушаа, дзор юрсиа, синмыс кодь жӧ лӧз платтьӧа — мыйкӧ висьталӧ челядьлы.

— Федя пажнайтӧма да локтӧма, а ми заводитім нин, — шуис велӧдысь.

— Ме эг пажнайт, ме мамкӧд пукалі, учительскӧйын, — дорйысьыштіс зонка.

Коймӧд классаяс видлісны нерсьыны, «мам бӧжӧн» шуасьны, но Анна Никитична ӧдйӧ найӧс ӧлӧдіс. А Толик да Вера — найӧ мыйлакӧ танӧсь жӧ вӧліны — кодсюрӧӧс весиг зутшнитісны. Мыйла ёртъясыс танӧсь, Федя эз гӧгӧрво. Вераыс радейтіс математика, а Толик кӧсйис унджык тӧдмавны вӧр-ва йылысь, сійӧ ӧд узис да аддзис асьсӧ вӧралысьӧн. «Ладнӧ, бӧрыннас юала», — думыштіс зонка да матыстчис на дінӧ. Но Анна Никитична торйӧдіс найӧс: тӧдіс, мый куим ёртлӧн сӧмын сёрнияс лоӧны.

Лӧнисны сэсся, шура-шара лӧсьӧдалісны тетрадь, альбом листъяс, лэпталісны карандаш-краскаяс. Федя дасьтіс жӧ ассьыс выль краска кудсӧ. Кор ставсӧ лӧсьӧдісны, Анна Никитична шыасис челядь дорӧ:

— Талун ми серпасалам тӧв. Коді кыдзи аддзӧ, сідзи и серпасалӧй. Воддза кружок дырйи ми дасьтысим нин талун кежлӧ, сӧмын куим ёртыс эз вӧвны. Заводитӧй, сідзкӧ. Вера да Толя талун медводдзаысь локтісны, а Федя велӧдчан во заводитчӧмсянь нин ветлӧ. Мыйкӧ тай колян кружокас эн волы?

— А ме гортын рисуйтчи, колӧ вӧлі... — шуис Федя да джӧмдіс, оз ӧд висьтав, мый керка-пӧльнас вежон нин ноксьӧ.

— Сідзкӧ, рисуйт, мый кӧсъян, — тшӧктіс велӧдысь.

— Ог, ме тӧвсӧ жӧ кута рисуйтны, — шуис Федя.

Тыдалӧ, тӧвся серпас йылысь и збыль пӧттӧдз нин сёрнитӧмаӧсь мукӧдыс, нинӧм юасьтӧг заводитісны уджавны, а Федялы коліс мыйтакӧ кад, медым син водзас сувтіс тӧвся серпасыс. Но юрас сылӧн чужис нин ӧти мӧвп. Сэн на, учительскӧяс, кор аддзыліс руалысь пӧсь чайниксӧ... И сійӧ копыртіс жӧ юрсӧ парта весьтӧ...

Кружок бӧрын зонка медбӧръяӧн матыстчис велӧдысь дінӧ да сетіс жӧ ассьыс альбом листсӧ. Сэсся матыстчис ёртъяс дінас да юаліс:

— А ті нӧ мый тані вӧчанныд?

— Он мӧй тӧд, Выль во кежлӧ Анна Никитична драмкружоккӧд кутас дасьтыны сьпектак, а рисование вылын ми серпасалам ставсӧ, мый колӧ, сьпектак кежлас: маскаяс, пуяс,.. но ста-а-авсӧ, — нюжӧдыштіс Вера.

Федя нинӧм эз гӧгӧрво да кӧсйис нин юавны велӧдысьлысь, но сійӧ видзӧдіс альбом лист вылӧ. Тайӧ вӧлі Федялӧн серпасыс. Зонка рисуйтӧма кельыдлӧз гыӧра ыджыд ӧшинь, кытчӧ ывласянь, кыдз пу увсянь, видзӧдчис гӧрд морӧса жонь. А ӧшинь таладорас, пызан вылын, сулаліс дзоридзьяса сарапана гӧрд чайник. Быттьӧ тайӧ сарапан вылас и видзӧдіс жоньыс. Серпас улас печатнӧй шыпасъясӧн Федя гижӧма «ТӦВ».

— Федя, а мыйла нӧ чайниксӧ рисуйтін? — юаліс велӧдысь.

— Он мӧй гӧгӧрвоӧй, Анна Никитична? Жоньыс кынмӧма кӧдзыд ывлаас. А чайникыс — аддзанныд — дзоридзьяса. Жоньыс на вылӧ видзӧдӧ да чайтӧ, мый тайӧ дзоридзьяса видз, а чайникыс сылы шонді кодь. Сійӧ ӧд гожӧм йылысь мӧвпалӧ — жоньыс! Анна Никитична?!

— Но, инӧсь... Мича тай, молодеч! Гӧрд морӧса жонь, гӧрд чайник-шонді, еджыд дзоридзьяс... Лӧсьыд. «5» тэныд эськӧ пукті урок вылын. Но мед абу кӧ урок, «5» и пукта, Федя.

Сэсся найӧ — Федя, мамыс да Анна Никитична, юисны дзоридзьяса чайникысь пӧсь чай. Анна Никитична сёрнитіс Федялӧн серпас йылысь:

— Татьяна Васильевна, Федяыдлы кӧ эськӧ художественнӧй школаӧ, эн мӧвпыштлы?

— Кысь нӧ эг. Батьыскӧд сёрнитлім и. Мунам, мися, кӧть Джуджыдъягӧ, посёлокас. Сэні ӧд эм художественнӧй школаыс. И абу лёк, ошкӧны. Да вӧрзяс-ӧ кытчӧкӧ миян папным? Да, Федя? Оз кӧсйы эновтны ассьыс грездсӧ ни пармасӧ.

— А ме ог жӧ кӧсйы, тані зэв гажа, — папыс дор жӧ сувтіс Федя.

— Со ӧд, сёрнитчӧмаӧсь! — ӧвтыштіс кинас мамыс.

«Мыйла быть мунны кытчӧкӧ? Абу мӧй тані лӧсьыд? А рисуйтчынытӧ ме и гортын верма», — мӧвпаліс ас кежсьыс зонка. Пӧрысь пӧльыслӧн важ керкаыс жаль лои и. Гажтӧмтчис весиг Федя, быттьӧ мунӧмны нин.

НЕРӦД ДА ГӦРӦД

Ниакерӧс грездын кусӧдісны би. Некымын лун нин эз вӧв. Федялӧн бать-мамыс майшасьӧны: электричествотӧгыс нинӧм он вӧч. Тӧвнад водз, час витын, пемыд нин, он бара некытчӧ петав, телевизор он видзӧд, утюг ни плитка он ломзьӧд. Рытнас, карасина лампа пестігӧн, мамыс, кылӧ, броткӧ:

— Со ӧд, пемыд гуын моз олам. Быттьӧ важ дырйи. Он и шу, мый кутшӧмкӧ дас во мысти выль нэм заводитчас. Быдлаын гырысь сикт-посёлокъясын биыс эм, сӧмын ичӧт грездын быттьӧ оз йӧз овны, а кывтӧм пемӧсъяс. Школаын тадзтӧ челядь синтӧммасны. Асывнас локтасны да пемыд на, бӧръя урокъяс кежлас и югдыштӧ. Лун шӧр бӧрын ывла вылын муртса и ворсыштасны — гортӧ нин колӧ пырны. А гортаныс мый вӧчны, карасиныс ӧд весиг абу быдӧнлӧн, кӧть важ моз сартас ломзьӧд.

А Федялы весиг на и лӧсьыд тадзсӧ. Сійӧ куйлӧ паччӧр вылын да видзӧдӧ дзузган билӧн югӧр вылӧ. Сылӧн вӧрзьыштӧмысь стенъясын быдсяма вуджӧръяс петкӧдчӧны, дзик ловъяӧсь быттьӧ. Мойдын моз Федя наысь быдторсӧ аддзӧ. Рытнас, сёйӧм бӧрын, унатор йылысь сёрнитӧны. Мамыс Федялы мойдӧ. Мукӧд лунӧ кӧ, зурасисны телевизорӧ да син вештытӧг сэтчӧ и видзӧдісны.

Мамыс ноксьӧ пачводзын, чӧв олысь Федяӧс чайтӧ узьӧмӧн да дӧзмӧмпырысь шуалӧ папыслы:

— Кор нин шулі, Петя, вай мунам кӧть Джуджыдъягӧ, карӧ кӧ он кӧсйы. Ӧні эськӧ пемыдінын эг олӧй.

— Кодлыкӧ и тані колӧ овны, ставӧн ӧд каръясӧ ог пышъялӧй, — кыв сетіс папыс. — Тадзтӧ став вужъясыс оръясясны, став рӧдыс бырас.

— Кодлы нӧ колӧ тэнад рӧдыд, кор сиктыс эндіс нин, регыд и йӧзыс эндасны. Со кыдзи юсисны уджтӧгыд.

— Юсьыны кӧ — и каръясын юӧны. Кадыс ӧні сэтшӧм. Став Россияыс доймӧм йӧра моз ружтӧ. И миян Коми муным гуысь кадысь водз петӧм ош моз шӧйтӧ, ин оз аддзы. Пышъялам сэсся каръясӧ... А гашкӧ, Танюш, ми кодь йӧзыс, ичӧт грездъясын олысьясыс, олӧмсӧ кутысьясыс и эмӧсь?

— Кысь нин, лойсям тані, а некод миян йылысь оз и тӧд. Вот вӧліны пӧ татшӧмъяс да бырины, некутшӧм кок туй эз кольны.

— Кыдз нӧ оз кольны? А челядь, а внукъяс? Пӧль-пӧчӧн шуысьяс?

— Челядь? Феняыд бокын, интернатын. Федя кымынкӧ во мысти сэтчӧ жӧ веськалас. Ог и кутӧй аддзывны дитяясӧс. Мыйӧ тэ найӧс верман велӧдны? Пиыдлӧн рисуйтчан сям эм, водзӧ велӧдны колӧ.

— Мый сыысь? Мужик мортлы колӧ лоны семья-котыр вердысьӧн. Быдмас да рисуйтчӧмыс сылӧн вунӧ.

— Ен мед видзас. Тадзи бать морт он жӧ шу... — скӧрмыштіс быдӧн мамыс, сэсся чӧв олыштӧм бӧрын водзӧ шыасис: — Ачыд тӧдан — питӧ бурдӧдны колӧ, а тані став висьӧмсӧ ӧти пельшӧр бурдӧдӧ. Федялысь ӧд куим во сайын на нерӧд пыкӧсъяссӧ аддзисны, вирыс лёк вӧлі и. Карын кӧ, важӧн нин бурдӧдісны. Ньӧти сылы кынтӧдчыны да висьны оз позь, вирыс пӧ пыр и лёкмас.

Мамыс нырнас шлюпнитіс да ланьтіс.

— Но, но, эн бӧрд, — такӧдыштіс сійӧс папыс. — Эн шогсьы, быдмыштас да ёнмас. Ассьыс босьтас. Мед ёнджык ывла вылын котралӧ дай, сэки озджык вись. Вӧр-ваыс и бурдӧдас.

Федялы вӧлі тешкодь кывзыны ас йывсьыс. Кутшӧмкӧ нерӧд... Мый пӧ сійӧ и эм? Сьыліас да киняулас тай шмакъясыс? Найӧс мамыс висигас видлавлӧ: эз-ӧ быдмыны. Федя сідзсӧ папыскӧд сӧглас: мукӧддырйи эз эськӧ и пырав гортас, ывла вылас сэтшӧм лӧсьыд. Ӧні Толиккӧд лым чом вӧчӧны. Пемдӧм бӧрас кӧть оз на пыр, да мамыс оз лэдз дыр ывлаас овны: кынман пӧ, висьман...

Мамыс, кылӧ, бара на шыасис:

— Вай, Петя, кор Феняыдла каникул кежлас ветлан, юасьлы сэні удж да патера. Гашкӧ, гожӧмнас мунам да?

— Кадыс петкӧдлас, — бара дженьыда кыв сетіс папыс.

— Сэсся ӧд гӧрӧд нин гӧрддзасьӧма, гожӧмнас семьяным содӧ, выль лов лоӧ. Сы йылысь тшӧтш думайтны колӧ. Марпа пӧч пӧрысьмис, нёрпалӧ, ӧдвакӧ вермас отсасьны. Ойя да ойя, гӧгӧр дзескыд, да нӧшта битӧгыс на... Дзурс пемыдын лоӧ Выль во пасйыны. Школаын мойд серти ворсӧм кӧсъям дасьтыны, а пемыдас кыдзи?

Мамыс мыйкӧ висьталіс на, но зонкаӧс кутіс вугрӧдлыны шоныд паччӧрас. «Нерӧд-гӧрӧд,.. — шуавсис ас кежсьыс, — нерӧдыс — сійӧ шмакъясыс. А гӧрӧдыс? Мамлысь колӧ юавны». Тадзи думыштіс, да и унмовсис.

ЛЫМ ЁКМЫЛЬ

Мамыс Федяӧс пинялӧ лым сёйӧмысь. А лымйыс сэтшӧм чӧскыд: ыркыд, вомад сылыштас да нӧшта на чӧскыдджыкӧн кажитчӧ. Видзӧдӧ зонка мамыс вылӧ, оз гӧгӧрво, мыйысь сійӧс видӧны.

— Мам, а тэ ачыд видлы, нюлышт кепыссьыд, ок ӧд чӧскыд!

Мамыс татчӧ нинӧм эз куж шуны. Сэсся босьтыштіс кепысяс неуна лымсӧ да нюлыштіс, вомас кутыштіс да бӧр сьӧлыштіс. Мый пӧ сэн чӧскыдыс? Сэсся мыйкӧ дум вылас воис. Тшӧктіс пиыслы лым ёкмыльсӧ босьтны да гортас пыртны. Федялы тешкодь лои, но кывзысис. Гортас мамыс тшӧктіс лымсӧ пуктыны тасьтіӧ да виччысьны сылӧмсӧ. Федя пӧрччысис, пуксис улӧс вылас да кутіс виччысьны. Мудзис весиг, а лымйыс зэв ньӧжйӧ сылӧ. Аслыс тешкодь, мый водзӧ лоӧ?

Коркӧ сэсся лымйыс сыліс жӧ. Татьяна Васильевна матыстіс тасьтісӧ югыдлань да корис писӧ видзӧдлыны сэтчӧ. А сэні, сылӧм ваас, кутшӧмкӧ посни ёг да гӧнторъяс гӧвкъялӧны. Со ӧд мый, вӧлӧм, сёйӧ! Кыдз сӧмын кынӧмыс абу висьмӧма. «Мӧдысь бара туй боксьыс ог сёй, кыськӧ бокысь сӧстӧм лымсӧ корся», — думыштіс зонка наяна. Ачыс мудера мамыс вылӧ видзӧдӧ — тэ пӧ сюсь, а ме тэысь сюсьджык. А мамыс чайтіс, мый сылӧн кывъясыс мӧрччисны пиыслы да ӧні оз нин кут сёйны лымсӧ.

Но Федя вӧчис ас ногыс. Мӧд лунас собис пыдӧ лым пиас, вылыс лымсӧ бокӧ вештіс, а улісьыс бара апыштіс. Но и чӧскыд! Тані некутшӧм ёг нин абу, кӧть мыйта сёй. Апаліс, кытчӧдз вом пытшкыс эз кынмы да горшас кӧдзыдыс эз самась.

А аскинас Федялы мыйкӧ лёк лои: юрыс висис, горшыс да морӧсыс сотчисны, чеччыны выныс эз вӧв. Мамыс удж вылӧ нин мӧдӧдчӧ, а зонка пыр на куйлӧ.

— Чеччы, пиук, мыйкӧ талун дышӧдчан? Школаад сёрман.

— Ог мун некытчӧ, — чирӧм гӧлӧсӧн шуис Федя да бергӧдчис стенлань.

— Эн-ӧ висьмы, мыйкӧ тешкодь тэ талун? — мамыс матыстчис вольпась дінас да видліс Федялысь плешсӧ. — Но, биа тай плешкыд, мый и вӧчны?

Сэсся дасьтіс пиыслы ӧмидз варенньӧа пӧсь чай, пуктіс вольпась дінас, тшӧктіс куйлыны да виччысьны Марпа бабӧс.

— Ме вӧзйыся удж вылысь, пельшӧрла пырала, мед тэ дорӧ волас.

Марпа пӧчӧс виччысигмоз Федя видліс юны чайсӧ, но горшыс доймис да весиг радейтана ӧмидз варенньӧыс эз ков.

Регыд и бабыс локтіс, мырдӧн юкталіс чайнас да тшӧктіс узьыштны, пӧсялан пӧ да жарыс чиныштас. Ачыс босьтчис дасьтыны сьӧрсьыс вайӧм турунъясысь бурдӧдчан ва. Федя и збыль вугыртіс, но кажитчис, куйлӧ быттьӧ ыджыд пӧсь из вылын, вешъяс сэсь да мӧд из вылӧ веськалас, быдсӧн сотыштас. Сэсся быттьӧ юӧ веськалас, кӧдзыд ваӧ — кынмыны кутас. Сідз вочасӧн то пӧсявліс, то кынмис.Паляліс да — дзик сулик ва.

Мамыс пельшӧркӧд буретш воӧмаӧсь. Пельшӧрыс мыськис кисӧ, матыстчис висьысь дінӧ, видзӧдліс горшсӧ, видлаліс гӧгӧрбок да шуис:

— Ангина тай кӧвъясьӧма.

Сэсся югъялысь кӧрт кӧрӧбысь перйис мыйкӧ да юаліс:

— Уколсьыс ӧд он пов, ыджыд нин да?

Федялӧн сьӧлӧмыс ыркмунліс, кӧсйис дзебсьыны эшкын улас, но яндзим лоис да збодеракодь шуис:

— Ог, дерт, пов.

Но кор аддзис матыстчысь пельшӧр киысь кузь да ёсь емсӧ, муртса эз горӧд, мурч курччис вом дорсӧ да ляскысис юрлӧс бердас. Эз бӧрддзы.

— Тэ тай молодеч вӧлӧмыд. Со уколсӧ и сюйи. Кута кыкысь лун волыны, зэв нин ёна горшыд пыктӧма, — тайӧс шуӧм бӧрын пельшӧр матыстчис мамыс дорӧ, мыйкӧ сылы шуис да муніс.

А Федя сідз и куйліс вӧрзьӧдчытӧг, сэсся юаліс:

— Мам, муніс тай пельшӧрыс, мудзи ӧд, уколсӧ нӧ кор бӧр перъяс? Сюйнысӧ сюйис, а бӧрсӧ эз и перйы?

— Со ӧд, шмонитны на вермӧ, кывзысьтӧмыд, — нюммуніс мамыс, шебрыштіс писӧ да юаліс: — Лымсӧ ӧд бара сёйин?

— Сёйи, — ышловзис зонка.

— Но, сідзкӧ, и пукалан гортын лун дас ывлаӧ петавтӧг, гашкӧ, лым кӧрсӧ вунӧдан сэсся.

ФЕДЯЛӦН ПАС

Ковмис Федялы Марпа пӧчкӧд лунйыны. Пукаліс да рисуйтчис. Серпасаліс паськыд вома ыджыд лым ёкмыль, а орччӧн — ичӧтик детинкаӧс.

— Мый нӧ тайӧ? — юасьӧ пӧч.

— Тайӧ лым ёкмыльыс кӧсйӧ менӧ сёйны, а ме ӧд, бабӧ, ог сетчы, пышъя...

— Сідз, сідз, кагук, пышйин нин, да ӧні бурдан, — кыв сетӧ Марпа пӧч. — Часлы, ёртъясыд воласны да гажаджык лоӧ.

Федялӧн лун вит нин висис горшыс. Сӧмын квайтӧдас сы дорӧ лэдзисны ёртъяссӧ. Найӧ пыригмозыс кыдз тай заводитісны ошйысьны.

— А миян школаад, Федя, мый лоӧ! — наяна паніс сёрнисӧ сырчик кодь Вера.

— Да, тэ бурдан да волы, — содтіс Толик. — Ок и сьпектак ми пуктам!

— А паськӧмыс! Ставсӧ асьным вӧчалам, — водзӧ висьталӧ нывка.

— А этійӧ... Кыдз нӧ, Вера? Де... де... — мыкталігмоз шуис Толик.

— Де-ко-ра-ция, — отсаліс сылы Вера.

— Мый нӧ сійӧ? — юасьӧ Федя.

— А сійӧ — ставыс, мый кытшалӧ ворсысьясӧс: пуяс, керка, мыр...

— Ставсӧ пыртланныд али мый? — шензьӧ Федя.

— Огӧ жӧ, — серӧктіс Вера да висьталіс водзӧ, — ми ставсӧ вӧчалам бедьясысь да картонысь. Сэсся уна рӧма краскаясӧн мавтам. Ок, регыд миян красканым бырӧ! Федя, вайлы ассьыд тшӧтш. Ачыд волы и. Виччысям.

Сідз эськӧ и китшкис Вера катша моз, эз кӧ Толик сёрниӧ сюйсьы. Сылӧн Федяысь гажыс бырӧма жӧ.

— А ме, Федя, ошкӧс кута ворсны. Пасьӧс гугӧда, маскаася — дзик пӧ ош кодь. Сӧмын кывъясыс пыр вунӧны. Сэки ме мурза ош моз, а мамыд, Татьяна Васильевна, да Анна Никитична сералӧны. Некыдз ог велав кывъяссӧ шуавны.

— Дерт, он велав, лыддьысьнытӧ он куж да, — сюйсьӧ Вера. — Став кывсӧ ӧд миянлы гижалісны, а тайӧ... Тольыс шыбитіс. Дыш лыддьынысӧ да.

— Эг шыбит, вошті, — дорйысьӧ Толик, но бан бокъясыс гӧрдӧдӧны.

Дыр на эськӧ вензисны, эз кӧ Федялӧн мамыс пызан сайӧ кор найӧс ӧмидза варенньӧӧн чай юны.

Мунісны сэсся ёртъясыс, а Федя кутіс мӧвпавны, кыдзи ӧдйӧджык школаас ветлыны да ас синмӧн видзӧдлыны, мый сэні челядь вӧчӧны. Но ывлаас кӧдзыдысла пашляк лыйсис, пуяс трачкӧдчисны. Дерт, мамыс оз на лэдз. Ворсыштны весиг эз на петавлы ывлаас. Асывсяньыс Марпа пӧч кыйӧдчис. Сэсся бать-мамыс удж вывсьыс волісны. И тадзи лунысь-лун.

Коркӧ рытнас Федя ӧтнасӧн колис. Мамыс школаӧ муніс. Мыйсюрӧ пӧ Анна Никитичнакӧд вӧчыштны колӧ, медым удитны Выль воӧдз. Батьыс петіс жӧ бӧра-водз суседъясӧ. А Федялы тайӧ и коліс. Ӧдйӧ пасьтасис, буркиасис да петіс ывлаӧ. Пемыд! Кодзувъяс сӧмын югдӧдыштӧны ывласӧ. Бисӧ ӧд эз на сетны Ниакерӧсын. Ни ӧти сюръя вылын би абу.

Федя сетчис чорзьӧм ордымӧд школалань. Абу эськӧ и ылын сійӧ, а пемыд рытнад гажтӧмкодь. Мыйкӧ и понъяс увтӧны. Гашкӧ, кӧинъяс матынӧсь? Катшыс да Шарик кӧнкӧ бокын шӧйтӧны и, оз небось мыччысьны, кор колӧ. Дерт, батьыс бӧрся вӧтчисны. И сэтшӧм шуштӧм лои Федялы, мый весиг кунис синъяссӧ да сідз мыйтакӧ котӧртіс туй кузя. И друг — тронс! — зурасис кытчӧкӧ. Синсӧ восьтіс да гӧгӧрвоис: дзик туй бокас сулалысь пес чипасӧ люкасьӧма. Нюлыштіс вом дорсӧ — сола. Кепысьсӧ пӧрччис да видліс кинас: вир тай петӧ! И вом дорыс доймӧ!

Школа ӧшиньясысь карасина лампа биыс тыдаліс нин. Сэтчӧ! Мамыс дорӧ! Эз и тӧдлы, кыдзи кепысьнас вом дорсӧ топӧдӧмӧн воис школаӧдз да пырис велӧдысьяслӧн вежӧсӧ. Дерт, мамыс пинявтӧг эз ов. Гортсьыс юасьтӧг петіс, да нӧшта на и доймис.

— Мыйсяма тэ детинка, — майшасис мамыс пиыслысь чужӧмсӧ мыськигмоз. — Век тэд мыйкӧ кӧвъясьӧма! Шудыс абу кӧ тэкӧд чужлӧма-а?

— Эн шогсьы, Татьяна Васильевна. Пиыд ачыс на шудсӧ шедӧдас. Оз ков сэтшӧма майшасьны. Быдмиганыс ставӧн и висьлӧны, и доймылӧны, — такӧдіс мамсӧ Анна Никитична. — Вай, бурджык, гортӧ мӧдӧдчам, сёр нин. А мый нӧ, Федя, вой кежлас локтін?

— Кӧсйи де... декорациясӧ видзӧдлыны, — ымӧстӧм сорӧн ӧдва и артмис зонкалӧн сьӧкыд кывйыс.

Вом дорыс Федялӧн ӧдйӧ и бурдіс, но колис «к» шыпас кодь вурыс. Сідзкӧ, паса лои Федя. «К» — Карманов. Он тай сорлав.

ФЕНЯ

Ниакерӧсын сетісны би! Выль во водзын нин. Карасина турунвиж лампа бӧр аддзис ассьыс ин — посводзысь джадж. Дыр-ӧ кежлӧ? Но колис сійӧ Федялӧн альбом лист вылӧ: быттьӧ мойдысь турунвиж сарапана ныв ӧвтчӧ гӧрдоввиж чышъянторйӧн.

Би сетӧм бӧрын рытъяссӧ бара кутісны коллявны телевизор дорын. Эз нин бать-мамыслысь висьт-мойдъяссӧ Федя кывзы, а видзӧдіс телевизорысь океансайса, ылі Америкаса «Дисней-Лендлысь» быдсяма мультикъяс. Сэтчӧс олысьяссӧ Федя серпасаліс жӧ.

— Со ӧд, ӧнія олӧмсӧ телевизорысь и аддзылам, а асьным сьӧд вӧр шӧрын олам, — шулывліс мамыс.

Джуджыдъягӧ мунӧм йылысь сёрнияс сійӧ эз на помав.

— Феняла ветла да пырала, кытчӧ колӧ, юася. Танюш, а код нӧ ӧні миянлы патерасӧ сетас? А? Ӧні ӧд патератӧ колӧ ньӧбны, а сійӧ ок и дона сулалӧ. Миян нэмнас татшӧм сьӧмыс эз вӧв, — шыасьӧ батьыс, мед сӧмын мамыс оз нин казьтыв Джуджыдъягӧ мунӧм йылысь.

Сэсся и тӧвся каникул вылӧ лэдзалісны, и Федялӧн батьыс мӧдӧдчис интернатӧ Феняла, сыкӧд тшӧтш и мукӧд гырысьджык нывкаӧс да зонкаӧс, морт дасӧс, кӧсйис вайны. «Кытчӧ и тӧрасны та мындаыс ӧти доддяс?» — батьсӧ кильчӧ вылӧ колльӧдігмоз мӧвпаліс Федя. Ачыс на вӧзйысьліс, да папыс ӧлӧдіс: шондӧдас пӧ да ветлам тэкӧд.

Лунтыр сэсся и виччысис, пемдытӧдзыс пыр петавліс ывла вылӧ: оз-ӧ на тыдавны? Сэсся ворсӧмнас ылаліс да ӧвсис. Та рытӧ эз на локны.

Мӧд луннас нин воисны папыс Феняыскӧд. Ок и топӧдліс ӧти кинас чойыс ичӧтджык воксӧ, мӧднас питшӧгас мыйкӧ кутіс. Ачыс банйӧма чизыр тӧвсьыс, быттьӧ нюжалыштӧма весиг, омӧльтчыштӧма да. Збыльысь, тыдалӧ, гажтӧмтчӧма.

— А кодӧс ме тэныд вайи, вокӧ!

Питшӧгас вокыскӧд топӧдчылігӧн на кутшӧмкӧ ёкмыль вӧрзьыштіс да чипӧстіс.

— Тӧдмав, ноко, коді тані? — водзӧ юасьӧ Феня.

Но Федя эз на удит вочавидзны, кыдзи чойыслӧн пальто морӧсысь быльс петіс еджыд усъяса ичӧтик юр.

— Каньпи, Феня, каньпи! Кытысь нӧ?

— Тайӧ миян интернатысь Муркалӧн пиыс. Нӧшта кык вӧлі, да босьталісны жӧ гортаныс. Налы! Ме пӧрччысся.

И Феня перйис питшӧгсьыс да сетіс вокыслы повзьӧмысла пашкыртчӧм гӧна, еджыд ныр-вома да кокъяса, чушкысь руд каньпиӧс, а ачыс ӧдйӧ пӧрччис пальто-шапкасӧ, шоныд пимисӧ.

Джинсы гачнас да шоныд гӧна свитернас чойыс дзик зонкалань муніс. Эз кӧ мышкас нюжвидзны шабді рӧма кык кӧсаыс, зонка кодь и эм. Ныр йылас Федялӧн моз жӧ кымынкӧ кельыд берин, нырыс ичӧт да чангыль. Кынмӧма, да мамыс тшӧктіс паччӧрӧ кайны. Федя каньпикӧд — сы бӧрся.

— Ок и гаж быри тіянысь! Марпа бабысь тшӧтш и. Кӧні нӧ сійӧ? Гортас? А Толикыс пыр сы ордын? Мый нӧ оз волыны? — дзик сырчик Вера моз кутіс дзользьыны Феня. — Вокӧ, а тэ век рисуйтчан? Мый нӧ выльсӧ серпасалін? А ми ӧд папыдкӧд тэныд выль альбом вайим. Важсӧ, дерт, тыртін нин?

Кӧть Феня нёль арӧн вӧлі ыджыдджык воксьыс, ӧні быттьӧ ӧткодьӧсь лоины. Гажныс бырӧма ӧта-мӧдсьыс, да помся таргисны-сёрнитісны паччӧрас. Каньпи сэні жӧ нювсис, лӧсьӧдіс-мольӧдіс сувтӧм гӧнсӧ да небыдика мургис.

— Челядь, локтӧй нин, нуръясьыштӧй. Федя, мый нӧ туй выв мортсӧ сы дыра ылӧдлан, мед сёйыштас. Ачыд лэччы жӧ, — кыліс мамыслӧн гӧлӧсыс.

— Ойя дай, гажӧй бырӧма гортса сёянысь, — Феняӧс мӧдысь корны эз ков, пыр и лэччис паччӧрысь. Федя эз жӧ кольччы.

Би улас нин Феня чӧвтліс синсӧ вокыслань да чуймис:

— Федя! Ой! А тэ тай паса лоӧмыд?

Аддзӧма вокыслысь «к» шыпас сяма вурыссӧ.

— Бурдас! Папыд шуис: вурысъясыд пӧ сӧмын мичмӧдӧны мужикъясӧс, — ӧвтыштіс кинас Федя да меститчис пызан сайӧ.

И выль ловлы — каньпилы — сюри аслас сёянін: пач дорын блюдйӧ сылы кисьтісны юква да пуктісны тшӧтш небыд чери тор.

— Папыдлы гымгаас бура чериыс шедӧма. Ёкышъяссьыс юква пуи. Со — налима черинянь. А сирсӧ солышті, — чӧсмӧдлӧ мамыс челядьӧс, ёнджыкасӧ, дерт, нывсӧ, кодлы каникулсянь каникулӧдз оз сюрлы гортса сёяныс. — А чай юигкежлӧ Фенялысь радейтана чӧдъя шаньга пӧжышті.

Ставӧн чӧскыдпырысь нуръясисны чериӧн. И папыс дӧвӧль пукаліс: вӧлӧма на Фенялӧн шудыс. Сылы вылӧ ӧд и кыйӧма черисӧ, мед чӧсмасяс нылыс интернатса рокъяс бӧрас гортса чӧскыд вӧлӧгаӧн.

А чоя-вока водтӧдзныс эз вермыны торйӧдчыны ӧта-мӧдсьыс. То альбом видлалісны, то быдтор йывсьыс сёрнитісны, то каньпикӧд ворсісны. Нимтісны сійӧс Рудукӧн. Каньпиыскӧд ӧтлаын и водісны сэсся паччӧрас. Федя юаліс бӧръяпомыс чойыслысь:

— Феня, а Джуджыдъягас кӧ ми вуджам, оз ло жаль Ниакерӧсыд?

— Жаль эськӧ да. Но сэні, Федя, абу жӧ гажтӧм. Мӧдарӧ на — Ниакерӧс серти зэв на и гажа. Быдторйыс эм: ыджыд школа, клуб, керкаясын газ ломтысьӧ, ва локтӧ, оз нин ковмы мамлы да батьлы пескӧн-ваӧн ноксьыны, Изъяюысь карнанӧн кыскавны.

— А тэ эськӧ мунін Ниакерӧсысь сэтчӧ, посёлокас?

— А мый нӧ ог? Став йӧзыс каръясӧ да гырысь посёлокӧ нин муналісны, а ми... Ме сэні йӧктан кружокӧ ветла, ансамбльын кӧсъя йӧктыны. Эм миян школаын сэтшӧмыс: сьылӧны и йӧктӧны. Сыктывкарӧ нин ветлісны фестивальяс вылӧ. Сэтчӧ кӧ ӧтчыд кӧть веськавны! А сэсся — Москваӧ, а гашкӧ, ылі странаясӧ на ветлыны, — дзикӧдз ылаліс Феня да нинӧм абусӧ заводитіс мӧвпавны. — Ок, Федя, ставсӧ меным окота аддзывны! А мый тані — Ниакерӧсын? Куш нимыс и мича... А татчӧ, вокӧ, гожӧмнас эськӧ кутім волывлыны. Керканым ӧд кольӧ. Кылан, Федя? Э-э, Федул, унмовсин али мый? Но вот, узьӧ сы ни садь.

Но вокыс эз узь. Сійӧ чӧв оліс да некыдз эз вермы эскыны, мый налӧн Ниакерӧс серти кӧнкӧ вермас лоны бурджык, гажаджык да мичаджык.

ВЫЛЬ ВО, А СТАВЫС ВАЖ

Сьпектак кежлӧ школаӧ, гашкӧ, грездыс ставнас локтіс. Ӧдва и тӧрисны. Кодкӧлунӧ Федя казяліс, мый сыысь гусьӧнмоз быттьӧ гортас сёрнияс мунӧны. Феня папыскӧд гоз-мӧдысь ветлісны кытчӧкӧ. Эз и висьтасьны. Школаын сьпектак заводитчӧм виччысигӧн Федя юрнас ӧтарӧ-мӧдарӧ бергӧдліс, но папыс да чойыс бара кытчӧкӧ вошины, эз пукавны йӧз пӧвстын.

Класс шӧрын сулаліс коз. Гортас найӧ пуктісны жӧ ичӧтикӧс, а тайӧ джуджыд вӧлі — йиркӧдзыс судзис. Сэсся видзӧдісны челядьлысь ворсӧмсӧ. Збыль тай быдторсӧ вӧчалӧмаӧсь челядь да велӧдысьяс ас киясӧн. А Федя эз удит: лым ёкмыльыс сійӧс торкис, висьмӧдіс. Картонысь клеитӧмаӧсь да серпасалӧмаӧсь чом. Сэні и пу сулаліс. А джексӧ кабалаӧн кышӧмаӧсь, да дзик мыр кодь. «Тайӧ, сідзкӧ, декорацияыс и эм?» — мӧвпаліс Федя. А сьпектакын медся збоя ворсіс Вера. Сійӧ вӧлі ручӧн. Руч ныр-вом и пысалӧма чужӧмас. Сёрни да вӧсни гӧлӧс сертиыс Федя и тӧдмаліс нывъёртсӧ. Збыль, руч моз наяна и ворсіс. Артисткаыд! Вот тэд и сырчик! А бӧжнас кыдз легйӧдлӧ!

А Толикыс! Ставӧн вак-вакӧн сералісны ошкӧс аддзӧм бӧрын. Збыль тай ёнджыкасӧ мурзӧ, кывъяссӧ бура абу велӧдӧма да. Гоз-мӧдысь весиг Вера сылы шӧпнитліс. Ӧтчыдсӧ Толик эз кыв да сылань бергӧдчӧмӧн «А-а?!» — гораа юаліс. Сэтчӧ муртса ставӧн улӧсъяс вылысь эз гылавны, сэтшӧма серамныс петіс. Но мойдас ошкыс вӧлі шань: сійӧ дорйис вӧрса посни пемӧсъясӧс, кодъясӧс ылӧдліс наян да горш руч. Сійӧн эз быттьӧ и казявны, мый ошлӧн вунласьӧны кывъясыс да помся мурзӧ. Тайкӧ сёяс! А сэсся мойд помас и ручыс тӧлксяммис, ставӧн бурасисны да кутісны йӧктыны да сьывны.

И друг... ӧдзӧсӧ гораа таркнитісны. Ставӧн бергӧдчисны. А ӧдзӧс воссис да пырисны ыджыд, еджыд ус-тошка Кӧдзыд пӧль да сы серти ёна ичӧт, кузь шабді кӧсаяса Лым ныв. Феня! — муртса эз горӧд Федя, чойсӧ тӧдӧм бӧрын. Дзик ловъя Снегурочка — Лым ныв. Сэтшӧм лӧсьыда сёрнитӧ, сьылӧ да йӧктӧ. Кӧдзыд пӧль этшаджык сёрнитіс, но гӧлӧсыс тӧдса жӧ вӧлі. Папыс кӧ-а? Сійӧ и эм. Гусьӧн ставсӧ вӧчисны-дасьтісны, Федялы эз и висьтавны, — скӧраліс зонка. А Кӧдзыд пӧль да Лым ныв корисны ставнысӧ гажӧдчыны мичмӧдӧм коз дорын, медбура сьылысьяслы, йӧктысьяслы да кывбур висьталысьяслы сеталісны ичӧтик козинъяс. Федялы кывбур висьталӧмысь вичмис жӧ козин — Сӧлӧ баблӧн мойдъяса небӧг.

Школаысь пемдігас нин разӧдчисны. Федяяс гортас сёрнитісны на Выль вося гаж да ворсӧм йылысь.

— Но, кыдз Кӧдзыд пӧльыс? — юасьӧ папыс.

— А ме тэнӧ, папӧ, эг дзик пыр тӧд, — вочавидзӧ пиыс. — Сюсьӧсь! Меысь гусьӧн, кӧмӧдінныд! А Феня! Дзик збыль Снегурочка кодь и вӧлі. А Толикӧс кыдз сералісны!

Федя сэсся рытывбыд виччысис Выль волысь воӧмсӧ. Но мудзис да эз и тӧдлы — унмовссьӧма. Вӧталіс мича мойдъяс.

Садьмис да асыв нин. Узьсьӧма! Эз и тӧдлы, эз и аддзыв Выль воыслысь воӧмсӧ. Феня со стынитӧ-узьӧ. Небось, вой шӧрӧдз эз вод — виччысис да аддзыліс.

— Выль воӧн, пиук! — казялісны садьмӧмсӧ да чолӧмалісны бать-мамыс. — Медым тайӧ воыс тэныд ваяс сӧмын шуд!

А Федя котӧрӧн матыстчис ӧшинь дорӧ да гыӧрас пӧльыштӧм бӧрын видзӧдліс ывлаӧ. Мый сэні? Мый вежсьӧма? Но сэні... ставыс вӧлі важкодь. Гӧгӧр тыдаліс еджыд лымйысь вольӧс. Лым туктаяс улӧ дзебсьӧмӧн чӧла сулалісны пӧрысь ниа пуяс. Кыркӧтш улын тыдаліс кыз йиӧн дорӧм ю чукыльыс... Катшыс да Шарик увтышталӧны. Ставыс важ ног! Нинӧм абу вежсьӧма... А воыс — выль.

ЙИА ЧОЙ

Федя сулаліс ӧшинь дорын, гыӧра стеклӧ пыр — пӧльыштас, ниртыштас да бара — видзӧдіс ывла вылӧ да дзайгис мамыслысь:

— М-а-м, лэдзлы ывлаас, ылӧ ӧд ог мун!

Мамыс чӧв оліс, Федялань весиг синсӧ эз чӧвтлы.

— Но, мам, петала, но?

— Ме тэд шулі: ог лэдз, эн няргы. Ачыд кӧсйысян горт дорын ворсны, а пыр сэтчӧ мунан, чой дорас. А дойман кӧ сэні? Вом дор пастӧ вунӧдін нин?

Йиа чойыс ёна корис ас дінас Федяӧс — лок пӧ, видзӧдлы, кутшӧм ме шыльыд да крут.

Выль во бӧрын шондӧдліс да интернатысь каникул вылӧ воӧм челядь вошласисны грезд сайын. Сэтчӧс джуджыд чой дорын пондіс пуны удж: зонкаяс весалісны лым, вӧчисны мыйкӧ ворга сямаӧс, кыскалісны сэтчӧ ва да бура киськалісны. Лун-мӧд мысти кӧдздӧдіс, воргаыс бура йизис. Челядьлӧн удж эштіс.

Федя коддьӧм зонпоснисӧ сэтчӧ эз лэдзлыны, но кодсюрӧ сэні жӧ бергалісны, гырысьяслӧн кок уланыс гартчисны. А ёна и крут чойыс — видзӧднысӧ полан. Дзик скӧт карта потшӧс дорӧдз шылькмунӧма, дзирдалӧ тӧвся шонді улын.

Кымын зонка исковтігас дадьнас тімбыльтчыліс да увлань тутліс. Федяӧс йирмӧг весиг босьтліс. Ышловзяс да мунас Толик ёртыскӧд асланыс ичӧтик чой дінӧ. Дзопкана сійӧ чойыс, а сьӧлӧмыд весиг оз ыркмунлы. Толик чикъялӧ радысла, исковтас да бара. Федя дӧзмыліс сы вылӧ: мый и радлӧ? А мӧдыс дэльӧдчӧ:

— Тэ тай йиа чойӧд кӧсйин тӧвзьыны, мун исковт. Он ӧд лысьт?

— А мый, муна да тӧвзя!

— Тэ-э? Да тэ тӧдан, коді тэ? Мам бӧж, вот!

Гашкӧ, тышкӧн вензьӧмыс помасис, эз кӧ Федялӧн мамыс матыстчы. Толик пыр и удтысис сылы:

— А Федяыд кӧсйӧ йиа чойті исковтны. Збыль!

Веськыда синмас и видзӧдӧ. Мамыс Федялӧн пузис:

— Ме тэныд петкӧдла йиа чой! Лысьӧмтӧ кисьтан да бӧр он чукӧрт. Ӧні жӧ гортӧ мун!

Со и пукалӧ зонка гортас, гажтӧмтчӧ. Думнас оз и сетчы Тольлы. А мамыслы жаль лои пиыс да шуис:

— Но мун, петав. Сӧмын ылӧ эн пышйы — сюралас папыдсянь.

Зонка ӧдйӧджык шутёвтіс ывлаӧ, мед мамыс бӧр оз бергӧд. Виччысьыштіс, оз-ӧ видзӧд, сэсся пошкигтыр кыскис нин пу дадьсӧ сикт сайӧ. Тольыс аддзис да бӧрсяньыс вӧтчис.

Воис Федя чой дінӧ, увлань видзӧдліс да сьӧлӧмыс кытчӧкӧ уйкнитіс, дзик коклябӧрӧдзыс, кӧть бӧр бергӧдчы. Но мыш саяс сулаліс Толик — серам выв лэптас. Федя ышловзис, пуксис дадь вылас да мый вынсьыс йӧткыштчис кокнас. Муртса удитіс коксӧ лэптыны, кыдзи даддьыс гулыда лэбыштіс увлань. Кутшӧмкӧ здук кежлӧ зонка кокни гӧн моз вывлань качліс. Кытчӧ, эз и аддзы: чизыр тӧлыс пычкис синвасӧ, вевттис ставсӧ руӧн. А даддьыс пыр ӧдӧбтіс и ӧдӧбтіс. Зонка нинӧм эз удит думыштны, кыдз тай зутшасис даддьыс картадорса потшӧсӧ, а кокъясыс веськалісны праслӧяс костас. Здук кежлӧ дойысла ставыс вошлі пемыдӧ. Паляліс да быттьӧ дадь вылас лайкъялӧ. Вӧлӧмкӧ, картаысь котӧртӧм кукань видзысь гортас сійӧс нуӧ.

Вольпасьӧ водтӧдісны. Весьӧпӧрӧм мамыс пыр жӧ мӧдӧдіс Феняӧс Марпа пӧчла, но мӧдыс пошкигтырйи удитіс нин пырны. Толикыс, тӧдӧмысь, висьтасьӧма нин. Ачыс тай эз лысьт локныс-а. Ёртсӧ йиа чойӧд исковтны ыззьӧдӧмысь поліс, тыдалӧ. Гашкӧ, и каитчис.

— Ноко, мада пиӧ, бабыс кокъястӧ видла. Ин пов, ог дойд, — шуалӧ Марпа пӧч меліа, ачыс чуньяснас небыдика нин видлалӧ Федялысь кокъяссӧ. — Но, Ен сыкӧдӧн, абу вӧрзьӧма ни чегӧма. Бласлӧ Кристос! Бабыс небыдика зыравны кута, да и бурдас кокыд. Пывсянын корӧсьӧн небзьӧдам, мавтам-ниртам. Нимкывъяс шуала бабыс. Вомидз тайӧ кагаыслӧн, Татьяна, вомидз.

— Кутшӧм вомидз, Марпа тьӧт? Ачыс оз кывзысь да! — вомаліс Татьяна Васильевна. — Шулі нин: шудыс абу такӧд чужлӧма!

— Вомидз — ин вензьы. Кодкӧ тіянлы завидьтысь да вомдзалысь выйим. Ставыс детина пырыд мунӧ. Сійӧн и висьӧ да доймалӧ. Ин шогсьӧ — веськӧдам.

Мамыс, дерт, эз эскы пӧрысь пӧчлӧн сёрниясӧ, но эз нин сэсся водзсась, мед сӧмын пиыслы бур лоӧ. Феняӧс чиршӧдлыштіс жӧ, мед вокыс бӧрся видзӧдыштас, а оз котрав кӧнкӧ. Нывка дузгӧдчыліс эськӧ, но кокни руыс веніс да ӧдйӧ и бурасис, кӧсйысис воксӧ дӧзьӧритны.

Федя, дерт, Марпа пӧчкӧд пывсянӧ эз мун, асьсӧ ыджыдӧн нин лыддис да. Папыс лэччӧдліс и коксӧ небыдика корӧсяліс, сэсся нин гортас Марпа баб мавтасӧн зыраліс-ниртіс да вомгорулас мыйкӧ шуаліс. Кодӧскӧ быттьӧ видіс, «сир пинь горшад» унаысь шуаліс. Вомидз вӧтліс. И Федя эскис сылы...

ВЕРАЛӦН ГӦСНЕЧ

Тӧвся каникул помасьтӧдз коли кымынкӧ лун. Федялӧн батьыс уджаліс гаражын, мамыс быд лун жӧ час кык-куим кежлӧ петавліс школаас. А Феня, кыдзи и кӧсйысьліс, дӧзьӧритіс воксӧ. Видзӧдіс, кыдзи Федя, вольпасьын куйлігас, серпасасис альбомӧ. Бокас Рудук каньпи ворсӧдчис, лапанас Федялысь карандашсӧ тшапйӧдліс. Мудзас да шоныд вольпасьын кургӧ-узьӧ. Ӧтчыд Вера налысь серамсӧ петкӧдліс. Посводзас, кылӧ, дыркодь пошкис-ноксис. Сэсся, ӧдзӧс воссис да, кыліс горӧдӧм шы:

— Волӧй кодкӧ, отсалӧй! Феня, ог ӧд вермы ӧтнам!

«Мый и лоӧма Вераыскӧд?» — чуймалӧны чоя-вока. Фенялы быть лои уськӧдчыны посводзӧ отсӧг вылӧ. Здук мысти упкигтырйи Веракӧд тшӧтш пыртісны ыджыд картон куд.

— Мый нӧ сэні? — вольпассянь нюжӧдчигмоз юасьӧ Федя.

— Да ка-а-мпет! Даддьӧн тіянӧдз кыски. Со — видзӧдлӧй! — шуӧ Вера да восьтӧ кудсӧ.

Збыль тай кампет — чуймалӧны чоя-вока. Вазьылӧмысь ли мый ли пӧдушечка кампетъяс сылӧмаӧсь-небзьӧмаӧсь да артмӧма сук сорас. Ӧдвакӧ кӧть ӧти кампет сэтысь шедас: ставыс лемасьӧма. Сё дивӧ дай сӧмын. Феня гигзьӧ-сералӧ, вокыс чуймӧмӧн видзӧдӧ нывъёрт вылас. Сӧмын Вера эз нюмдышт весиг, пӧрччысис да зэв эскӧдана шуис:

— А мый нӧ? Ог ӧд шыбитӧй. Небзьӧма, да мамӧ лавкаысь вайис.

— Гусяліс? — шемӧсмӧ Феня.

— Йӧй тэ! Менам мам чут оз босьт йӧзлысь, — дивитіс Вера нывкаӧс. — Федя кӧ эз коктӧммы, ачыс эськӧ миянӧ воліс, а ӧні кыскыны лоис тіянӧдз, татшӧм сьӧкыдсӧ. Тӧданныд, кымын кило тані? Гортын видлі кампетсӧ шедӧдны, да ньӧти эз шед, ог ӧд черӧн керав.

Чоя-вока чӧла олісны. Вера весиг пернапасасьӧмӧн эскӧдіс:

— Да эз гусяв мамӧ, эз! Спишитӧмаӧсь. Сэтшӧмсӧ шыбитӧны, а тайӧс, кампетсӧ, жаль. Абу ӧд бакшасьӧма. Часлы, сылыштас да видланныд. Феня, вайлы чорыд пань да тасьті.

Нывкаяс заводитісны ноксьыны кампет куд дорын. Весиг чорыд паньлы кампет сорасыс эз сетчы. Пань бердас сибдіс, а тасьтіӧ некыдз эз мын.

— Панясям, либӧ! — шуис Вера да чургӧдіс паньсӧ Федялы.

Тадзи, ӧта-мӧд выланыс сералӧмӧн, лукйысисны кудйын, сэсся сук ма кодь сорассӧ нюлісны паньысь. Юмзисны дзикӧдз. Феня кисьталіс чай да сійӧн вомнысӧ пожъялісны.

— Толикъясӧ ветла, мыйкӧ оз тыдав ывла вылын, сійӧс тшӧтш гӧститӧдам, — дӧжналіс Вера. — Водзӧ асьныд волӧй миянӧ. Дыр на тырмас.

— Ӧдвакӧ! Толикыд ставсӧ нямлялас. Сӧмын сет сылы, — сералӧ Феня.

Но Вера мӧдӧдчис нин Толикъясӧ. Кампет кудсӧ Фенякӧд ӧтлаын петкӧдісны дадь вылӧ.

— Федя, аддзылін кӧ! — пыригкостіыс горӧдіс Феня. — Ӧшинь улын пон чукӧр виччысьӧмны Вераӧс. Ӧні и Катшыс Шариккӧд вӧтчисны сы бӧрся.

Толикӧдзыд, гашкӧ, оз и во — мырддясны кампетсӧ.

— Феня, а мыйкӧ тай Толик оз и волы. Кытчӧ нӧ воши? Тэ эн аддзыв? — юасьӧ Федя.

— А и збыль — кымынкӧ лун нин оз тыдав. Тешкодь тай, — шуис чойыс, — кытчӧ нӧ вошис? Часлы, Марпа баб висьталас.

СЮРА МУТИ

Мӧд лунас Марпа пӧч и збыль висьталіс, кор локтіс Федялысь коксӧ зыравны.

— Ин нин и юасьӧ, мада челядь, ыджыд шог ӧд миянӧс суис, ок, ок, ок,.. — норасис пӧч да быдсӧн чышъян помнас син дорсӧ чышкыштіс.

Сэсся казяліс чӧв олысь челядьлысь повзьӧм чужӧмъяссӧ да пыр и вежис сёрнисӧ:

— Биа рузь тіян Толикныд! Сюра мути! Мый ӧд карис? Бабсӧ муртса кувтӧдз из повзьӧд! Кыдзи и ловйӧн коли?

Чоя-вока нинӧм эз гӧгӧрвоны да шемӧс видзӧдісны пӧч вылӧ.

— Арест улын ӧд Толикным. Папыс пуксьӧдіс, коньӧрӧс. Гортас олӧ. Ме дорӧ весиг оз лэдзны мада жальӧс, — бара мӧдарӧ бергӧдіс сёрнисӧ Марпа пӧч.

— Кыдзи нӧ? Мыйысь? — юасьӧны чоя-вока.

— Тіян вильышлун вӧсна ставыс. Кодкӧ тіянӧс кыскис йиа чой дорас? Батьыс — Володь пиӧ — Толикӧс доймӧмӧн чайтас, кывсяс Федялӧн героялӧмыс да, гортас воас, а пиыс, Ен сыкӧд, ловъя да дзоньвидза. Скӧрйывсьыс и пӧвсалас тасмаӧн, мед оз пӧваднӧ ло, мед тэ моз оз матыстчы йиа чой дінас. Ачыс сэсся вина гагсӧ веськӧдны мунас, а Толик воши... Гортас ни ме ордын абу. Чайті, тіянын сёрмис да ме ордӧ пыравтӧг гортас муніс. Ме ӧд водз унма. Татшӧм мӧвпъясӧн бабыс и воді узьны.

— А Толик? — юасьӧ Федя.

— Часлы, висьтала на, — зонкалысь кок зыралігмоз водзӧ нуӧдӧ сёрнисӧ варов пӧч. — Водз асывнас чеччи да пачлань и сетчи. Рача нянь, мися, пӧжышта. Нокся пачводзын. Кӧсйи пес сюйны, а пачас... мыйкӧ вӧрзис. Сэсся сюра мути сэтысь мыччысис. Ме тайкӧ иг усь! Сьӧлӧм муртса из пот, лолӧй оз шед. Ме сы вылӧ синмӧс сувтӧді, а сійӧ априканеч кодь сьӧд рожанас — ме вылӧ. «Свят, свят» — пернапасаси да час, мися, песнас и лачка мутисӧ.

— И вачкин? — юасьӧ Феня.

— Тэ кывзы, ин торкав, — дӧзмыштіс пӧч. — А мутиыс синъяснас луп-лап карис да морт гӧлӧсӧн шуис: «Бабе, ин скӧрав, ог сэсся пачад пыр, пӧлатяд кая...». Петіс пач вомсьыс, да вӧлись Толикӧс тӧді. Ок эськӧ ме сылы пӧлать петкӧдлі!

— А мый нӧ сэні Толикыд вӧчӧма? — некыдз оз гӧгӧрво Федя.

— Папсьыс дзебсьӧма, повзьӧма да. Сэсся онялысь шоныдас вугыртӧма, да и унмовсьӧма. Асылӧдзыс сэні стынитӧма-узьӧма. Ас садям вои да серамӧй кутіс петны. Сэк и батьыс пырис, грек вылад. Сьӧд рожасӧ аддзис да дзик пузис. Тадз и сюри Толик арест улӧ. Ӧні каникул помӧдз нин, — помаліс Марпа пӧч.

Кымынкӧ лун Федялы ковмис на гортас овны, кӧть надзӧникӧн нин дзурликтіс керка кузяыс. Феня чойыс мукӧд челядькӧд удитіс нин бӧр интернатӧ мунны. Каникул помасис, а Толик эз на мыччысьлы. Федялӧн гажыс нин сыысь бырис. И йиа чойыс тшӧкыда дум вылас усьліс. Ӧні кӧ, кужис нин лючки-бура исковтны. Дерт, зурасян веськӧдлытӧгыд. Мӧдысь сійӧ водӧмӧн исковтас, а кокнас веськӧдлыны кутас. Мед сӧмын бурдлас.

Коркӧ и Толик пырис найӧясӧ. Чӧв олыштӧм бӧрын юӧртіс:

— А йиа чойтӧ... лым тола тыртіс.

— Дзикӧдз? — юаліс Федя.

— Сідз кымын, — ылӧсасьӧ ёртыс. — Зонъяс интернатӧ мунісны, некодлы весавнысӧ.

— Бӧр кодъям, — эз сетчы Федя.

— Кысь нин. Гожӧмӧдзыс сэні лукйысьны кутам? Кыкнад? Тэнад кокыд эз на бурд и.

— Кыдз эз? Со — ветлӧдла нин да. Аски школаӧ муна нин, — вензьӧ Федя. — А тэ нӧ мый эновтчин, он весав чойсӧ?

— А ме,.. а менӧ,.. — джӧмдіс Толик, но бӧр веськӧдчис, — а ми ӧні лымйысь йиа кар тэчам, ваӧн киськалам. Школа дорын. Тэ ӧдйӧджык лок, но?

— Но, — сетчис Федя.

Толик мунӧм бӧрын сійӧ нетшыштіс альбомсьыс ӧти лист, кытчӧ Марпа пӧчлӧн висьтасьӧм бӧрын серпасавліс ыджыд пач вомысь петысь сьӧд рожаа, сувтса юрсиа, паськыд бугыльяса, мути кодь Толикӧс.

Видзӧдліс, шпыньмуніс да посниа косявліс серпассӧ, а торъяссӧ шыбитіс пачӧ. Мед некод оз аддзыв.

ПЕДӦР ДА ПЕДӦССЯ

Катшыс лунысь-лун гӧгрӧсмис, польдчис: виччысис кычипиянӧс. Турӧбъяс дырйи папыс жаляддза весиг лэдзліс сійӧс гортас. Мед пӧ шонтысьыштас. Велалӧма, да ӧдзӧс дорысь водзӧ эз и мунлы. Котшъялыштас гыжъяснас, кытшыля бӧжнас легӧдыштас да ружӧктанмоз ӧдзӧсдорса вольӧс вылӧ и нюжӧдчас. Вугыртлас и быдӧн, а пельыс пыр чош: ставсӧ кылӧ. Синсӧ быд шы вылӧ восьтлӧ и. Рудук чушъялӧ-скӧралӧ пач дорсянь, но матыстчыны пон дорӧ оз лысьт.

Мамыс коркӧ шмонитіс-шуис папыслы:

— Регыд и ме татшӧм кыз да гӧгрӧс лоа. Катшыс моз ружтыны да пошкыны кута.

Федялы тешкодь лои. Сійӧ некыдз эз вермы думыштны, мый налӧн вӧсни, ичӧт тушаа мамыс вермас лоны Катшыс либӧ Марпа пӧч кодь гӧгрӧсӧн. Кӧть бӧръя кадас мамыс и збыль вежсьыштіс. Дзик муртсаник и кызыштіс, кутіс новлыны паськыд платтьӧ, а чужӧмас мыйлакӧ тӧв шӧрнас петісны берин чутъяс. Федялӧн тай тулыснас беринъясыс мыччысьӧны, а тулысӧдзыс дзонь тӧлысь на. Эз кӧ Феня интернатас мунӧм водзын вокыслысь синсӧ восьт, ӧнӧдз на, гашкӧ, зонка нинӧм эз тӧд. Чоя-вока шӧпкӧдчисны паччӧрын. Бара ӧд тувсов каникулӧдз торъялӧны, кор на сёрнитасны сэсся. Федя юаліс чойыслысь:

— Феня, мамыд коркӧ папыдлы висьталіс кутшӧмкӧ гӧрӧд йылысь, выль лов пӧ миян лоӧ. Катшысыд али мый пиянасяс? Но сылӧн ӧд уна кычи лоӧ, и оз гожӧмнас, а ӧні. А гожӧмнас нӧ кутшӧм лов виччысьӧны?

— Ой, Федя, йӧюк! Выль гӧрӧдыс — ичӧтик морт. Сійӧ ӧні мамыдлӧн кынӧмас быдмӧ. А гожӧмнас миян выль морт чужӧ — тэнад да менам чой либӧ вок. Сійӧ и лоӧ выль ловнас. Тадзи шулӧны тай-а.

— Да-а? А меным эз и висьтавны... — нюжӧдіс вокыс.

— А тэ, Федул, ачыд на кага, нинӧм на он гӧгӧрво, — нимтыштіс воксӧ Феня дай нырас на чуньнас личкис.

— Ме — кага?! — дӧзмис Федя. — А кӧсъян, висьтала?

— Мый?

— Ӧтитор. Он кӧ некодлы удтысь? — юаліс зонка.

— Мед паччӧр пырыс муна, мед ваӧ уся, мед... — кӧсйысис Феня, но вокыс торкис сійӧс.

— Но тырмас, висьтала инӧ, он кӧ серав. Он? Ме,.. ме Вераӧс окышті, вот!

— Ко-ор? Тэ ӧд сійӧс он радейт, пыр катшаӧн нимтан? — шензис чойыс.

— Важӧн нин. Вот! Ӧні ог нин радейт, а сэки радейтлі, — восьтіс Федя ассьыс гусяторсӧ.

— Но и Педӧр тэ дай Петрӧвич. А он шу,.. — чуймаліс Феня да видзӧдліс «рам» вок вылас.

А Федяӧс аслас мӧвпъяс майшӧдлісны. Куйлыштіс да юаліс:

— Феня, а меным эськӧ мед вок чужас, ме сыкӧд ворсны кута.

— Ворсан, кор быдмыштас, а кор ичӧт, видзны ковмас, рузумъяс вежлавны. Бӧрдны кутас, — велӧдӧ чойыс.

— А бӧрдысьыд меным оз и ков, ачыд видз, — ыждалӧ зонка.

— Ковмас, ковмас, Федул, — дэльӧдчӧ чойыс.

— Абу Федул, а Педӧр, кымынысь шулі тэныд. Тэ, сідзкӧ, йӧй Педӧсь! — дзик скӧрмис Федя.

Дӧзмисны да бергӧдчисны ӧта-мӧдсьыныс. Чӧв олӧны, нырнас нускӧны. Некоднанныс первойӧн оз кӧсйыны бурасьны. Сэсся Феня ышловзис да шыасис:

— Но и нимъяс миянлы пуктылӧмаӧсь — Педӧр да Педӧсся. Быттьӧ мичаджык нимыс эз сюр. Папыд... Сылы мед сӧмын важ вӧлі.

— Тэ нӧ мый, Феня? Тадзи ӧд миянлысь пӧрысь, но — коркӧя на пӧльнымӧс — шулӧмаӧсь. А Феняыс — папыдлӧн мамыс вӧлӧма. Сійӧ ӧд кувлӧма, кор папыд ичӧт детинкаӧн на вӧлӧма. Меным мам неважӧн на висьталіс. Он мӧй тӧд?

— Тӧда, но ӧні выль олӧм да выль ним и колӧ пуктыны. Шуам, Анжела, Виолетта, Артур, Антон... — лыддьӧдлӧ Феня.

— Антон — лапъя пеля пон, — нерыштіс Федя.

Муртса тышкӧ эз воны. Но налысь вензьӧмсӧ кылӧма папыс, да ӧдйӧ ӧлӧдіс. Лӧнисны сэсся. Унмовсисны Педӧр да Педӧсся.

КЫЧАНЪЯС

Ӧти асылӧ, шондӧдыштӧм бӧрын, папыс пыртіс гортас вит кычипиӧс. Найӧ, мый вермисны, тявзісны питшӧгас. А папыс гӧгӧр, никсігтырйи, чеччаліс Катшысыс.

— Федя, волы видзӧдлы. Кутшӧм тупыльясӧс Катшысыд вайӧма. Ноко, вай бӧръям медбуръяссӧ.

Федялӧн радыс! Уськӧдчис ёкмыльяс дорӧ, малалӧ, нювсьӧ накӧд. А батьыс кутіс гӧгӧрбок видлавны-тӧдмавны кычанъясӧс. Восьтліс вомсӧ, лыддис сэтысь визьяссӧ, видлаліс лапаяссӧ, лэптыліс шошукӧдыс — лябӧсь абу, чуньяснас малыштіс юрсьыс — кыкнан пель костсьыс — лысӧ, мед ёсь вӧлі. Кымын пӧ ёсь сійӧ лыыс, сымын понйыс сюсь да вежӧра. Сэсся вештавліс чукӧрысь понпияссӧ да видзӧдіс, бокӧ али Катшыс дорӧ кыссясны: тӧдмаліс, нырисаӧсь абу.

— Петя, тэ налы экзамен вӧчан али мый? — мамыс тшӧтш сюйсис.

— А кыдз нӧ? Мед тӧлка понъяс лоӧны, а оз «бобикъяс».

— А ме думысь, кыдз ӧд видзан да мыйӧ велӧдан: бӧб кӧзяинлӧн и понйыс абу тыр сюсь. Абу ӧд быть кыйсян понъясӧс кольны, кодлыкӧ и керка колӧ видзны, ёрт пыдди лоны, — ассьыс дольӧ Татьяна Васильевна.

— А ӧти кыйсян понйыс ставсӧ тайӧс вермас вӧчны, — оз сетчы Федялӧн папыс.

Кычанъяскӧд ноксьӧм бӧрын бӧрйис куимӧс.

— А мукӧдсӧ? — юаліс Федя.

— Мукӧдсӧ?.. Но, кодлыкӧ ворсан пон пыдди сетам либӧ, мамыд тай шуӧ, керка видзны, гашкӧ, туясны. А тайӧ куимыс — кыйсян лайкаяс, ӧні нин тыдалӧ — тӧлк наысь лоӧ. Ӧтисӧ, аддзан — мамыс кодь нёль синма сьӧд энь понписӧ — аслыным колям.

— Куим пон миян лоӧ? — юасьӧ пиыс.

— Кык. Катшыстӧ Степан дядьыд корӧ, да тулыснас сылы Джуджыдъягӧ нуам.

— Мыйлакӧ? — шензьӧ Федя.

— Дядьыд кӧсйӧ сэні кыйсян понъясӧс рӧдмӧдны. Ыджыд посёлокад сорласьӧмаӧсь понъясыс. Он и тӧд — лайка али овчарка. Быдсяма дивӧыс паныдасьлӧ. Весиг ыджыд юраыс да дженьыд кокаыс. Босьтасны кычипиӧс, а сэсся оз видзӧдны, мый лоас — ло. Важӧн тадзи эз вӧв. Тэнад пӧльыд коркӧ весиг Удораӧдз ветліс сэтчӧс лайка понла. Найӧ кӧть и ичӧтӧсь, а зверь кодьӧсь, нинӧмысь оз повны. Зонка на ме вӧлі, помнита руч кодь гӧрд гӧна лайкасӧ.

— А мый сыкӧд лои?

— Мынӧма коркӧ дом йывсьыс да и косялӧма ыжӧс. Бырӧдны ковмис пӧльыдлы: торксис понйыс. Стрӧга сэки найӧс видзлісны, мед тӧдісны ассьыныс ин да удж. А ӧні... Джуджыдъягын прамӧй кыйсьысьыс абу нин уна. Мукӧдыс, вӧралысь нимсӧ тшыкӧдысьяс, сӧмын дурӧны. Шковгӧны вӧрас, колӧ ли оз. А нӧшта на пиянасян-быдтысян кадас браконьералӧны. Со и бырны кутіс зверь-пӧткаыс, — велӧдӧ Федяӧс батьыс. — А Катшысыд пӧрысьмыны кутіс, омӧля нин аддзӧ. Вӧравны лунтыр оз нин вермы, а бур кычанъясӧс чужтас на.

— Арнас на босьтлін ягас да?

— Босьтлі, мед Шариктӧ велӧдас. А ӧні мӧдарӧ нин кутас артмыны: оз Шарик, а Катшыс кутас пиыс бӧрся вӧтлысьны. Уртӧ да пӧткатӧ оз нин аддзы. Ачыс сэсся майшасьӧ, мыжа синмӧн ме вылӧ видзӧдӧ. Сійӧ ӧд морт моз ставсӧ гӧгӧрвоӧ, — кывкӧрталіс батьыс да петкӧдіс кычанъясӧс чомйӧ.

«Кыдз нӧ Катшыстӧг? — шога мӧвпалӧ Федя. — Босьтны дай сетны бокӧ, Джуджыдъягӧ? А, гашкӧ, ӧні папӧ тадзи шуӧ, а бӧрыннас вунӧдас либӧ кывсӧ вежас, жаль лоӧ Катшысыс да».

Федялы тай жаль вӧлі-а. Ӧд мыйта асьсӧ тӧдӧ, сы мында и Катшыссӧ. Кӧть эськӧ зэв мусаникӧсь понпияныс, а мамсӧ мӧд вылӧ он на и веж. Коркӧ папыслысь юаліс, мыйла татшӧм ним понйыслы пуктіс, да со мый кыліс: нёль синма понйыс пӧ шуда, синвесьтса кык еджыд чутнас пон пӧ аддзӧ вӧрын омӧльясӧс да повзьӧдлӧ найӧс, мед оз матыстчыны. А мамыс на содтіс: «катш» кывйыс пӧ зэв важ, ӧні сійӧн оз нин вӧдитчыны. А вӧлӧма «еджыд» вежӧртаса. Со ӧд кутшӧм налӧн Катшысыс — вӧралысь, омӧльясӧс повзьӧдлысь, керка видзысь и ёрт пыдди олысь пон.

ВЫЛЬ ЮӦР

Ичӧт грездад ставсӧ ӧта-мӧд йывсьыс тӧдӧны. Кывсис, Толиклӧн пӧ батьыс — Володь дядь — шыбитӧма юны. Дзик мӧд мортӧн лоӧма. Сё дивӧ тайӧ грездсаяслы. Марпа пӧч коркӧ Федялӧн мамлы и висьтасис: выль олӧм пӧ миян заводитчис. Шуйга пельпом вомӧныс весиг куимысь сьӧлыштіс, мед оз вомдзась Володь, Марпа пӧчлӧн пиыс. А сэсся и Толик корис ёртсӧ гортас ворсны волыны. Таӧдз зонка эз радейт Толикъясӧ ветлыны. Пырджык Федяясын либӧ Марпа пӧчьясын ворслісны, кӧні унджык кадсӧ ёртыс и овліс. Либӧ ывла вылын кадсӧ коллявлісны. А Толикъясӧ локтан, да гажа юра папыс пыр жӧ заводитліс зонкаясӧс чиршӧдлыны да велӧдны. А мамыс кӧ мыйкӧ шуас воча, мӧдыс мый ки улас сюрӧ, сійӧн и вермис тювгыны. Зонкаяс ӧдйӧ и пышйылісны ывлаӧ. И мамыс Толиклӧн пыр скӧр вӧлі, ӧтарӧ пинясис-горзіс.

Мукӧддырйи Федя мӧвпавліс: мый эськӧ вӧлі, сылӧн кӧ папыс Толиклӧн кодь вӧлі. И некыдз эз вермы асьсӧ ёртыс местаӧ пуктыны. Дӧзмывлас Толик вылӧ, но дыр оз лӧгав, бӧр бурасьӧ.

И со — Володь дядь пӧ садь олӧм олӧ. И Федя кӧсйысис ветлыны Толикъясӧ.

Зонкалӧн керка пытшкӧсыс весиг югзьӧма. А медся тешкодьыс — Толиклӧн батьыс мыйкӧ пызан сайын ноксис-вӧчис.

— Ноко, зонъяс, волӧй, эз кут менам артмыны, торксис мыйкӧ, — корис найӧс Володь дядь. — Этайӧ журналсьыс видзӧдӧмӧн кӧсйи керка вӧчны, да вевтыс некыдз оз артмы. Кыткӧ оз лӧсяв.

Зонкаяс матыстчисны пызан дорӧ да ӧтвылысь заводитісны видлавны серпассӧ. Сэсся ӧтчукӧрӧн вундалісны да клеитісны. Артмис лӧсьыдіник чом. И Володь дядь эз нин важ моз чиршӧдлы найӧс, а заводитіс висьтавны, кыдзи служитлӧма армияын. Кӧсйӧма весиг кольччыны, лоны военнӧйӧн, но абу артмӧма: кувсьӧма батьыс, а Марпа пӧч чорыда висьмӧма. Ӧні пыр на казьтылӧ армиясӧ да Саратов карбердса степьяссӧ.

— Тӧданныд, зонъяс, сэтшӧм зверӧс — сайгакӧс?

— О-о-г, — нюжӧдісны ёртъяс.

— Ыджыд кӧза кодь, кузьджык ныра сӧмын. И яйыс дука. Тайӧ пемӧсыс сэні тырыс вӧлі. Кабанъяс дзик локаторъяс дорӧдз волісны. Локаторыс — ыджыд антенна кодь, став лэбысь самолётъяссӧ казялӧ... А сусликыд! Сувтас бӧр кок вылас, сьылісӧ чургӧдас да гӧгӧр гоньялӧ-видзӧдӧ. И йӧраяс эмӧсь, вӧринъясын паныдасьлӧны, но гежӧда. Оз позь найӧс лыйлыны. Степыс паськыда восьса, сӧмын кӧнсюрӧ вӧр діяс. Тулыснас яръюгыд, уна рӧма. Майын тюльпанъяс дзоридзалӧны степь пасьтала, ландышъяс. Миян татшӧм дзоридзыс абу. Но коми пармааным кӧ видзьяс тулыссянь арӧдз вежӧсь, то степыс гожӧм кежлас быгалӧ, кольӧ ӧти рӧм — кольквиж, а тӧвзяс кӧ, гӧгӧр ставыс рудоввиж бусӧн вевттьысьӧ.

Челядь пель чошкӧдӧмӧн кывзӧны. Найӧ ӧд стептӧ да сусликъястӧ сӧмын телевизор пыр аддзылісны. А Володь дядь со кутшӧм ылӧдз веськавлӧма. Но Толиклӧн батьыс муркнитіс да содтіс:

— А миян Коми муысь, вӧр-ваысь мичаджыкыс некӧн абу. Сідз ӧд, зонъяс? Кольччи кӧ армияас, кӧнъясті, гашкӧ, шӧйті, а ӧні со — гортын, чужан муын ола. Ми тэкӧд, Толик, ружье на ньӧбам да кыйсьыны кутам, да ӧд? А, Людмила? — гӧтырыслысь тшӧтш юаліс.

— Кыйсянныд, дерт, мужикъяс, век нин вӧлӧга пызан вылын лоӧ. Но ладнӧ, вай дугдӧй бызгыныыд, час тіянлы чай кисьтала, чериняньӧн гӧститӧда. Папыс кыйис черитор!

А Федя юис чай да радліс ёртыс вӧсна. Водзті ӧд налы, овліс, и пызан вылас нинӧм вӧлі пуктыны. Бур кӧть, Марпа баб Толиклӧн эм.

Гортас мунігӧн Федя кевмысис ас кежсьыс, медым Толиклӧн батьыс бӧр оз юсьы, Толикӧс мед оз ӧбидит. Мед сэсся ёртыс оз нин дзебсясь бабыслӧн пачӧ...

РЫТПУКЪЯС

Феня мунӧмсянь колис унакодь нин кад. Федя лунъяссӧ лыддис, кор нин воас тулыс да чойыс бара локтас каникул вылӧ. Но велӧдчан четвертьыс вӧлі медся кузь, да некыдз эз кут помасьны. Марпа пӧч пыралігъясӧ пыр юасьліс, мый нин Феня гижӧ, кыдзи велӧдчӧ. Вайлывліс гӧснеч, медым Татьяна Васильевна тшӧтш и сылысь пӧжасъяссӧ нылыслы мӧдӧдас.

Рытпукигӧн, кор пӧчӧ пыравліс найӧясӧ кад коллявны, а мамыс Федялӧн ноксис горт гӧгӧрын либӧ дасьтысис урокъяс кежлӧ, Марпа баб кыис Фенялы вурун носки гоз. Тӧлыс пӧ кузь, тулысыс кор на локтас, пыр нин туяс нывкалы... Сэки сёрнияс пансьылісны верстьӧяслӧн:

— Татьяна, кывсьӧ, Джуджыдъягӧ мӧдӧдчанныд таво гожӧм? — юасьӧ пӧч.

— Сідз тай эськӧ кӧсъям, да Петя пыксьӧ, татчӧс вӧр-ваыс жаль сылы.

— А жаль и выйим: тані чужис-быдмис, семья лӧсьӧдіс. Мый и мунанныд? Сэні, посёлокас, керкаыс, йӧзыс уна. Лёк войтырыс выйим и. А тані, ичӧт сиктад, быд морт ки пыдӧс вылын моз тыдалӧ. Воштанныд сэні челядьтӧ, чужанінсьыс орӧданныд.

— Став Коми муыс абу мӧй чужан му? — оз сетчы том ань.

— Шулӧны тай: кӧні пӧ чужин, сэні и туйин. Сідз абу? — юасьӧ пӧрысь морт.

— А быдмасны да разаласны жӧ-а. Ставӧн тай бурджык ин корсьӧны. Кымын куш, овтӧм керка коли Ниакерӧсын, Марпа тьӧт?

— Муналӧны тай. Регыд сӧмын пӧрысьяс колялам да «руй-руй» челядьлы пыдди ӧта-мӧдлы кутам мойдны, — водзӧ висьталӧ пӧч.

— Оз на ӧд ставныс мунавны, кодлыкӧ и тані колӧ овны, — сюйсис сёрниӧ Федялӧн папыс. — Гашкӧ, Федя бӧр локтас пӧльыс керкаӧ. Феня учительӧ велӧдчас да татчӧ жӧ сетчас?

— Бур эськӧ да, мадаясӧ. Вот мунанныд Джуджыдъягӧ, да бабыс ӧтнам коля. Сираси тіян дінӧ, быттьӧ рӧд ті менам, ӧдзӧсныд бабыслы пыр восьса, — нормис Марпа пӧч.

Федялы жаль лои пӧчыс, да зэв эскӧдана кӧсйысис:

— Бабӧ, ог ӧд дзикӧдз мунӧй. Велӧдчыны сӧмын. И пыр волыны кутам. А сэсся ме школа помала да бӧр локта Ниакерӧсӧ.

— Бур, бур, дитяӧй. Локтан кӧ... Виччысяс-ӧ бабыс?

— А мыйла он? Мунан жӧ? — чуймӧ Федя.

— Муна, дитяӧй, муна.

— Ылӧ? — юасьӧ зонка.

— Ог, ог ылӧ. Изъяю сайӧ, шойнаягӧ муна ме. Регыд нин сэтчӧ мӧдӧдчыны ковмас. Гашкӧ, тэнад пӧчыдкӧд ӧтлаын овмӧдча. Пашкыр пожӧм улас.

— Ба-а-бӧ, — нюжӧдіс Федя, — тэ сэтчӧ эн мун, сэтысь ӧд бӧрсӧ оз волыны.

Федялӧн кутіс доршасьны синваыс. Сійӧ тӧдіс, мый шойнаягас мортсӧ гуавлісны, тыртлісны муӧн. А кыдз нӧ му увсьыс петан? Некыдз.

— Марпа тьӧт, — шыасис мамыс, — тэ тай дзикӧдз кагасӧ да миянӧс нормӧдін. Вай нинӧм абусӧ эн сёрнит.

— Мыйла нинӧм абусӧ. Чайтан, мортыс кулас да вошас-бырас? А ме ӧд шойнаягсянь ставсӧ кута видзӧдны и аддзыны. Кутшӧма олӧ миян Ниакерӧсным, кыдзи Федя пиӧ быдмӧ да збыль-ӧ волывлӧ чужан сиктас. А вунӧдан кӧ, кагук, дзик пыр и тӧдмала. И сэтшӧм жугыль меным лоӧ, вунӧдан кӧ Ниакерӧстӧ, керка-пӧльтӧ да Марпа пӧчтӧ, — мудера нюмъялӧ баб да видзӧдӧ нормӧм зонка вылӧ.

— Ог вунӧд, бабӧ. Збыль, — сьӧлӧмсянь кӧсйысис зонка.

— А тулыснас ми асланым да баблӧн ӧшинь улӧ томиник ниа пуяс садитам. Сідз ӧд, Федя? — содтӧ тшӧтш батьыс, медым бурмӧдны Федялысь сьӧлӧмсӧ.

— А и забыль, тулыс воас, да ӧтлаын и садитам. Ме тшӧтш ӧти ниа пу пукта. Ёна нин сійӧ небыд, нэриник веж лысъяса, дзик ӧд Федя пи кодь, — кӧсйысьӧ тшӧтш Марпа пӧч.

Сьӧлӧмныс весиг быдӧнлӧн небзис. Син водзаныс сувтісны керӧсйывса джуджыд пӧрысь ниаяс, а орчча керкаяс дорын — налӧн посни пиян, кык нэриник, ичӧт ниа пу.

Марпа пӧч сэсся дыр эз пукав да мӧдӧдчис гортас. Бӧръя кадсӧ сійӧ кутіс сьӧкыдджыка тапикасьны, эз нин вӧв важ моз тэрыб вӧраса, сьӧкыда киргӧмӧн лолаліс. Но некор эз норасьлы, кӧть ставӧн аддзисны, мый нёрпавны кутіс Марпа пӧч. Унаӧс бурдӧдліс, а аслыс турунъясыс омӧля отсалісны. Тыдалӧ, эз вӧв аслас висьӧмысь туруныс. Пыр жебмис и жебмис пӧрысь морт. Регыд сэсся и керкасьыс гежӧда кутіс петавны. Пырджык гортас куйліс. Федя зэв ёна виччысис тулыссӧ да сьӧлӧмсяньыс эскис, кор Марпа пӧч садитас томиник ниа пу, бӧр бурдас да лоӧ важкодьыс тэрыб вӧраса да гора, брунган гӧлӧса.

ФЕНЯСЯНЬ ЮӦР

Коркӧ сэсся и Фенясянь юӧр воис. Ёна жӧ пӧ и гажтӧмтчи тіянысь, гортысь, Ниакерӧсысь. Федя дузмунліс быдӧн: гажтӧмтчис кӧ, тшӧкыдджыка и гижис. Тадзи и шуис мамыслы. Но мамыс дорйис нывсӧ:

— Тэ, пиук, эн скӧрав, чойыдлӧн урокыс уна, сэсся гортса уджсӧ колӧ велӧдны. Сьылан-йӧктан ансамбляд ветлӧ и. Кор нӧ удитас унасӧ гижны? Велӧдчӧ бура и, оз дышӧдчы. Ачыд тӧдан — ставыс пӧшти «5». Сы моз жӧ кӧ велӧдчан, и тэ ошкана морт лоан.

— А мыйла нӧ ог? Ме лыддьысьны, гижны и артасьны бура кужа, а пыр на первой классын пукала. Толик со меысь водзӧ нин муніс, а сійӧ ӧд...

— Но, но, эн ыждав. Абу на ӧд пӧрысь. Да и Толикыд абу кулитана. Оз жӧ омӧля артась. Дерт, лыддьысьны сылы унджык колӧ, а детинаыс абу лёк. И тэ миян вылӧ эн скӧрав. Эн на вунӧд, арнас на врачыд, джуджыдъягсаыд, шуліс, дыр на пӧ вермас тайӧ нерӧд висьӧмыс кутчысьны, а сэсся мортыс ёнмӧ да висьӧмсӧ венӧ. А тэнӧ Марпа бабыд турунъяснас этша мӧй бурдӧдіс? — шуис мамыс да ышловзис, Марпа пӧчсӧ казьтыштіс да. — Но, Фенялысь письмӧсӧ вай помӧдз нин лыддям, ылалім тай?

И мамыс водзӧ кутіс гораа лыддьыны Фенялысь письмӧсӧ:

«...Мамук, папук, Федя вокӧ, со мый тіянлы висьтала. Ме тӧдмаси выль нывъёрткӧд, Украинаысь рӧднас, Яна Черных нима. Яналӧн зэв ыджыд шог: сылӧн мамыс да папыс...»

Татчӧ Татьяна Васильевна друг джӧмдіс да водзӧ ас кежсьыс нин кутіс лыддьыны. Федя казяліс мамыслысь чужӧм вежсьӧмсӧ да кыскыштіс сойӧдыс:

— Мам, мый нӧ водзӧ? Лыддьы ӧдйӧджык.

— Часлы, пиук, лыддя. Таті гудыра гижӧма Феняыд, да торксьышті. Но вот, Феняыд гижӧ, мый кӧсйӧ тувсов каникул кежлӧ Янасӧ миянӧ вайӧдлыны. Юасьӧ, позьӧ оз? Кыдзи тэ, Федя... Мед волас нывкаыс?

— Мед, колӧкӧ, абу кӧ сӧмын Вера моз китшкысь катша кодь. Сэтшӧмсьыд ме ӧдйӧ дӧзма. Катшаыд катша и эм. Ме Верасӧ сэтшӧмӧн и рисуйтлі: кузь бӧжа да восьса вомаӧн. Скӧрмис да мый дыра эз волы. Кампеттӧ пӧ вайлі, да ӧнӧдз пӧ жаль, — норасьӧ Федя.

— Абу, кагук, сэтшӧм Янаыс, да и Вераыд абу лёк, асныра сӧмын. А Янаыс рам, и ӧні зэв сьӧкыд нывкаыслы. Сійӧ ӧд батьтӧм-мамтӧм кольӧма, коньӧрӧй.

— Кыдз сідз? — чуймис Федя. — А кӧнӧсь нӧ найӧ? Юӧны, да сійӧн Янасӧ интернатас босьтісны?

Зонка тӧдіс, мый уна ловъя бать-мам дырйи челядь олӧны детдомъясын да интернатъясын.

— Эз, Яналӧн вӧлӧмаӧсь шань бать-мам, нывкасӧ радейтӧмаӧсь, лелькуйтӧмаӧсь. Ӧтка ныв сійӧ налӧн вӧлӧма. А ӧні... со ӧд шогыд — сирӧта. Кувсьӧмаӧсь бать-мамыс. И тані некод рӧд абу. Кӧнкӧ Украинаын кодъяскӧ эмӧсь, но некод на абу волӧма ни шыӧдчылӧма. Кор пӧ шыӧдчасны, сэки, гашкӧ, босьтасны нывкасӧ. Сыӧдз интернатас овмӧдӧмаӧсь. Вот тадз, Федя.

И мамыс лӧнис. Зонка тшӧтш чӧв оліс. Мӧвпаліс. А друг кӧ и сылӧн бать-мамыс эз вӧвны? Федя некыдз эз кӧсйы эскыны талы, юрас весиг татшӧмыс сылы эз вермы пырны. Сідз и пукаліс, кывсӧ быттьӧ ньылыштіс. Паляліс, кор кыліс мамыслысь юалӧмсӧ:

— Но? Мый, пиук, чӧв олан, корам ог Янасӧ?

— Дерт, корам, мед волӧ. А мый папыд шуас?

— Сідзкӧ, тэ тайӧс ачыд Феняыдлы гижан. А папыд, ме чайта, сӧглас жӧ лоӧ. А тэ ӧні мун ветлы, Марпа бабтӧ видлы. Висьтав, мый Феня регыд выль нывъёрткӧд воас. Сӧмын чӧв ов, бать-мамсӧ эн казьтышт. Тӧдан — висьӧдчӧ бабыд, да оз позь. Сідз?

— Ог, ог казьтышт. Но ме пета, висьтала Яна йывсьыс, — уськӧдчис пасьтасьны Федя.

— А гӧснечтӧ вунӧдін бабыдлы? — сувтӧдіс писӧ мамыс да сетіс киас тубрастор. — Кампет тані, печенньӧ. Чай юны сылы. Сӧмын дыр эн дӧсадитчы.

Кор Федя бӧр локтіс, папыс гортас нин вӧлі, дінас, пызан вылын, куйліс Фенялӧн письмӧыс. Тыдалӧ, Яна йылысь сёрнитӧмаӧсь. Федяӧс эз казявны, ни Марпа баб йылысь эз юавны, водзӧ сёрнитісны ас костаныс.

— Колӧ жӧ нывкалы татшӧм шог пыр мунны. Со ӧд, машинаяссьыд ӧні повны лоӧ, — шуис батьыс мамыслы. — На йылысь, сідзкӧ, газетад и гижлісны. Джуджыдъягысь Ухтаӧ мунігӧн тай «Жигули» зурасьӧма «КамАЗ-кӧд». Дзикӧдз пӧ «Жигулиыс» сотчӧма.

— Кутшӧм машина, пап? — сёрниӧ сюйсис зонка.

— А, Федя локтӧма! Эг и кывлӧй, — торкис мамыс. — Папыд тай газет лыддьӧма да висьталӧ. Сійӧ век быдторсӧ лыддьӧ. Лок нин, ужнайтам. Дыр тай ветлін? Кыдз нӧ Марпа бабыд?

Но Федя мыйсюрӧ заводитіс нин гӧгӧрвоны. Тӧдӧмысь, Янаыслӧн бать-мамыс машинаас сотчисны? Но мамыс сэсся нинӧм газет йывсьыс эз казьтышт, сёрнисӧ мӧдарӧ бергӧдіс, да Федялӧн сьӧлӧмыс лӧньыштіс. Збыль ӧд, папыс газетъяссӧ лыддяс да быдторсӧ висьталӧ. Янаяслӧн кӧ вӧлі машинаыс, сыысь эськӧ эз дзебны, абу ӧд нин ичӧт. И сёрнисӧ вуджӧдісны Марпа баб вылӧ. Федя юӧртіс, баблы кокниджык пӧ, пӧжасьӧма да Толиккӧд чай юӧны. Федяӧс тшӧтш нурйӧдлісны, да кынӧмыс пӧт ӧні. А аски пӧ Марпа баб ачыс волас. Сэсся шуисны ӧтвылысь вочавидзны Фенялы, мед быть Янасӧ вайӧдлас Ниакерӧсӧ гӧститны.

МАМЛӦН СИНЪЯС

Федя дыркодь нин пӧжис гуся мӧвп: рисуйтны мамсӧ. Унаысь видліс, но пыр кажитчис, мый лист бок вылас серпасалӧм мамыс эз артмы — абу ас кодьыс, мыйкӧ быттьӧ эз тырмы. Сідз и кольліс водзӧ кежлӧ. Мамыс зонкалӧн вӧлі быдсяма пӧлӧс: гортас новліс кокньыдик халат либӧ гач да футболка. Кор пасьтавліс гачсӧ да ковтасӧ, дзик том ныв кодь лоліс. Но бӧръя кадсӧ кутіс новлыны паськыдджык платтьӧ-халатъяс. Папыслӧн вӧлі сук, смоль сьӧд юрси, а мамыслӧн пашкыр да шабді кодь небыдик. Сы кодь юрсиыс и Федялӧн. Эз нин ӧтчыд Марпа пӧч шулы: Федялӧн пӧ юрсиыс дзик томиник ниа лыс кодь небыдик да веж, сідзкӧ, и сьӧлӧмыс детинкалӧн небыд да рам. Федя асьсӧ ньӧти эськӧ рамӧн эз шу. Быдлаӧ жӧ сійӧс кыскыліс: и пу йылӧ медвыліас кавшасьны, и крут йиа чойсянь эз повзьы исковтны. Скӧр понъясысь эз повлы ни.

А неважӧн папыс Федяӧс ӧлӧдіс, мед оз лысьт пияна Катшыслӧн поз дінӧ весиг матыстчыны. Скӧр пӧ пияна понйыд, тшапнитны вермас, вазнитіс тай коркӧ Толиклысь батьсӧ, сюйсис кычияс дінӧ да. Бура дыр кок пӧксӧ бурдӧдіс. А Федя эз повзьы, да и матыстчис Катшыс чом дінӧ, кӧсйис кычанъяссӧ видлыны. Сьӧрсьыс босьтіс нянь тор да сійӧн и ылӧдіс Катшыссӧ. Мӧдыс петіс чомсьыс да босьтіс нянь шӧрӧмтӧ, кутіс ватшкыны. Сы кості Федя и уйкнитіс чомъяс, кычанъяс дінас. Малаліс да окаліс посни тупыльясӧс. А Катшыс ылӧдӧмтӧ казяліс да ортсысяньыс заводитіс увтчыны. Но чомъяс пырны эз вермы: сэні гӧсть ли вӧрӧг ли вӧлі. Сэсся гӧгӧрвоис вежӧра понйыд, мый Федя оз ӧбидит ни дойд пиянсӧ, да ортсыас и оліс, кадысь кадӧ бур ногӧн нин увтышталӧмӧн: пет нин пӧ сэтысь, лэдз менӧ челядь дінӧ. Федя ӧвтыштчис сыысь, а Катшыс тшапнитіс сійӧс киӧдыс, но эз курччы, а топӧдіс пиньяснас, оз лэдз, кыскӧ ортсыас: пет нин пӧ, тырмас сэні ыджыдавны.

А мамыс Федялӧн керка дорсяньыс казялӧма Катшыслысь ноксьӧмсӧ, да котӧрӧн нин локтӧ чом дорӧ:

— Катшыс, мый нӧ лои? Ноко, вешйыв!

Видзӧдӧ, а понйыс шашаритчӧма пиыс соскӧ. Сэтчӧ муртса эз усь мамыс.

— Федя, кагук, курччис тай?! Ак и лёк пон! Мед и нуас папыд Степан дядьыдлы. Пет вай сэтысь, пиук.

Федялы быть лои петны чомсьыс. Вӧлисти Катшыс сойсӧ лэдзис. Эркнитіс на, эз кӧть и скӧрысь, но ӧлӧдана, сэсся пырис аслас челядь дінӧ.

— Ойя да ойя, Федя! Ёна курччис?

— Да эз ньӧти курччы, соскӧд сӧмын босьтіс, — такӧдіс мамсӧ зонка.

Видзӧдліс сэсся мамыс вылӧ, аддзис повзьӧм-кельдӧдӧм чужӧмсӧ да синъяссӧ. Федя оз куж шуны, кутшӧмӧсь вӧліны мамыслӧн синъясыс, но ӧнія кодьыс найӧ вӧліны пыр, кор Федякӧд мыйкӧ лоліс. И сійӧ ачыс тшӧтш повзис мамыс вӧсна. Вунӧдіс! Феня ӧд шуліс: мамтӧ пӧ колӧ видзны, ӧд сылӧн кынӧмас дзоляник кага, и мамыслы кӧ лёк, и кагаыслы лёк жӧ. Ок и жаль лои Федялы мамыс.

— Мамук, эн повзьы, ми ӧд дурим. Катшысыд менӧ эз курччы. То, видзӧдлы.

И веськыда ывлаас пӧрччис пальтосӧ да петкӧдліс сойсӧ. Дерт, неуна пинь туйяс тӧдчисны, но эз курччӧмысь, а позсьыс кыскӧмысь. Яндзим лои зонкалы да ачыс кутіс лигышмунӧм мамсӧ бурӧдны. Гортас пырисны да мамыс корис:

— Федя, сет кыв, мый мӧдысь он пыр Катшыс чомйӧ. Сійӧ и збыль вермас курччыны. Батьыд ӧд шуліс. Вунӧдін!

И Федя зэв збыльысь кӧсйысис, мед мамсӧ сэсся не дӧсадитны. Бурасисны мама-пиа.

Нӧшта мӧд пӧлӧсӧн лолі мамыс, кор гын сапӧгасьліс, купайкаасьліс да чышъянасьліс, медым петавны песла, вала либӧ кильчӧ вылысь роскӧн лым чышкыштны. Сэки сійӧ вӧлі грездса унджык нывбаба кодьӧн. Лысьтысьысьяс тадзи жӧ пасьтасьлісны, кор фермаас лэччылісны.

Школаӧ мӧдӧдчигас мамыс бара мӧд пӧлӧс. Пасьтавліс костюм либӧ платтьӧ, юбка да ковта. Эм сылӧн ӧти юбка — увланьыс паськалысь, а косладорас векньыд. Тайӧ лӧзовруд юбка дорас мамыс бӧрйывліс некымын пӧлӧс ковта.

А праздникъясӧ пасьтавліс морӧсас уна посни кизя турунвиж кузь платтьӧ. Лӧсьыд. И гажӧдчыны мамыс кужис. А шогсьӧ кӧ мыйыськӧ, и Федялысь сьӧлӧмсӧ нюкыртліс.

Мамыс Федялӧн овлӧ и стрӧг, но пырджык сійӧ шань, мелі гӧлӧса. Прӧступитчӧм, мыжмӧм ныла-пиа вылӧ оз горзы, а меліа шуліс, весиг быттьӧ корис, мед сэсся мӧдысь оз нин тадзсӧ вӧчны. А Федялы кокниджык эськӧ вӧлі, горӧдіс кӧ мамыс либӧ ньӧръяліс.

И папыс Федялӧн эз жӧ горзыв, и тасматӧ киас эз босьтлы. Кык-куим кывйӧн стрӧга ӧлӧдас либӧ шуас: «Кор гӧгӧрвоан, сэки сёрнитам». И чӧв оліс, писӧ ныр увсьыс быттьӧ эз аддзы. Мӧвпав сэсся зонкалы, кыдзи батьыслы юӧртны, гӧгӧрвоис эз прӧступитчӧмсӧ. Тшӧктас ӧд висьтавны, кыдзи гӧгӧрвоис да мыйла тадзсӧ оз позь вӧчны.

Федя казявліс, кыдзи папыс мамыс вылӧ видзӧдлывліс. Шулас на:

— Пиӧ, а мамыс миян мича абу?

— Да, — яндысигмоз вочавидзӧ Федя.

— Сӧмын? Да мамыс миян став мичасьыс медмича!

А корсюрӧ папыс мамсӧ гусьӧнмоз топӧдлывліс да окыштліс. Мамыс сэки гӧрдӧдліс да быттьӧ зэв збыльысь кинас йӧткасьліс: мун пӧ татысь, челядь водзын меліасян. А мед пӧ аддзӧны, шуліс папыс, ог пӧ ӧд гусясь, аслам ӧд.

Федялы тайӧ здукъясас вӧлі зэв лӧсьыд и кокни. Дерт, и вензьывлісны бать-мамыс, чӧв овлісны, но эз дыр кежлӧ торксьывны. Ӧдйӧ бурасьлісны. Мамыс Федялӧн ньӧти эз куж дузъявны, пыр и вунӧдліс венсӧ.

Вот татшӧм мамыс зонкалӧн — быд пӧлӧс. А кутшӧмӧс рисуйтны, эз тӧд.

ПЫВСЯН БӦРЫН

Ӧтчыд Федялӧн батьыс, Пётр Иванович, кайис ягӧ. Лун-мӧд мысти пӧ мамыслӧн гаж — нывбаба лун. Гашкӧ, кӧч пӧ шедас. Сэк кежлӧ турӧбъяс коставлісны шондіа лунъяскӧд и, кӧть шоныдыс эз на и тӧдчы, восьсаинъясті чарӧмавліс. Тайӧ кадӧ кӧчьяс пӧ заводитлісны кӧлысявны-ворсны. Сэтшӧма пӧ эрдъясын таляласны чарӧмсӧ, потласьӧ весиг лым веркӧсыс вӧсньыдінъясті. И йӧй кодьӧсь сэки кӧчьясыс, нинӧм оз аддзыны ас гӧгӧрсьыс, нинӧмысь оз повны. Кокниа и шедӧны, йӧйясыд.

Федя аслас чужан лун бӧрын эз нин дузъяв батьыс вылӧ, кӧть и тӧдіс, мый ачыс оз ло вӧралысьӧн, оз кут лыйлыны зверь-пӧткаӧс. Быдмас Федя, велӧдчас художникӧ да бӧр локтас аслас Ниакерӧсӧ. Сэки сійӧ велалас нин бура рисуйтчыны да ставсӧ грезд гӧгӧрысь серпасалас. А батьыс мед кыйсьӧ.

Асывнас на мамыс шуис:

— Пиук, а вай ми тэкӧд талун пывсян вӧдитам. Папыд эськӧ шуліс, воа пӧ да ачым ломта. А ми нӧ мый, китӧмӧсь? Да и тэ, кӧть и ичӧт на, а век жӧ айулов — мужик рӧд, отсасьысь. Ломтам?

— Дерт, ломтам, — вочавидзис зонка.

— Папыд ягысь локтас да пывсянын шонтысяс. Марпа бабтӧ корам тшӧтш.

— Мам, а мыйла сійӧс Володь дядь да Людмила тьӧт оз радейтны? — юасьӧ Федя. — Володь дядь ӧд сылӧн пи?

— Мыйла оз радейтны? Радейтӧны, сӧмын ас ногныс. Володь пиыс пыр лёк нога овліс: юліс, тышкасьліс, мамсӧ ӧтдортліс. А Марпа пӧч — веськыд морт, йӧзлы сӧмын бур вӧчліс. И эз вермы пиыслы лёкасьӧмсӧ прӧститны. Со и торксисны. Но нинӧм, бурасясны. Ӧні ӧд Толиклӧн батьыс оз ю, — ыджыдлы моз висьталӧ мамыс.

— Оз, ме пыравла найӧясӧ мукӧддырйи.

— Но вот и бур. Сідзкӧ, бурасясны. Гашкӧ, ӧтлаын на кутасны овны. Корӧны найӧ Марпа бабтӧ ас дорас. Пӧрысь мортлы сьӧкыд ӧтнаслы. Но мый ми бызгам? Луныс коляс, а пывсяныд ломтытӧм, — помаліс сёрнисӧ мамыс.

И найӧ лэччисны ниаяса кыр горулӧ. Сэні и сулаліс пывсянныс. Из горъя. Мамыс важӧн нин тшӧктыліс разьны изъя горсӧ, вӧчны выль нога, кӧрт пача пывсян. Сэні ломтігкостіыс и пывсьӧны, оз ков ваймӧм виччысьны. Но папыс жалитіс изъя горсӧ: сійӧ пӧ сетӧ кос да пӧсь сынӧд, став висьӧмсӧ ньылӧмӧн вӧтлӧ.

Пескыс пывсян кӧджас вӧлі дасьтӧма папыслӧн. Коліс сӧмын ю дорысь ва катлыны да ломтыны. Пуктісны дадь вылӧ неыджыд, кык ватлан ва тӧрмӧна, вевта пельса, да вайисны гор вылын сулалысь пӧртйӧ ва. Нӧшта на лэччылісны кӧдзыд вала. Федялы тайӧ уджыс зэв на и сьӧлӧм серти вӧлі. Быд пӧрйӧ, кор матыстчыліс юкмӧс дорӧ, сійӧ пидзӧсчанясьӧмӧн видзӧдіс ваас: оз-ӧ тыдовтчы сэтӧн чери либӧ Васа.

— Мам, а мыйла юкмӧсӧн шусьӧ? Юыс гӧгӧрвоана, а мыйла мӧс? — юасьӧ Федя васӧ гумлалігмоз.

— Миян коми кывным уна нэмъясӧн ёна вежсьӧма. Уна роч кыв пырӧма, а важся коми кывъясыс вунласьӧмаӧсь. Мӧс — важ кыв, сылӧн вежӧртасыс — ва петанін, ключ. Шуам, Мӧскаты ним. Быттьӧ пӧ мӧс сэтчӧ вӧйлӧма. Тайӧ абу сідз. Тайӧ тыас эмӧсь ключьяс, ваыс сӧдз да кӧдзыд. Сійӧн и Мӧскаты — ключьяса ты, — велӧдӧ Татьяна Васильевна писӧ.

Тадзи, сёрнитігмоз, мама-пиа ломтісны пывсянсӧ, гоз-мӧдысь лӧдсалісны кос кыдз пескӧн, и со — жарыс нин онялӧ пытшкас. Регыд сэсся ваймис пывсянныс. Мамыс корис писӧ:

— Но, Федя, вай лӧсьӧд вежсян кӧлуйтӧ да петав Марпа бабла, а ме лэчча, васӧ дасьта. Марпа бабтӧ пывсьӧда да татчӧ, миянӧ, вайӧдан, сэсся ачыд лок, тшӧтш пывсям. Бӧрас ӧтлаын чай юам.

Федяӧс мӧдысь корны оз ков, сійӧ пыр и тӧвзис бабысла. Колльӧдіс горулӧ, пывсьӧм бӧрас вайӧдіс гортас.

— Ок, пиукӧй, ыджыд и аттьӧ тэныд, шань мортӧй, — пӧрччысигмозыс шуаліс баб. — Ок и лӧсьыд, став лысьӧмӧй бабыслӧн небзис, лолӧй кокняммис. Но мун, лэччы, пывсьы, а ме шойччышта, самӧвар чутка, локтігкежланыд дась лоӧ.

— Эн ноксьы, бабӧ, вод да куйлышт. Миян ставыс дась, сӧмын пачысь перйыны колӧ. Локтам да пызансӧ лӧсьӧдам, — шуис Федя да котӧртіс пывсянӧ.

Федя мамсьыс эз яндысь, мӧдарӧ на, радейтіс сыкӧд пывсьыны. Батьыс сійӧс ыджыдӧс моз чорыда швачӧдліс корӧсьӧн, а мамыс небыдика, мелі кывъяс шуалігмоз.

Пывсян бӧрын Татьяна Васильевна перйис пачысь пӧжӧм йӧв, небыд рысь, пражитӧм чери да йӧла проса рок, и найӧ пуксисны тшаюйтны. Коркӧ Федя юаліс мамыслысь, мыйла шуӧны «чай юам», а пызан вылӧ ставсӧ лӧдӧны-тэчӧны, дас мортлы тырмас. Мамыс серӧктіс да висьталіс, татшӧм пӧ коми йӧзлӧн ӧбичаыс, медым дасьтыны пӧтмӧн сёян-юан. Вермас ӧд и гӧсть локны, туй выв морт, мед эськӧ быдӧнӧс вердны-удны. Сёйтӧг ни ӧти мортӧс керкаысь эз лэдзлыны. А видзаалӧны тадзи: «Лок пыр, бур мортӧ, шойччы-шонтысь, чай-сакар миянлысь видлы». А чай дінад ассьыс ин аддзӧны и яя шыд, и рок, и пражитӧм чери да картупель, шома кӧчан, сола тшак да чери тасьтіяс. Дерт, и кӧвдум-шаньгатӧг да чериняньтӧг чай юӧм эз кольлы.

Ӧні Федя, мудзтӧдзыс пывсьӧм бӧрад, нуръясис да пызан сайсьыс вугралігмоз нин петіс. Водыштіс диван вылӧ да кутіс кывзыны мамыслысь да пӧчлысь варовитӧмсӧ. Талун мамыс пасьталӧма выль, гӧрдоввиж дзоридзьяса небыд фланель платтьӧ. Быдмӧм юрсиыс лӧсьыда шылькнитчӧма пельпом вылас. А чужӧмыс пывсьӧм да чай юӧм бӧрын банйӧма, ачыс нюмъялӧ. Дзик шонді кодь.

И друг Федя гӧгӧрвоис: татшӧм мамыс сылы медся муса, колана, мича. Татшӧмӧн и рисуйтас, удитас на мамыслӧн праздникӧдз, да серпассӧ и козьналас. Марпа бабсӧ тшӧтш серпасалас и. Артмас-ӧ? «Артмас, артмас...», — быттьӧ шуалӧ Марпа пӧч, но тайӧс Федя вӧталӧ нин. Дзикӧдз ойбыртіс. Весиг эз кывлы, кыдзи локтіс папыс да нуис писӧ ичӧт жырйӧ, аслас крӧвать вылӧ.

ЯНА

Федяяс виччысисны Феняӧс интернатысь тувсов каникул вылӧ, а сыкӧд тшӧтш тӧдтӧм, Яна нима роч нывкаӧс. Сійӧ пӧ весиг коминас оз куж сёрнитны, гижліс чойыс. «Но нинӧм, — мӧвпалӧ Федя, — велӧдам. Ме тай кужа рочнас. И сёрнита, и лыддьыся, и гижа. А мыйла нӧ Янаыс оз куж? Кыдз нӧ сійӧ комияскӧд сёрнитӧ? Век рочӧн?»

Федя кӧсйис сувтӧдны син водзас тӧдтӧм нывкаӧс, но некыдз эз вермы. Эз весиг тӧд, кымын арӧса Янаыс. Фенялӧн нывъёрт да, сідзкӧ, ар дас кыка. Овыс — Черных. Сідзкӧ, сьӧд либӧ пемыдруд юрсиа, сьӧд синма, мугов чужӧма. А тушаыс? Феняысь, гашкӧ, кузьджык. Янаыс ӧд лунвылысь, войвылас регыд на олӧ, а шоныд лунвылад ӧдйӧджык пӧ быдмӧны. И Феняысь, дерт, кызджык. Вареникъяснад да нӧкъя блинъяснад сӧвмис, кӧнкӧ. Чойыс гижліс, мый буретш тайӧ сёянсӧ Яна медъёна радейтӧ. Вареникъяссӧ вӧчалӧны вишняӧн, а блинъяссӧ пӧжалӧм бӧрын тэчӧны вевсьӧн-вевсьӧн джуджыд рачӧ, кисьтӧны сук нӧк да пражитӧны. А гашкӧ, дзик кыз Янаыс? Толик кодь тупыль? И друг Федя син водзын сувтіс Толик моз жӧ кызіник, польдчӧм бан бокъяса да вом доръяса нывка... Быр-р-р... Кезнитӧдіс быдӧн Федяӧс. Толикыс Толик и эм, сійӧ эз вермы лоны мӧд пӧлӧсӧн. Федя шпыньмуніс весиг, кор думсьыс аддзис ассьыс ёртсӧ чурвидзысь ордлыяса, вӧсни тушаа зонкаӧн. Рисуйтны кӧ, артмас серамбана серпас, ставӧн ваксьыны кутасны.

Нӧшта Федя эз кӧсйы, медым Янаыс вӧлі Вера кодь китшкысь катшаӧн. Вомсӧ ӧд сійӧ оз тупкыв, кӧть зургы сэсся, мед ланьтас. И тышкасьлісны корсюрӧ нывкаыскӧд, но Вераыс пыр вермыліс Федяӧс. Нӧшта на вӧсниа да лёкысь чилзігмоз, быттьӧ нӧйтӧны сійӧс, а оз Федяӧс. Но и Вера, гача нывка сійӧ.

А Янаыс... Нимыс кутшӧм тешкодь, абу комияслӧн кодь. Сідз, нывка локтӧдз, эз и вермы зонка роч нывкаӧс син водзас сувтӧдны. Сӧмын Черных ов сертиыс чайтіс сійӧс сьӧд юрсиаӧн да мугов чужӧмаӧн. А аддзис да... вомыс калькмуніс.

Кор нывкаяс воисны интернатысь гортас да петкӧдчисны пальтояснас, ныр вылӧдз лэдзӧм шапкаяснас — март помнад кӧдзыд на — нывка нинӧмӧн эз торъяв мукӧдъясысь. Тушаыс тай Феняысь юр джынйӧн ичӧтджык-а.

А сэсся нывка пӧрччысис. Вот сэки паччӧрсянь гусьӧнмоз кыйӧдчысь Федялӧн вомыс и калькмуніс шемӧсысла. Сійӧ быд ногыс мӧвпаліс, но татшӧмсӧ аддзыны эз чайт. Нывкаыс вӧлі... рыжӧй! Но кутшӧм! Зарни рӧма, гӧрдов чикыльяса гыалысь сук юрсиа, яръюгыд лӧз гырысь синъяса, еджговруд кузь синлысъяса. А ичӧтик ныр вылас да бан бокъясас чиктылісны-радлісны берин чутъяс.

Ачыс Феня моз жӧ джинсыа да шоныд свитера. Ичӧтик, косіник, вӧсни ки-кока — дзик пыста кодь. «Абу тай ёна и быдмӧма лунвылад», — жалитыштіс ас кежсьыс Федя, нывка вылӧ пыр на занавес сайсянь кыйкъялігтыр. Видзӧдӧ, а тайӧ краля дінас бать-мамыс и Феня гӧгралӧны, быд ногыс гӧрд пыста водзын леститчӧны. Федя весиг мӧдарӧ бергӧдчис татшӧм серпассӧ аддзӧм бӧрын. «Йӧйӧсь кӧ-а, — мӧвпалӧ, — мый сэні ноксьӧны, быттьӧ эз интернатса нывка, а мӧд муысь принцесса локтіс. Ёна тай колӧ! Менӧ вунӧдісны и. Но мед! Мед чайтӧны, мый ме узя».

Но Федяӧс дыр кежлӧ эз вунӧдны. Первой мамыс корис:

— Пиук, волы, тӧдмась. Коді миянӧ локтіс!

«Коді локтіс, коді локтіс... — нерыштіс ас кежсьыс мамсӧ зонка. — Пыста, коді сэсся». И зонка кыв эз сет, чӧв оліс аслас дзебсясянінын.

Сэсся Феня эз виччысь да ур моз жбыркнитіс паччӧрӧ, уськӧдчис вокыс вылӧ, чабыртліс весиг бан боксӧ.

— Вокӧ, тэ тай зэв бура видзаалан гӧстьясӧс! Гажыд эз мӧй быр? Ноко, лэччы, лэччы ӧдйӧ!

Но Федя кинас и кокнас пыксис, эз сетчы. Сэки Феня, йӧйыд, горӧдіс:

— Янка, иди сюда, на паччӧр! Посмотри — Федька тут прячется!

Но вот, эз тырмы ещӧ, мед пыстаыс татчӧ кайис. Ачыс лэччас, а то дзикӧдз янӧдасны. Федя дугдіс пыксьыны, лэччис смела да сувтіс нывкалы воча. Пӧшти ӧтсудтаӧсь сулалӧны. Часлы, мыйкӧ рочӧн шуас. Кисӧ нюжӧдіс и.

— Ну, чао-привет, пыста! — нем виччысьтӧг шусис зонкалӧн.

Мамыс шай-паймуніс быдӧн, некыдз эз чайт, мый Федя тадзи, нерсьӧмӧн, чолӧмасяс.

— Ой, здравствуй, Федя! Вот какой ты! Меня Яной звать. А что это — пыста? — ньӧти дӧзмытӧг шыасис нывка, нюмдыштіс да кутліс Федялысь чургӧдӧм кисӧ.

Аслас киыс ичӧтик, небыдик, шоныд. И сэтшӧм сьӧлӧмсянь Яна топӧдліс зонкалысь кисӧ, мый Федялы эз ло лӧсьыд ас вӧснаыс. Со и пельясыс, сэсся чужӧмыс кутісны ӧзйӧмӧн ӧзйыны. И Федя эз тӧд, кытчӧ воштысьны. Но Янаӧс ылӧдіс нин чойыс, петкӧдліс мыссян доз да висьталіс:

— Не обижайся, Яна. Федя у нас хороший, просто немного странный, не как все. А пыста — это синичка по-коми. Он у нас всем прозвища дает. Говорит, так он видит, дурачок. И рисует всех такими. Мама у него — солнце, папа — Пера богатырь, я — белка. А еще друзья у него есть. Верка — сорока-катша или сырчик-трясогузка. Толик — туган, ну это по-коми верхушка сосны. А еще есть такой герой, богатырь Туган из коми легенды «Яг морт». А когда ссорятся, он Толика «кыз тупыль» называет. Толстяк, значит. А дом у нас — керка-пӧль, дом-дедушка. Старый потому что.

— А как он сам себя называет, интересно? — юасьӧ Яна ньӧти майшасьтӧг.

Но Федя эз мӧд кывзыны ас йывсьыс, кватитіс пальтосӧ да «Ме Толик дорӧ» шуигмоз уськӧдчис посводзӧ. Мунас ӧні ёртыс ордӧ да норасяс, кутшӧм тайӧ Янаыс, быттьӧ ас гортас локтіс! Рочыд роч и эм. Збой!

Толикыслы «пыста» йылысь висьтасис, быд ногыс нерис, вежнясьӧмӧн петкӧдліс, кутшӧм быттьӧ нывкаыслӧн лёзь юрсиыс, ачыс вӧсни ки-кока, сюсь синма. Пыста — пыста и эм. Толикыс дыр видзӧдіс сылӧн вежнясьӧм вылӧ, сэсся друг кыз гӧлӧсӧн, зэв эскӧдана крапкис-шуис:

— Нӧйтам, ӧдйӧ бӧр лэбас аслас интернатӧ! — сэсся нерыштіс на. — Пы-ы-ыста!

Сэк сӧмын Федя ланьтіс. Сійӧ ньӧти эз кӧсйы нӧйтны Янаӧс. Эз и кӧсйы, медым нывкаыс бӧр муніс интернатас. И эз гӧгӧрво, мыйла сійӧ тадзи норасьӧ да вежнясьӧ Толик водзас. Тӧдіс сӧмын, мый ньӧти оз кӧсйы дойдны нывкасӧ. А аслас тайӧ здукӧ пытшкӧсас быттьӧ мыйкӧ доймис. А мый, эз тӧд...

«ДЕРЕВЯННАЯ СТАРИНА»

И лун, и мӧд, и коймӧд кыліс Федя морӧссьыс доймӧмсӧ да сідз эз и гӧгӧрво, висьӧм тайӧ али мыйкӧ мӧдтор. Эз нин сэтшӧма ӧтдортчы Янасьыс, но и матӧ эз сибӧдчы, пыр быттьӧ бокынкодь вӧлі. Эз дойд ни, эз нерсьы ни. Да и мамыс на казьтыштіс зонкалы, кутшӧм шог суис неважӧн нывкаӧс, и оз ков сійӧс нӧшта на дойдны. Медводдза рытнас Федялӧн нерсьӧм да ыждалӧм бӧрын шуис:

— Ме гӧгӧрвоа тэнӧ, пиук. Ог скӧрав. Но тэ некодӧс эн вежӧгты шудтӧм нывка дінас, ло сыкӧд меліджыкӧн, мед шоналас да небзяс. Аддзан, кутшӧм сійӧ молодеч. Ас пытшкас ставсӧ кутӧ, оз петкӧдлы некодлы, а ме первой вояс на кылі, кыдзи сійӧ вольпасяс гусьӧникӧн бӧрдіс.

И юрӧдыс на малыштіс Федяӧс, быттьӧ сійӧс на и бурӧдны колӧ. Федя эськӧ гӧгӧрвоис ставсӧ, но эз куж и эз вермы лоны нывка дінӧ меліӧн, мыйкӧ кутіс сійӧс. Радейтана серпасъяса альбомсӧ эз петкӧдлы ни, дзебис на пыдӧ, мед Яналы син улас оз сюр.

Кыдзи и овлӧ сиктса комияслӧн, выль гӧстяӧс волісны видлыны матыссаяс. Пыралісны гӧстинечӧн Марпа баб, Толик да Вера. Сэсся корисны ас орданыс быть волыны. Яна эз и пыксьы. Лунъяс колисны гажаа, тӧдлытӧг. Сійӧ овлӧма лунвыв карын, сэсся Джуджыдъяг посёлокын. И тані, ичӧтик грездын, сылы ставыс вӧлі выльӧн да аслыспӧлӧсӧн. Весиг горъя пывсянтӧ медводдзаысь тані аддзис да сэтшӧма шензис. Шуис сэки, пывсян бӧрас:

— Тётя Таня, как все у вас интересно! Такие у вас дома старинные, а лиственницы огромные и тоже старые, а баня — просто чудо! Как в сказке! Какая тут у вас древняя старина!

Федялы забеднӧ лоис, мый Янаыс тадзи увтыртӧ налысь грездсӧ, сійӧ эз гӧгӧрво, мый Янаыслы, мӧдарӧ на, ставыс лӧсялӧ. И буркнитіс-шуис:

— Какая деревянная старина? Весна придёт, мы новые деревья посадим, лиственницы. Мама и папа говорят, тут всё время лиственницы любят сажать. И будут деревья новые, а не старина деревянная.

— Да не понял ты меня, Федя. Не деревянная, а древняя старина! Это же красиво! — дорйысис нывка.

— Ну да, красиво, а я что говорю? — эз сетчы зонка. — Деревья посадим, и красивше будет.

Пызан сайын ставӧн гажаа серӧктісны. «Но вот, бара мыйкӧ мӧдарӧ шусис», — мӧвпыштіс Федя да шуис аслыс, мый сэсся оз кут сюйсьыны сёрниӧ, чӧв олас. И збыль, пырджык чӧв оліс. А гортсаясыс шензисны, кутшӧм лӧнь Федя лоис, кыв он кыскы. Но эз и дӧсадитчыны юасьӧмъяснас. Сӧмын батьыс такӧдіс:

— Нинӧм, зонмӧ, эн шогсьы. Менам татшӧмторйыс коркӧ вӧлі жӧ, но тэысь сёрӧнджык, ыджыдджык ме сэки вӧлі. Быдман да гӧгӧрвоан. Унаысь на лолӧ и.

А мый вӧлі да унаысь на лолӧ, батьыс сідз эз и висьтав...

ГОРАДЗУЛЬ

Медводз чоя-вока нуӧдлісны Янаӧс Марпа баб ордӧ. Керкаыс сылӧн, гашкӧ, наысь на важджык. Ӧти ыджыд вежӧса. Веськыдладорас ыджыд, паччӧра да пӧлатя пач, сы дорті пачводзсӧ сайӧдыштӧма посни дзоридзьяса сӧстӧм занавесӧн-тупкӧдӧн. Шуйгаладорас — важся паськыд пу крӧвать, сы весьтӧ тувъяс вылӧ косьтӧмӧн ӧшлӧма быдсяма бурдӧдчан турун розъяс. Найӧс аддзӧм бӧрын роч нывкаыд пыр и юаліс:

— А веники зачем здесь?

— Абу веник, а турун, лечить людей, — кыдз вермис, кыдъя рочӧн висьталіс Марпа баб да кутіс петкӧдлыны, кутшӧм турун мыйысь. — Эта от головы, эта — от жара, биа висьӧмысь, тут — от ноги, от живота...

Висьталіс на эськӧ, но Феня бурджыка гӧгӧрвоӧдіс нывкаӧс:

— У нас бабушка Марфа — лекарь, как врач, и даже лучше. Она от всех болезней лечит травами. Вот Федю вылечила. Он ведь, когда родился, чуть не умер, а бабушка спасла. Какие тут врачи, в нашей деревушке.

— Да, чуть не умер, — асьсӧ жалитӧмӧн да нывкалысь воча кыв виччысьӧмӧн нурбыльтіс Федя, сэсся содтіс: — И потом много раз умирал...

— Ой, бедненький Федечка, а я и не знала, — Яна весиг ыджыд моз топӧдліс ас бердас зонкаӧс.

О, кутшӧм рад лои Федялы, но эз петкӧдлы, мынтӧдчис нывка киясысь. А Марпа бабыс водзӧ нин нуӧдіс челядьӧс, пызан дорӧ. Ыджыд, ас вӧчӧм пызансӧ гӧгӧртӧмаӧсь лабичьяс, а весьтас — ӧбразъяса Ен пельӧс, сэні жӧ куйліс Ен небӧг — Библия. Марпа баб пошкигтырйи, сьӧкыда тапъяліс, пуксьӧдаліс челядьӧс лабич вылӧ, ачыс кежис пачводзӧ дасьтыны сёян-юан. Яна сюся видзӧдіс гӧгӧр, казяліс стенмын ӧшалысь уна снимок да бара на чуймаліс:

— Ой, как тут их много! И старые, желтенькие уже. А дорожки на полу такие яркие и красивые! Классно!

— Джодждӧраяс сама кыи, люблю красивое, мед мича, югыд вӧлі. Тэ, мада нывка, мича жӧ: зарни горадзуль юра, пӧлӧзнича синма, катшасин синлысъяса, — роча-комиасьӧ Марпа баб.

— Что бабушка говорит, Федя? — телепит ставсӧ тӧдны Яналы да юасьӧ зонкалысь. Феня сэк кості отсасьӧ баблы.

— Что говорит? Ромашка, говорит, василёк, купальница... — вуджӧдӧ Федя. Быдмӧг нимъястӧ сійӧ комиӧн и рочӧн бура тӧдӧ.

— А-а, поняла, это ведь тоже лекарственные травы, про них бабушка говорит, да?

— Да, да, травы, — нурбыльтіс Федя да чӧв олӧ.

Оз ӧд висьтав, мый горадзульнас, катшасиннас да пӧлӧзничанас Марпа баб ыдждӧдлӧ сійӧс, нывкаӧс. Татшӧмтор кӧ висьталас, яналас. Пель йывъясыс сотчӧны нин. Ачыс син бӧжнас кыйкнитліс орччӧн пукалысь Яна вылӧ да син водзас и збыль сувтісны тайӧ гожся дзоридзьясыс. Но дзоньнас гӧрдӧдны эз удит: Марпа баблӧн чӧсмасянторъяс меститчисны пызан вылӧ, ачыс тшӧтш пуксис челядь дорӧ.

Медъёна роч нывкалы сьӧлӧм вылас воис войвыв вотӧс — мырпом, кӧть оз и орӧдчы.

«Мый и радлӧ? Вотӧс — вотӧс и эм, — бара ас кежсьыс мӧвпалӧ Федя. — Тадзтӧ бабыслысь став мырпомсӧ бырӧдас. Но мед, миян гортын уна эм, колӧ мамлы тшӧктыны пыртны мырпомсӧ пыстаыслы, мед пӧттӧдз чӧсмасяс. Гӧбӧчын и варенньӧ, и компот, и сакара, и ас сӧк пиын мырпомыс эм. А то вишня да вишня. Мырпомыс бурджык на. Сыысь, гашкӧ, и варениктӧ позяс вӧчны, колӧ мамлысь юавны».

Тадзи мӧвпаліс Федя да, Яна вылӧ видзӧдӧмӧн, тшӧтш вом тырнас кутіс панявны чӧскыд мырпомсӧ, быттьӧ первойысь аддзис.

ВЕНЗИСНЫ

Марпа баб бӧрын мӧд луннас шуисны ветлыны Вераясӧ да Толикъясӧ. Нывкаыс дінӧ водзджык пыраласны, сэсся сыкӧд тшӧтш мунасны Толикъясӧ. Ӧні, кор сылӧн батьыс эновтіс юӧмсӧ, зонка оліс гортас. Да и Марпа баб нёрпалігас эз нин вермы важ мозыс дӧзьӧритны-вердны муса гӧгаписӧ-внуксӧ, аслыс коліс отсӧг. Толик мукӧддырйи ылавліс да вунӧдліс бабыс йылысь, но локтас кӧ, быть ставсӧ вӧчліс. Весиг тасьті-пань да джодж мыськыліс. Мыжсьыс вештысьліс.

Вераясӧ локтісны лун шӧр кадӧ нин. Нывкалӧн радыс! Оз тӧд, кытчӧ и пуксьӧдны выль мортӧс, мый петкӧдлыны, кыдзи чӧсмӧдлыны. Ноксьӧ-бергалӧ, катша моз китшкӧ, а тӧлкыс абу. Сідз эськӧ и бергаліс ӧтарӧ-мӧдарӧ, эз кӧ Феня ӧлӧд:

— Вера, ӧвсьы нин. Ми локтім тэнӧ Толикъясӧ нуӧдны. Вай мӧдӧдчы нин, пасьтась.

— Феня, мый тэ? Тадзи, пызан сайӧ пуксьӧдтӧг? Ог жӧ, мамӧ менӧ ульӧн сёяс. Часлы, менам шкапын шоколад вӧлі, — воча шуис Вера да уськӧдчис кухня шкап дорӧ. Восьтіс ӧти жыр, мӧдӧс, кыскыштіс кудъяссӧ, а шоколадыс эз сюр.

— Ой, вунӧді! — плешкас шлопкис кинас. — Асывнас на сёйи ӧд. Но ничего, Яна, мы сейчас к маме в магазин пойдём, она нам десять шоколадок даст!

— Да не надо ничего, Вера. Не люблю я шоколад. Пошли к Толику, — водзсасис Яна.

— А-а, не любишь? А мороженое любишь? Зна-а-аю, любишь! — эз ӧвсьы Вера да комиӧн, Янаысь гусьӧнмоз, шуыштіс чоя-вокалы: — Вунӧді, талун мороженӧй вайисны лавкаӧ. О! Мамӧ гӧстя дырйи дасӧс миянлы сетас. Менӧ эськӧ и матӧ эз сибӧд, полӧ, мый лавкасӧ кушта. А Яна дырйи оз пыксьы.

Феня серӧктіс татчӧ, а Федя тувкнитіс китшкысь нывкалы мышкас, пасьтась нин пӧ, йӧй катша. Сӧмын Яна нинӧм эз гӧгӧрво, но эз удит нинӧм юавны: Вераыс тӧв ныр моз нин петкӧдіс ставнысӧ ывлаӧ да тэрмӧдлӧмӧн нуӧдіс мамыс дорӧ.

Но жаль, мороженӧйтӧ каникул вылӧ воысь челядь, да и верстьӧяс тшӧтш, нюлыштӧмаӧсь быттьӧ — некӧн эз тыдав. Вера нюжмунӧм чужӧмӧн юаліс мамыслысь:

— Весиг ӧтиӧс эн коль? Аслад ӧтка, рӧдимӧй нывлы эн коль? А ме ӧд гӧстякӧд локті, висьтавлі ӧд — тайӧ роч Яна. Сылы эн жӧ коль?

Мамыс лэптыштіс пельпомъяссӧ — эг пӧ. Сэсся серӧктіс да шуис Яналы:

— Эн видзӧд сідз Вера вылӧ. Сійӧ сэтшӧма юмовсӧ радейтӧ, танк моз нырӧ. Коли ме тіянлы мороженӧйтӧ, ставныдлы коли. Сӧмын ывлаын эн сёйӧй, висьманныд.

И быдӧнлы, Толиклы вылӧ тшӧтш, сетіс ылысь вайӧм пломбир. Кианыс мороженӧйӧн и котӧртісны Толикъясӧ. Вера эз терпит да мунігас джынсӧ нюлыштіс.

А Толикыс гӧстя дорысь мороженӧйыслы ёнджыка радліс. Мороженӧйсӧ сёйисны, да Толиклӧн мамыс пӧжӧм йӧла чайӧн да сӧмын на пӧжалӧм пӧсь аладдяӧн чӧсмӧдліс. Сэсся мӧдӧдчис кытчӧкӧ да челядьӧс колис ас кежсьыныс.

Пызан сайын Федя друг казяліс, мый Толикыс, кыз тупыльыс, Яналань матыстӧ то нӧкъя, то варенньӧа дозмукъяс, сэсся видзӧдӧ, кор сылӧн блюдйысь бырас банйӧм аладдяыс, да ачыс содталӧ-пукталӧ нывкалы. Регыд став сёяныс нин лои Яна дорын, ныр улас. Тайӧс аддзӧм бӧрын Федя дӧзмис да чеччис пызан сайысь, видзӧдліс выя льӧбъяса ёртыслӧн чужӧм вылӧ да скӧрысь петіс мӧд вежӧсас. «Но и друг, нӧйтны кӧсйыліс Янасӧ, а ачыс... Нямгӧ сӧмын сы водзын... И тайӧ леститчӧ пыста дінас», — курыда мӧвпаліс да скӧраліс Федя.

А Толик эз быттьӧ и казяв сылысь петӧмсӧ, сідз и бергаліс роч нывка гӧгӧр, сідз и выйӧн мавтіс. Но и но, быттьӧ кань нӧк кашник гӧгӧр. Вот и ёрт! А Федя пукаліс мӧд вежӧсас ӧтнас да гажтӧмтчис. А пӧтӧм челядь, кылӧ, мыйыськӧ ворсісны нин мӧдарас. Сэсся «Дендиӧ» босьтчисны.

Коркӧ сэсся Толик казяліс жӧ да локтіс видлыны вошӧм, чӧв олысь ёртсӧ.

— Тэ нӧ мый, Федя, татчӧ йӧжгыльтчин? Кынӧмыд висьмис али мый? Нужниксӧ тӧдан ӧд кӧні... Мун, петав, — зэв збыльысь шуис Толик.

— Мы-ы-й? Тэныд сӧмын сёйӧм да нужник колӧны. Ачыд мун петав! Ылӧг! — скӧрысь вочавидзис Федя.

— Мый нӧ лоин? — луп-лапкерис синъяснас ёртыс.

— Мый? Он тӧд? Шулін тай — нӧйтам пыстасӧ, а ачыд сы гӧгӧр и бергалан. Со мый! Вузӧс тэ! И эз тіянӧ сійӧ лок, а миянӧ, мый сэн нювсян?

— А-а, да тэ вежӧгтан, другӧ! — серӧктіс Толик.

— Ме? Ме? Ме вежӧгта? Да ме... — кабырсӧ топӧдӧмӧн ёртыс водзын сулаліс да мӧмъяліс Федя.

— Мӧмӧт тэ, вот коді! — крапнитіс Толик, но водзӧ нинӧм эз удит шуны — ёртъяс воисны косьӧ. Чӧла, пошкигтыр зупйӧдлісны ӧта-мӧдсӧ. Толик, дерт, ыджыдджык да вынаджык, ӧдйӧ и вермис Федяӧс, уськӧдіс джоджас, вылас пуксьӧмӧн кутіс горзыны:

— Кутан ещӧ, мӧмӧт, кутан?

Мӧдарас нывъяс кылісны налысь ноксьӧмсӧ да уськӧдчисны юасьны, мый накӧд лоис. Толик и вомсӧ паськӧдіс да висьтасис:

— Тайӧ тай пыста вӧсна уськӧдчис, мӧмӧтыс. Ме-е пӧ, м-е-е. Баля! Ме-е-ж!

Федя ырыштчыліс на сы вылӧ, но нывъяс эз сетны налы тышкасьны, мӧдӧдісны мыссьыны да бурасьны. Мыссигас нин Федя кыліс Яналысь гӧлӧссӧ.

— Что случилось, девочки? Я ничего не поняла, а вы? За что они подрались-то?

— Дон Жуаны, вот и подрались. Тебя не поделили, — вочавидзис Феня.

— Из-за меня? — чуймис нывка. — Значит, я такая популярная в вашей деревне? А я думала, рыжих не любят.

Мый сійӧ «Дон Жуаныс», Федя эз тӧд, «популярнаясӧ» — ылӧсас, а мый «Из-за меня» — Яна вӧсна косьыс пансис — гӧгӧрвоис, да яндзимысла муртса му пырыс эз мун. Эз и кольччы сэсся ворсны да ӧтнас мӧдӧдчис гортас. Петігас, кылӧ, Вера на сюйсис:

— Третий лишний! Тили-тили-теста!

«Ачыд тэ «теста», часлы, и тэныд на сюралас», — скӧра ас кежсьыс шуаліс Федя гортас мунігмоз. Но кымын матысмис керкаыс, сымын надзмӧдіс ӧдсӧ. Друг сылы лои забеднӧ, татшӧм мисьтӧма ставыс помасис да, и сійӧ эз пыр гортас, а кайис сараяс, дзебсис кос турун пиӧ да бӧрддзис.

ФЕДЯ ВОШИС

А сы кості Федяӧс воштісны. Нывкаяс, кылӧ, локтісны нин гортас. Посводзсьыс шыяс кылӧм бӧрын зонкалӧн дількмуніс сьӧлӧмыс: «Со ӧд, пӧттӧдз ворсісны да вӧлись локтісны. А ме быттьӧ и абу. Вунӧдісны. А ог и пыр, мед сэсся корсьӧны». Тадзи думыштіс, а аслыс эз ло лӧсьыд: друг ньӧти сійӧ налы оз ков, да оз и кутны корсьны. Кынмыны ӧд нин кутіс. Турун пиас дзебсьӧм бӧрын шоныд вӧлі, а ӧні ыркыд нин лоис, киясыс кутісны гегдыны, сэсся и кокъясыс. Видліс вӧрӧшитчыны, но туруныс кутіс шура-шаракывны, да Федя ланьтіс — кыласны ӧд! Но регыд мысти ӧдзӧс воссис да кодъяскӧ петісны. Мамыслысь гӧлӧссӧ керка пытшсьыс кыліс и:

— Ті, Феня, ывласьыс видзӧдлӧй да Марпа баб дінӧ ветлӧй. Сэні, кӧнкӧ, пукалӧ.

Нывъяс петісны ывлаӧ, а Федялы тайӧ и колӧ — мед корсьӧны... Оз петкӧдчы, мед кӧть йизяс татчӧ.

Бара пессьыштіс турун пиас, шонтысьыштіс. Мышкыс нин кутіс кынмыны. Друг, кылӧ, кодкӧ дінас мӧд шура-шаракылӧ. Крыса али мый? Федя муртса эз звиркнит повзьӧмысла, но кыліс «няв» да гӧгӧрвоис: каньпиыс нывъяскӧд тшӧтш чепӧсйӧма да розьӧд сараяс пырӧма.

— Рудук, дзолюкӧй, лок, кысук, лок, — рад весиг лои Федялы, мый абу ӧтнас. Каньпи пыр и тувкнитчис Федя бердӧ, кутіс ниртчыны да гораа кургыны.

— Т-с-с, эн сэтшӧм гораа, — ӧлӧдіс Федя, быттьӧ ичӧт ловлысь кургӧмсӧ кодкӧ вермас кывны. Но аслас сьӧлӧмыс бурмыштіс, мый ӧні дінас мӧд ловъя лов, да весиг кутіс гусьӧн норасьны: — Аддзан, Рудук, ӧтнам ме коли. И некодлы ог ков. Тэысь кындзи. Мунісны Марпа бабъясӧ. Сэтчӧ на йӧрмасны. Но и мед, ме тані турда да кула. Сэсся ставӧн кутасны жалитны: и Яна, и Феня, и Вера. А эсійӧ... кыз тупыльыс мӧмӧтӧн менӧ нимтіс, а ачыс мӧмӧт кодьыс и эм, кык кыв шуны оз вермы.

Но Рудук эз ёна дыр кывзы, мынтӧдчис да кытчӧкӧ пышйис. И Федя бара колис ӧтнас. Колӧ эськӧ чеччыны да тапъялыштны, асьсӧ кияснас бура швачӧдны, но зонка поліс, мый сэки ӧдйӧ сійӧс казяласны. Эз чеччы, сідзи кутіс мӧвпавны, мый водзӧ вӧчны. Гашкӧ, петны татысь ывлаӧ, быттьӧ ворсӧ сэні. «Оз ӧд ло лӧсьыд, аддзасны кӧ татысь, сераласны ӧд! — друг думыштіс зонка да гӧгӧрвоис, мый ачыс асьсӧ налькйӧ йӧртіс. — А гортӧ кӧ пырны? Сэки мамӧ сарай ӧдзӧс дзуртыштӧмсӧ кылас да гӧгӧрвоас, мый тані дзебсяся. Ог, некытчӧ татысь ог и вӧрзьы».

Посводз ӧдзӧс дзуртыштіс. Кок шы сертиыс Федя гӧгӧрвоис — папыс удж вылысь локтӧма. Недыр мысти бӧр нин петіс да муніс кытчӧкӧ.

«Со и папӧ муніс менӧ корсьны. Ӧні сюралас меным, йӧйлы», — ёнакодь нин кутіс майшасьны пикӧ воӧм Федя. Сэсся век жӧ гусьӧникӧн чеччис аслас пельӧсысь да кывзысьтӧм кокъяснас мӧдӧдчис сарай ӧдзӧслань. Сӧмын удитіс восьтыны сійӧс, кыдзи кильчӧ вылын кылісны гӧлӧсъяс. Папыс нывкаяскӧд!

— Гашкӧ, бӧр локтіс, видзӧдлам, — шуис папыс, — абу кӧ, ті кольччӧй, а ме нӧшта на кытшовта.

Но керкаӧ пырны эз удитны. Колӧ жӧ вӧлі лоны, мый накӧд тшӧтш посводзас тювкнитӧма Шарик да сюсь пельяснас кылӧма турунын шура-шаракылӧмсӧ: Федя буретш тэрмасьӧмӧн лӧсьӧдчис бӧр дзебсьыны турун пиӧ. Здук — и Шарикыс лэбыштіс нин сарайӧ восьса ӧдзӧсӧд: сійӧс Федя эз удит бӧрсӧ тупкыны. Пырис да увтігмоз уськӧдчис Федя дорӧ, кутіс летйыны соскӧдыс — вай пӧ ворсам.

Сэтчӧ и папыс нывкаяскӧд кайисны. Бисӧ ӧзтісны да аддзисны татшӧм серпас: турун пиысь джынвыйӧ тыдаліс Федя, а сы гӧгӧр чеччаліс да радпырысь увтіс Шарик.

— Но, зонмӧ, мый нӧ тані вӧчан? — скӧркодь гӧлӧсӧн юаліс папыс.

— Ме... Ме... — кутіс мӧмъявны Федя, сэсся юрас мыйкӧ воис да смела нин шуис, — а ме каньпиӧс корся, Рудукӧс! Кыс, кыс, Рудук!

— Сійӧн и турун пиас пырин? И важӧн нин корсян? — юаліс батьыс.

— О-о-г, — нюжӧдіс Федя да бара «кыснитіс».

И збыль, кыськӧ пельӧсысь на дінӧ тюрыштіс сувтса бӧжа, дзоля руд тупыль. Рудук!

— Тадз кӧ, лок пырам. Каньпитӧ босьт жӧ, — шуис батьыс да бергӧдчис. Сылӧн стрӧг гӧлӧсысь шӧйӧвошӧм нывкаяс тшӧтш мӧдӧдчисны.

Федялы воштысьны некытчӧ. Каньписӧ киас босьтӧмӧн зонка тшӧтш вӧрзьӧдчис, ас кежсьыс и Рудукӧс, и Шарикӧс, и ставсӧ пинялігмоз. Сійӧ тӧдіс нин, мый папыс оз кут сыкӧд сёрнитны, кыдзи пыр вӧчлывліс челядьлӧн прӧступитчӧм бӧрын. И кутас виччысьны, кор Федя ачыс матыстчас да висьтасяс. А мый Федя сылы висьталас? Мыйысь сійӧ мыжа? Федялы ньӧти эз вӧв окота лоны мыжаӧн. Сійӧ эськӧ эз пан косьсӧ, Толикыс мӧмӧтнас кӧ эз шу. Сэсся и нывкаяс кутшӧмӧсь. Йӧйӧсь ставныс!

Посводзас нин дузъялысь да яналӧм Федялысь кисӧ кутыштіс Яна да шуис:

— Федечка, не обижайся на нас, ладно? Мы все виноваты: и я, и Вера, и Толик. Феня тоже... Мы там все играли, а тебе было плохо... Одному.

Федя эз вочавидз. Сылы ӧд и збыль вӧлі сьӧкыд и гажтӧм. А Яна ӧтнас тайӧс гӧгӧрвоис.

Гортас Федя гӧгӧр батьыс кындзи ставӧн кутісны ноксьыны. Отсалісны пӧрччысьны. Мамыс пыр жӧ мӧдӧдіс сійӧс паччӧрӧ шонтысьны, а Феня катӧдіс сэтчӧ ӧмидза пӧсь чай, мед юас да шоналас. Бӧрас пӧ лэччан пызан сайӧ.

Но Федя эз лэччы, а куйліс да мӧвпаліс, мый аски ковмас сувтны батьыс водзӧ да висьтасьны. И нӧшта сійӧ мӧвпаліс Яна йылысь. Кутшӧм сійӧ бур нывка. И мича. Марпа бабыслӧн шуӧм серти кӧ, збыль видз выв горадзуль кодь. Колӧ серпасавны тайӧ дзоридзсӧ да козьнавны нывкалы аскомысь, интернатас мунігас.

ВАРЕНИКЪЯС

Асывнас Федя садьмис сёрни шыясысь. Кӧсйис лэччыны паччӧрысь, но эз вермы: став лысьӧмыс висьӧ, ачыс лигышмунӧма, вӧрзьӧдчынысӧ дыш. Тыдалӧ, жарджыка мамыс пачсӧ ломтӧма, да зонка пӧсьысла пӧжсьӧма ставнас. Часлы, куйлыштас да чеччас. Тӧрытъясӧ казьтыштіс да эз ло окота паччӧрсьыс лэччыны. Ковмас батьыслы висьтасьны. Гашкӧ на, и Яна дырйи. Мый вермас Федя шуны асьсӧ дорйӧм могысь? Куйліс да кывзысис.

— Вишняыд миян абу, а ми видлам пувйысь варениктӧ вӧчны, — висьталӧ мамыс.

— Гашкӧ, мырпомысь позьӧ? — юасьӧ Феня.

— Оз, мырпомыд небзяс да рок кодь лоас, а пувсьыд, ме чайта, позяс видлыны.

Сэсся, кылӧ, и Яна сюйсис сёрниӧ. Водзӧ рочӧн нин варовитӧны. Федя гӧгӧрвоис, мый Яналы гӧстинеч пыдди мамыс да чойыс думыштӧмаӧсь вӧчавны вареникъяс. Сылы окота жӧ лои лэччыны да отсасьны, но эз вермы.

Сэсся казялісны жӧ, мый Федя талун мыйкӧ дыр куйлӧ, да Феня жбыркнитіс паччӧрас.

— А Федя тай оз узь! Федя-пиӧ, чеччы жӧ, чеччы, — сьылыштіс чойыс да водзӧ на нюжӧдіс, — Федя-пиӧ, мыссьы жӧ, мыссьы, миян вареник пусис, пызан сайӧ лок пуксьы, лок пуксьы...

— Ог кӧсйы, — нориника нурбыльтіс вокыс.

— Ак тэ, дышпоз, он чеччы? Он мыссьы? Он пуксьы?

— О-о-ог, — бара нюжӧдіс Федя.

— А-а, сідзкӧ, тэнӧ гильӧдны колӧ!

И Феня босьтчис гильӧдны воксӧ. Сэки зонкалы быть лои лэччыны паччӧрысь. Но кокъясыс быттьӧ пӧрысь пӧльлӧн лигышмунӧмаӧсь, ӧдва и восьлалӧны. Кыдзкӧ-мыйкӧ мыссис да тшӧтш матыстчис пызан дорӧ отсасьны. Сэк кежлӧ бӧръя вареникъяссӧ нин вӧчалісны. Батьыс сэні жӧ шпыннялӧ. Талун шойччан лун, да сійӧ ставкӧд гортас.

И пиыслы нинӧм эз шу, эз весиг казьтышт тӧрытъясӧ. Быттьӧ нинӧм абу и вӧлӧма, быттьӧ пиыс некодӧс эз и шызьӧд турун пиын дзебсясьӧмнас. Федя мӧвпыштіс: кытчӧдз папыс оз юась, нинӧм оз и висьтав. Сэсся тшӧтш босьтчис кӧть ӧти вареник вӧчны. Но няньшом гӧгыль вывсьыс пувйыс гылаліс, чуньясыс эз кывзысьны, да вареник пыдди Федялӧн артмис нямыль. Ставӧн серӧктісны, а Яна бурӧдіс на зонкаӧс:

— Ничего, Федечка, первый блин комом. Конечно, пельмени легче лепить, там фарш не разбегается, а ягоды непослушные, всё норовят убежать.

Гажаа и помалісны уджсӧ, идралісны пызансӧ да кутісны виччысьны пӧсь вареникъяса медводдза тасьті. А кор сійӧ руаліс пызан вылын нин, ставӧн уськӧдчисны видлыны лунвыв-войвыв сёянсӧ. Мамыс нӧкъялыштіс на и. Пызан сайын кутісны сёрнитны лунвыв да войвыв сёян-юан йылысь. Яна вӧлӧма Мелитополь карысь, кӧні олісны и рочьяс, и украинечьяс, и мукӧд войтыр. И сэні пӧ ёнджыка юӧны фруктыа кӧдзыд компот, а тані — пӧсь чай. И пельняньтӧ найӧ радейтӧны жӧ. И Яна тӧдӧ нин, мый пельняньыс вӧлӧма войвывсянь, комияссянь. Ошйысис весиг.

— Я знаю, пель — ухо, мень получилось от слова нянь, хлеб, значит. Хлеб, похожий на ухо. И у нас вареники похожи на ухо, только на большое. Ну вот как у дяди Пети, — и нывка индіс Федя батьлӧн пель вылӧ. Бара серам пызан сайын.

А Федялы и серавнысӧ абу окота. И варениксӧ ӧдва кыкӧс нямляліс, кӧть ставӧн чӧсмасисны да ошкисны. Пувсӧ мамыс песокалыштӧма да юмов пӧ лоӧма, шуӧны, а зонкалы кажитчис, мый курыд-шома.

— Мыйкӧ талун Федя миян писка, оз и чӧсмась. Абу мӧй чӧскыд? — майшасьӧмӧн юасьӧ мамыс.

— Чӧскыд, — вочавидзис пиыс, но паньсӧ пуктіс, — ог кӧсйы сэсся, унмӧй локтӧ.

Сэк сӧмын мамыс да папыс гӧгӧрвоисны: мыйкӧ неладнӧ пиыскӧд, чужӧмыс кельдӧдӧма и. Мамыс видліс плешсӧ — пӧсь. Пыр жӧ нуӧдіс зонкаӧс пыді вежӧсас, а сыӧдз тшӧктіс нывъяслы:

— Нинӧм, ті чӧсмасьӧй. Федя миян висьлӧс детинка. Тӧрыт кынмис, буракӧ. Куйлыштас мед.

Мӧд жыръяс кутіс юасьны:

— Федя, кыті нӧ висьӧ?

— Некыті оз. Унмӧй локтӧ, — сӧмын ӧтитор и долис зонка.

Сэки мамыс пӧрччӧдіс дӧрӧмсӧ да гӧгӧрбок кутіс видлавны. Сэсся водтӧдіс да корис папсӧ. Федялӧн синъясыс асьныс куньсисны, но кӧть бать-мамыс гусьӧн сёрнитісны, ставсӧ кыліс.

— Петя, Федялӧн ӧд нерӧдъясыс бара пыкталӧмаӧсь. Та вӧсна, кӧнкӧ, и биаліс, жарысла сотчӧмӧн сотчӧ, — мамыс кӧть и зілис кутчысьны, но гӧлӧсыс тіраліс, — а врачыс шуліс, тадз кӧ лоӧ, пыр жӧ больничаӧ нуӧй, эн сёрмӧй, вирыс пӧ бара лёкмас. Ойя да ойя. Мый нӧ тайӧ? Збыль али мый вомидз, Марпа баб тай шуліс?

— Эн вай нинӧм абусӧ сӧр. Ме, йӧйыд, тӧрыт нӧшта на мортсӧ ӧбидиті, скӧралі. А-а, мый сэсся ӧні шуан... Аски асыв жӧ нывъяскӧд тшӧтш Джуджыдъягӧ лэччӧда, сэні больничаас бурдӧдасны, — воча шуис батьыс.

«Ог, ог кӧсйы, ог мун!» — кӧсйис горӧдны Федя, но вежӧрас ставыс кутіс веравны, сэсся сійӧ бура эз и гӧгӧрво, кӧні вӧтыс, а кӧні вемӧсыс. Эз и тӧд, мый воліс уколавны пельшӧр, а бать-мамыс войбыд эз вешйывны сы дорысь. И вӧтасис Федя кутшӧмкӧ помтӧм тешкодь вӧт: быттьӧ лэбӧ сійӧ джуджыд ниа пуяс да козъяс весьті, а эбӧсыс бырӧ и бырӧ. И со вылісянь сійӧ усьӧ тшем сулалысь пуяс вылӧ. А найӧ ёсьӧсь-ёсьӧсь. Выныштчас Федя да вывлань зільӧ качӧдчыны, а ӧдва и лыбыштас пуяс весьтас, бара на усьӧ. Усьӧ и усьӧ, вот-вот зурасяс пуяслӧн ёсь йывъясӧ.

ТУЙӦ

Водз-водз асывнас Федя паляліс, воис ас садяс. Сулик ва. Дінас, пиыслӧн вольпасьӧ нёровтчӧмӧн, пукалӧ мамыс. Вугыртӧма.

— Ма-а-м, — гусьӧник нюжӧдсис зонкалӧн.

— Федюк, палялін? — садьмис мамыс да чышкыштіс пиыслӧн кымӧсысь ньылӧмсӧ. — Талун папыд тэнӧ нывъяскӧд тшӧтш Джуджыдъягӧ лэччӧдас, кӧсйылін тай коркӧ?

— Да, но больничаас ме ог кӧсйы, — пыксис Федя.

— Ковмас, пиӧ, куйлыштны. Сэні врачьясыс бурӧсь, ӧдйӧ и кок вылад сувтӧдасны. Сэсся Феня да Яна кутасны тэнӧ видлыны волывлыны, — меліа шуаліс мамыс.

— Мам, тӧдан мый? Ме ӧд кӧсйи Яналы зарни горадзуль рисуйтны, а сідз эг и удит, — казьтыштіс Федя.

— Мыйла быть горадзуль? — чуймис мамыс.

— Эн ӧмӧй казяв? Янаыс ӧд дзик горадзуль кодь зарни юрсиа. И Марпа баб тадзи шуліс. Нӧшта сійӧ шуліс, мый Яналӧн синъясыс пӧлӧзнича кодьӧсь.

— Збыль тай казялӧмныд, художникъяс.

— Мам, а вай ме Яналы ассьым выль даддьӧс сета! — зэв сьӧлӧмсянь корис Федя.

— Но мый, абу кӧ жаль, сет. Шань нывкаыс, абу асныра и асьсӧ оз лэпты миян водзын, — ошкыштіс мамыс Янаӧс.

— Ньӧти абу жаль! А сійӧ босьтас?

— Кыдз ӧд козьналан. Ме чайта да, босьтас.

Яна неуна пыксьыштіс дона козинысь, но кор казяліс Федялысь корана синъяссӧ, сетчис да босьтіс дадьсӧ. Туруна вӧв доддьӧ сӧлісны папыс да челядь, а дадьсӧ пысалісны додь бӧжас, мед вӧтчӧ на бӧрся. Туйӧ петӧм водзын Федя бара на биаліс, да бать-мамыс кӧчан мачӧс моз пасьтӧдісны-тубралісны сійӧс, мед оз кынмы. И мӧдӧдчисны туйӧ.

А туйыс рака тӧлысь помад заводитӧма нин жугавны. Восьсаинъясын, кытчӧ ёнджыка веськалісны шонді югӧръяс, вӧлі рӧшкыд, небыд лымъя. Карко вӧлыс татшӧминъясті вынысь нетшыштчывліс, а доддьыс весиг пӧлыньтчывліс. Сэки нывкаяс чилӧстлывлісны, а Федя синсӧ вештывліс бӧрын вӧтчысь дадь вылысь да видзӧдлывліс нывкаяс вылӧ. Сэсся и дзикӧдз ылаліс да кутіс кывзысьны нывъяслӧн сёрниӧ. А кыліс сійӧ Янасянь уна бур кыв асланыс Ниакерӧс грезд да сэтчӧс йӧз йылысь. Янаӧс колльӧдны волісны став тӧдсаыс, Толик кындзи. Сылӧн либӧ узьсьӧма, либӧ Федякӧд войдӧрлунся вензьӧмсьыс яндысис да эз волы колльӧдны ни нывъясӧс, ни ёртсӧ. А гашкӧ, эз и тӧд, мый Федяӧс больничаӧ нуӧны. Буракӧ, эз тӧд. Тӧдіс кӧ, быть эськӧ воліс. Федя тай ньӧти сы вылӧ эз лӧгав. Сійӧ весиг шпыньмуніс ас кежсьыс. Вот йӧйясыд. Позис ӧд ставныслы бура ёртасьны. Тышкасьтӧг. Со Янаыс кутшӧм: некодӧс оз торйӧд, оз и ӧтдорт.

«Да, ставсьыс ме ачым мыжа, ачым и торки ставсӧ», — мӧвпыштіс Федя, ышловзис да чӧвтіс синсӧ бӧрланьӧ. Но мый нӧ тайӧ? Даддьыс абу! Мынӧма!

— Папӧ! Даддьыд вошӧма! — горӧдсис шемӧсмӧм зонкалӧн.

— Важӧн нин? Кор бӧръяысьсӧ вӧлі? — юасис папыс Федялысь. — Но, кымын чукыль сайын?

— Ог тӧд. Регыд на, буракӧ, — муртса эз бӧрд пиыс.

— Ладнӧ, ме ветла видзӧдла, а ті тані олыштӧй, чеччылӧй, кокнытӧ веськӧдӧй. Вӧвсӧ ог нин бергӧд — удачаыс оз ло, да и туйыс лёк. Мед шойччыштас Каркоыд. Ме ӧдйӧ.

И батьыс подӧн мӧдӧдчис бӧр. Со нин и матысса туй чукыль сайӧ саяліс. Ставӧн виччысьӧны. А Яна ошкыштіс на батьсӧ:

— Вот ведь какой у вас папа. Другой разве бы стал из-за каких-то санок возвращаться? — сэсся чӧв олыштіс да шуис чоя-вокалы. — Счастливые вы. Такие родители у вас. И бабушка Марфа. Ведь просто соседка, а как родная. А у меня... даже бабушки нет, есть только на Украине тётки и дядьки. И те не могут приехать. Или не хотят...

И бергӧдчис чоя-вокаысь. Йӧжгыльтчис... Феня уськӧдчис сійӧс бурӧдны, вунӧдчис да пӧсьйывсьыс комиӧн кутіс тэрыба шуавны:

— Янук, эн бӧрд. Оз кӧ тэла локны либӧ ачыд он кӧсйы мунны, кутан миянын овны. Дерт, кӧсъян кӧ. А гожӧмнас ми Джуджыдъягӧ мунам овны.

Дзикӧдз. И ставным ӧтлаын лоам. И тэ миянкӧд. Чышкы синватӧ.

Код тӧдас, гӧгӧрвоис эз Яна коми сёрнисӧ, но сьӧлӧмсянь нюмдыштіс да чышкис синвасӧ. Сэк кежлӧ и батьыс чукыль сайысь тыдовтчис. Бӧрсяньыс кыскис Яналы Федясянь козинсӧ — кокньыдик мича дадь.

СЫКТЫВКАРЫН

Джуджыдъягса больнича пыдди Федя веськаліс Сыктывкарӧ и тӧлысь сайӧ лои сэні бурдӧдчыны. Палата ӧшиньсянь видзӧдігӧн либӧ больнича йӧрӧ петалігъясӧн зонка мӧвпаліс аслас грезд йылысь. Ёна и быри гажыс гортсаяссьыс, Марпа бабысь, ёртъяссьыс. Дерт, зонка важӧн нин кӧсйис аддзывны юркарсӧ, видзӧдлыны, мыйсяма сійӧ, Сыктывкарыс, ӧд Джуджыдъягысь ылӧджык Федя эз на ветлы. Но уна-ӧ аддзан палата ӧшиньсяньыд? Сӧмын больнича йӧрсӧ да сэні ветлӧдлысь йӧзсӧ. А йӧзыд — быдлаын йӧз. Сэтшӧмӧсь жӧ тай-а. А вот машинаыс уна и быдсямаыс. Федя ставсӧ весиг оз тӧд. Орчча крӧватьысь Вадик Федяӧс «деревенщинаӧн» шуис, кор зонка сылысь кутіс юасьны. Ачыс Воркутаысь, роч. А Воркутаыс ӧд ыджыд кар, дерт, сэні машинаыд уна. Ошйысис коркӧ Вадикыс:

— Ты знаешь, какую машину мой череп купил?

— Че-ереп? — чуймалӧ Федя.

— Ну ты даешь, темнота деревенская, черепа — это родители.

— А я думал, это башка, — оз сетчы Федя.

— Ну вот, мой череп, папка, значит, на «капусту» купил «Мерс».

— На капусту-у? — плешкас синмыс кайис Федялӧн.

«Тайӧ нӧ мыйта капуста ковмас папӧлы вузавны, медым «Мерседес» ньӧбны», — мӧвпалӧ зонка. Эз нин и кут юасьны Вадикыслысь: бара на мыйкӧ мӧдарӧ шусяс да дзикӧдз яналас. Но мед, папыслысь и юалас. Коркӧ висьталіс Вадикыслы, мый художникӧн кӧсйӧ лоны, а мӧдыс видзӧдліс альбомас да ошкис: «Клёво малюешь, но это не дело, не заработаешь, бабки надо делать, бабки». Федя эськӧ и шуис, мый бабкаыс налӧн эм — Марпа баб, а Вадикыс чуньнас аслас плеш бокас бергӧдлыштіс да шутёвтіс, сэсся аслысмоз зэв тешкодьтор шуис. Федя эз гӧгӧрво да мӧдысь юаліс. Вадик сэсся торйӧдлӧмӧн нин висьталіс: нервнӧй пӧ, паралитическӧй пӧ да нӧшта на и долбикӧн нимтіс. Йӧй, сідзкӧ, — вежӧртіс Федя да сэтшӧм сылы лёк лои та бӧрын. Толикӧс кӧ важӧн нин зульӧдіс, а тайӧс, рочтӧ да карсатӧ, видлы нӧйтны, ещӧ ӧд «черепыс» локтас да Федяӧс асьсӧ лязӧдас, капустаа «Мерснас». «Но часлы, — папӧ тэд волас, сэки видзӧдлам, коді долбикыс», — мӧвпалӧ Федя да муртса оз бӧрд. Ӧти радлун и вӧлі зонкалӧн больничаас: ывлаӧ петавлӧм да рисование урокъяс. Сыктывкарын тулыс нин ыджыдаліс: сылысь лымйысь чужисны визув ёльяс, найӧ сяльгисны ӧтилаын и мӧдлаын. Дерт, налӧн Ниакерӧсын та кадӧ эз на татшӧма шондӧд, но и сэні вот-вот нин тулысыс венас тӧвсӧ.

Федялӧн лунъясыс эз эськӧ нинӧмӧн и торъявны ӧта-мӧдсьыс, эз кӧ больничаас дыр куйлысьясӧс школаын моз велӧдны. И медъёна зонка радейтіс рисование урокъяс. Ӧтчыд велӧдысьыс юӧртіс налы:

— Челядь, талун ме вайи тіянлы «Би кинь» журналлысь выль номер. Видзӧдлӧй, тані гижӧма медбур серпасъяслӧн конкурс йылысь. Колӧ рисуйтны да мӧдӧдны редакцияӧ асланыд чужан сикт либӧ кар йылысь серпас, а сы дорӧ гижыштны чужанін йылысь ичӧтик висьттор. Коді вермас тайӧ конкурсас, август тӧлысьын найӧс корасны волыны Сыктывкарӧ, журналлӧн юбилей вылӧ.

Федялӧн быдӧн сьӧлӧмыс ёкмуніс. Ӧд артмас кӧ... Татшӧм мӧвпъяс сэсся и майшӧдлісны зонкаӧс. Ӧні, кор позяс ыстыны ассьыс серпас конкурс вылӧ да нӧшта на и аслас Ниакерӧс йылысь, Федялы лои кокниджык коллявны больничаас кадсӧ. Да и гортас сэтшӧма кутіс кыскыны, а друг сэні мыйкӧ выльтор лои, мый позяс серпасавны да вермыны тайӧ конкурсас. Кутшӧм окота вӧлі Федялы вермыны да волыны выльысь Сыктывкарас, медым бура сійӧс аддзывны. А медся ёна Федя кӧсйис пӧттӧдз сёйны мороженӧй, ӧд сійӧс сэтшӧм гежӧда вайлісны Ниакерӧсӧ. А лым ёкмыльсӧ тай сёйліс, ньӧти ӧд абу мороженӧй кодь, висьмӧдӧ сӧмын.

И Федя босьтчис рисуйтны конкурс кежлӧ серпас. Но колис лун, и мӧд, а зонкалӧн нинӧм эз артмы, кӧть бӧрд. Ас кӧсйӧм серти кор серпасавліс быдсяматорсӧ — кужліс, а конкурс кежлӧ — оз и ставыс. Быдтор йывсьыс окота рисуйтны и гижыштны: и Изъяю, и пӧрысь ниаяс, и сикт йывсьыс, а мыйкӧ оз ладмы зонкалӧн. Велӧдысьыс казяліс зонкалысь майшасьӧмсӧ да ӧтчыд такӧдіс Федяӧс:

— Мыйкӧ Карманов миян дзуг руа лои?

— Кӧсйи ассьым Ниакерӧсӧс серпасавны, но мыйлакӧ оз артмы. Миян ӧд быдтор сэні эм, а ме ог куж нинӧм рисуйтны.

— А тэ эн майшась, эн асьтӧ мырдӧн тшӧкты. Ӧні гортсяньыд ылын, бокын, гажтӧмтчан, сійӧн оз и артмы, мунан аслад сиктӧ, сэні и серпасалан.

— А конкурсыс? Ог кӧ удит?

— Удитан. Быдса тӧлысь на водзын, а тэнӧ вот-вот нин лэдзасны. Позьӧ и гортсяньыд ыстыны серпастӧ.

И Федялӧн личаліс сьӧлӧмыс. Ӧні нин сійӧ эз вермы виччысьны, кор локтас папыс да нуас сійӧс гортас.

И коркӧ Первомайся праздник бӧрын врачыс шуис зонкалы:

— Но мый, Фёдор Карманов, гортад кӧсъян?

— Да, — гусьӧник и вочавидзис Федя.

— Дасьтысь, аски папыд локтас. Звӧнитліс нин. И со мый тэныд, зонка, шуа: видлалім тэнӧ гӧгӧрбок, став аппарат пырыс мунін. Бурдӧдыштім. Нинӧм лёкыс тэнад абу. Ставыс ас саяд. Тэ ӧд деревняын олан? Кыдзи рочнас сиктыд шусьӧ?

Врачыс вӧлі роч да, дерт, коминад эз гӧгӧрво. Федя и висьталіс радпырысь:

— Ниа — это лиственница, керӧс — гора. У нас берег высокий, а там лиственницы старые растут. И еще мы маленькие посадим возле дома. У нас и у бабушки.

Зонка эськӧ вежавидзис врач водзас, но кор сыкӧд сёрнитісны, эз жӧ чӧв ов. Весиг смелмӧдчис да висьталіс:

— А у нас еще и жвачка есть. Мы ее делаем из смолы лиственницы.

— Как это из смолы? — юасьӧ врачыс.

— А жуём, жуём, вот и жвачка. Бабушка Марпа говорит, что полезно, зубы не будут болеть, — дзикӧдз смелмӧдчис зонка да тайӧс весиг юӧртіс.

Сэсся врачыс юаліс, эм-ӧ налӧн юыс. Федя бара на висьталіс, мый налӧн грезд горулын визувтӧ Изъяю, пыдӧсыс изъя, зэв визув да кӧдзыд ваа. Воча кыліс, позьӧ пӧ и купайтчыны, но оз дыр, лӧзӧдтӧдз мед оз ло. Бӧръяпомыс шуис, ставыс пӧ тэнад, Фёдор Карманов, лоӧ бур.

«Ставыс лоӧ бур», — думыштіс Федя да збыльысь эскис, мый тадз и лоӧ.

ГОРТӦ

Мӧд лунас Федя асывсяньыс эз вермы инасьны: то ӧшиньӧ мудзтӧдзыс дзоргис, то медсестраысь гусьӧн уліӧдзыс лэччыліс — папсӧ виччысис. Пажын бӧрас весиг эз кӧсйы водны, но быть лои пырны шебрас улӧ, мед оз видны. А сэсся и унмовсис. А садьмис да... папсӧ аддзис, крӧвать дорын улӧс вылын пукалӧ, пельпомъяс вылас еджыд халата. Вӧтасьӧ кӧ-а, чайтіс Федя, весиг синъяссӧ ниртыштіс. Но со — збыль батьыс, нюмъялӧ. И зонка гӧгӧрвоис, мый оз вӧтась, збыль тай папыс локтӧма, пашкыр сьӧд ус да синкымъяс сертиыс и тӧдіс. Бурпӧт и топӧдчылісны ая-пиа. Сэсся Федя заводитіс юасьны став йывсьыс, весиг Рудук, Шарик да Катшыс йылысь эз вунӧд.

— А Катшыстӧ, пиук, локтігӧн Джуджыдъягӧ Степан дядьыдлы коли. Тӧвнас тай шулі: пӧрысьмис, омӧля аддзӧ, а бур кычанъясӧс ваяс на. А сы пыдди писӧ коли, Лыскосӧ, — висьталіс папыс.

Жугыльмыштіс эськӧ Федя, но гортас мунӧм кузя радлуныс веніс да зонка кутіс чукӧртны ассьыс кӧлуйсӧ. Вадик сэні жӧ сулаліс да дзоргис ая-пиа вылӧ, кывзысис, кӧть нинӧм коми сёрнисьыс эз вежӧрт. Федя весиг сыланьӧ синсӧ эз чӧвтлы. Мед-мед дзоргас, колӧ кӧ. Со кутшӧм сылӧн папыс, абу Вадиклӧн кодь куш юра да жеб. Быд вежон ӧд та дорӧ бать-мамыс Воркутасяньыс волывлӧны. «Сю-сю-сю» да «Вадюша» и кылан. А сёянсӧ быдсямасӧ ваяласны. И яблӧгтӧ, и банантӧ, и калбастӧ. Вадик сэсся бӧрйӧ, кодлы сетны. «Этому даю, этому даю, а этому не даю», — шуас да бӧрйӧмаяслы сеталас. Первойсӧ кор Федялы сетіс банансӧ, мӧдыс муртса бӧр эз сьӧлышт — дзик нильӧг майтӧг кодь. Ок эськӧ мырпом кӧ либӧ чӧдлач. Бӧрас сэсся Федя гӧгӧрвоис Вадиклысь вечмасьӧмсӧ да эз кут нинӧм босьтны. А папыс гортсьыс быдсяма чӧскыдторсӧ жӧ вайӧма. Дзик жӧ пыр став челядьлы разӧдіс пувъя да чӧдъя пирӧгъяс, рыська шаньгаяс, черинянь вундаліс. Тайӧ бара абу бананыд.

Лунся узьӧм бӧрын сэсся челядь петалісны больнича йӧрӧ, а Пётр Иванович, кор дасьӧсь лоины мӧдӧдчыны, корис писӧ:

— Но лок, Федя, ветлам врачыд дорӧ, мамыд кутшӧмсюрӧ козин пуктіс, вай сетам бур вӧчӧмсьыс.

Сэсся, врачкӧд янсӧдчӧм бӧрын, ая-пиа лэччисны уліас. Больнича йӧрас Федя матыстчис тӧдса челядь дінӧ, кодъяскӧд ковмис та дыра ӧтлаын овны. Кодсюрӧкӧд лӧсяліс, а Вадик коддьӧмысь и ӧтдортчис, эз ёртась. Ӧні со Вадикыс бокынкодь и сулаліс, завидьпырысь видзӧдіс Федя вылӧ. Кор «долбикнас» шуліс, Федя кӧсйис быть водзӧс мынтыны, зутшнитны либӧ мыйкӧ дойданаӧс шуны. Но ӧні мыйлакӧ эз вермы и эз кӧсйы. Батьыс дорӧ матыстчӧм бӧрын юаліс:

— Пап, эсійӧ Вадикыс, кыз брульыс, менӧ лёка нимтіс. Кӧсйи зульӧдны да дыш лои. Гашкӧ, коліс да?

— Эк тэ, чайтан, выныд кабырад али мый? Мортыслӧн выныс вежӧрас. Тӧлка да вежӧра мортыд некор тышкасьӧмӧдз оз лэдзчысь. Дерт, пӧрысь да жеб мортӧс кӧ оз ков дорйыны. Сэки мӧд делӧ. А шуасьӧмсьыд да нимтысьӧмсьыд он жӧ кабырӧн кут шенасьны. Мӧвпыштлы — татшӧм мортыс ачыс абу прамӧй, аслыс на и сьӧкыдджык. Найӧс ӧд некод оз радейт. Сӧмын ас кодьныс жӧ леститчысь йӧз и кытшалӧны татшӧмъястӧ. А найӧ лыдаӧсь. Ок, Федя, свет вылас ӧд бур йӧзыс унджык, — кузякодь висьталіс батьыс, но зонка гӧгӧрвоис. Сійӧ сідз жӧ мӧвпаліс. Збыль ӧд, бур йӧзыс налӧн Ниакерӧсын унджык.

Сэсся эз на ӧвсьы да нӧшта на юаліс:

— Папӧ, а мыйта нӧ капуста колӧ вузавны, медым «Мерседес» ньӧбны?

— Капуста? — чуймис папыс.

— Да, тайӧ Вадикыслӧн папыс капуста вылӧ «Мерс» ньӧбӧма.

— Эк тэ, ді вылын олысь морт, ӧні «капустанас» сьӧм шуӧны. Став сьӧмсӧ долларкӧд ӧтвесьтасалӧны. Став мирас долларыс ыджыдалӧ. И миян шайтыд сы серти ёна нин донтӧмджык. Гӧгӧрвоин эн кӧть? — юасьӧ папыс.

— Гӧгӧрвои: долларыс, сідзкӧ, деньга? А ме... — жугыльмис Федя аслас «бӧблун» вылӧ да нӧшта на дэльӧдӧ папсӧ: — Пап, сідзкӧ, ме збыльысь «долбик», йӧй, миян ногӧн кӧ.

— Тэ кысь тайӧс кылін, Педӧр? — сувтовкерис быдӧн батьыс.

— Да эсійӧ, Вадикыс... — нурбыльтіс Федя.

— Но и но, кывзан быдторсӧ, — скӧрмис татчӧ Пётр Иванович. — Тӧдан кӧ, тэ ӧд шудаджык тайӧ зонкасьыс, олан ас чужанінын, Ниакерӧсын ставыс тэнад аслад: вӧр-ваыс и юыс, керӧсыс и видзьясыс... А мый Вадикыдлӧн Воркутаас аслас? Вайисны бать-мамыс кыськӧ лунвылысь тундраӧ, кӧдзыдінӧ. Дерт, сьӧмтӧ куралӧны, а мый сэні зонкаыслӧн эм? Кӧдзыд тӧвъясӧ нырсӧ ывлаӧ оз вермы мыччӧдлыны, гожӧмнас, оз кӧ лунвылӧ мунны, некытчӧ, ягӧ ни ю дорӧ, карса детинкаыд оз вермы петавны. Ӧти кывйӧн кӧ, аслад чужанінысь бокын овны абу на и юмовтор. А тэ, быдман да, велӧдчан да, ставсӧ ачыд тӧдмалан, сэки некод тэнӧ долбикнас оз нин шу. Сідз ӧд, Педӧр Иван Петыр Педӧр?

— Сідз, Педӧр Иван Петыр! — бурасис зонка.

Сійӧ жӧ рытнас батя-пиа пуксисны поездӧ да мӧдӧдчисны войвылӧ, Ухтаӧ, а сэсся автобусӧн нин воӧдчисны Джуджыдъягӧ.

КАТШЫС

Степан дядьясын Федялы медъёна радліс Катшыс. Коньӧрӧс домалӧмаӧсь керка сайӧ, выль чом дорӧ. Кодныс ёнджык нювсисны — Федя али Катшыс — он и тӧд. А кор зонка вешйис пон дорысь, Катшыс сэтшӧм нор синъясӧн сы вылӧ видзӧдіс, быттьӧ корис: эн пӧ менӧ татчӧ коль, ну бӧр аслам пармаӧ, тані ме гажтӧмӧйла кула. Федя тай тадзи гӧгӧрвоис видзӧдлассӧ, весиг на и кӧсйысис понлы:

— Эн шогсьы, ме видла папкӧд сёрнитны. Гашкӧ, бӧр гортӧ нуас тэнӧ.

Но папыс да дядьыс сэтшӧм сьӧлӧмсянь варовитісны вӧралӧм да мукӧдтор йылысь, мый Федя эз и слӧймы на дорӧ сибӧдчыны. Кывзіс найӧс да мӧвпаліс, мыйла эськӧ Феня чойыс оз дядьыс ордын ов, а интернатын. Пукаліс телевизор дорын да кадысь кадӧ чӧвтліс букыш видзӧдлассӧ Степан дядьыс вылӧ. И кымын дырджык кыйӧдчис, сымын мустӧм лои батьыслӧн вокыс. Со — винасӧ юӧма да гӧрдӧдӧма весиг чужӧмыс. Ошйысьӧ сӧмын папыслы, а мӧдыс оз и водзсась, кывзӧ.

Сэсся петісны ывлаӧ. Федя пальтосӧ вылас чӧвтіс да на бӧрся. «А-а, Катшыс дорӧ мунӧны», — гӧгӧрвоис Федя да кутіс керка пельӧссянь кыйӧдны, мый водзӧ лоӧ. Катшыс, папсӧ аддзис да, пыр жӧ пельяссӧ юр бердас топӧдіс да водз лапасӧ папыслы воча лэптӧмӧн — чолӧмасис, сідзкӧ, — кутіс нораа никсыны. «Ставсӧ ӧд гӧгӧрвоӧ, — жалитыштіс ас кежсьыс зонка пӧрысь понсӧ, — тайӧ ӧд сійӧ бӧр гортӧ вӧзйысьӧ». А Катшыс, малыштӧм бӧрын, чеччыштіс, водз лапаяссӧ пуктіс папыс пельпомъяс вылӧ да кутіс пӧся нювсьыны. Ныр-вомсӧ и пельяссӧ — ставсӧ нюліс. Федялы весиг тешкодь лои: Катшыс ӧд стрӧг кыйсян пон, татшӧмасӧ некор эз леститчыв кӧзяин дорас, пыр тӧдіс ассьыс удж да ин. Тыдалӧ, оз кӧсйы йӧз ордад кольччыны. Сэк кості и гажа юра Степан дядьыс матыстчис пон дорӧ.

— Ак тэ, сӧтана, нювсян? Ноко, места! — горӧдіс дядьыс да нюжӧдіс кисӧ понлань.

Но друг Катшыс эрснитіс пиньяссӧ да муртса эз тшапнит выль кӧзяинсӧ. Мый эськӧ и лоис, эз кӧ Федялӧн батьыс ӧлӧд воксӧ:

— Степан, энлы на вӧрӧд, Катшыс — тӧлка пон, ачыс велалас.

— Нёльӧд лун нин тані, а некыдз оз сибӧд. Оз сёй ни. Сыктывкарад мунӧм водзын тай вердлін, сы бӧрын менсьым чир эз босьтлы.

— Эн шогсьы, ваыс воссяс, уткаяс воасны да нулы кыйсьыны. Сэки аддзан — кӧзяин туйӧ пуктас, — эскӧдӧ батьыс воксӧ.

— Тайӧ? Ӧдвакӧ. Сьӧд мути кодь. Со ӧд кыдзи пиньяссӧ жерйӧдлӧ. Ак, кутшӧм ёсьӧсь пиньясыс, он и шу, мый пӧрысь пон нин. Ковмас, гашкӧ, тасмаӧн велӧдны, — кывкӧрталіс Степан дядь.

— Тэ, вокӧ, йӧймин кӧ-а? — скӧрмис Федялӧн батьыс. — Тайӧ понсӧ чуньӧн оз позь вӧрзьӧдны. Он кӧ кывтӧ веж, бӧр нуа.

— Ог, ог, шмониті, абу ӧд дзик выжыв, ӧти вираӧсь ми тэкӧд, вӧралысь-кыйсьысь рӧдысь. Тӧда жӧ понйыдлысь сямсӧ, — сетчис дядьыс.

А Федя дзебсясьӧ керка пельӧсын да водзӧ кывзысьӧ.

— Мед сӧмын бур кычанъясӧс ваялас. Эм тані ӧти кыйсьысьлӧн татшӧм жӧ яр ай пон. Ок и челядь налӧн артмасны, — водзӧ варовитӧ Степан дядь. — Кывзы, Петро, а тӧдан-ӧ, уна-ӧ лайка понпиысь мынтӧны,.. — но тайӧс кайтыштӧм бӧрын друг джӧмдіс да мыччис понлы аскӧдыс петкӧдӧм ыджыдкодь лы.

Но Катшыс сӧмын юрсӧ бокӧ бергӧдіс, эз босьт, но эргыны дугдіс.

— А оз ӧд и босьт зверыд, — жальпырысь шуис дядьыс, — казялі нин, оз сёй, а гуалӧ эстчӧ, чом саяс. Гашкӧ, бӧрас гусьӧн йирӧ.

— Ноко, вайлы, ме сета, — корис батьыс да мыччис Катшыслы лысӧ.

Мӧдыс быттьӧ вежавидзӧмӧн босьтіс лысӧ вомас да пырис чомъяс. А батьыс да дядьыс кежисны кильчӧлань. Федя ӧдва и удитіс наысь водз уйкнитны керкаас. Буракӧ, сійӧ гӧгӧрвоис, мыйла Феня чойыс олӧ интернатын, а оз Степан дядь ордас.

Рытнас папыс шуис пиыслы:

— Ветлам Фенятӧ видлам, а аски — гортӧ. Ог и тӧдлӧй, Изъяюыд вӧрзяс, йӧрмам тайӧ берегас, вуджны юсӧ ог вермӧй.

ИНТЕРНАТЫН

Федя медводдзаысь на мӧдӧдчис чойыс ордӧ интернатас. Родыштіс неуна. Ӧні и Янасӧ тшӧтш аддзылас. А гашкӧ, Янаыс вунӧдіс нин сійӧс да? Тӧлысь сайӧ нин колис бӧръя аддзысьлӧмсяньыс, кор тай татчӧ, Джуджыдъягӧ, локтісны да дадьныс на мынліс. Но Яна чойыс моз жӧ ёна радліс Федяӧс аддзӧм бӧрын. Шуис весиг:

— Федя, а ты вырос, смотри, меня уже почти догнал.

Орччӧн сувтӧдіс да пӧшти ӧтвесьтаӧсь. «Дерт, ӧткодьӧсь, Янаыс ачыс ичӧт тушаа да, Феня тай со миянысь юр джынйӧн ыджыдджык», — мӧвпаліс Федя, но и ачыс казяліс, мый быдмыштӧма. Мамыс на коркӧ шуліс, челядь пӧ висиганыс, овлӧ, ёна нюжалӧны.

Интернатыс Федялы воис сьӧлӧм вылас. Сӧстӧм, югыд жыръяса. Шойччан вежӧсас уна рӧма телевизор да весиг видео. А пельӧсас сулалӧ пианино. Яна, вӧлӧмкӧ, музыкальнӧй школаӧ ветлӧдлӧ да рытъяснас тані ворслывлӧ.

Фенялӧн жырйын олісны нёльӧн. Сэтчӧ пырӧм бӧрын Федялӧн гӧрдӧдісны пельясыс. Стенсьыс сійӧ аддзис ассьыс серпасъяссӧ, кодъясӧс козьнавліс чойыслы. Тані и ӧшиньӧ кыйӧдчысь гӧрд морӧса жоньыс, а тайӧ — Катшысыс да Шарикыс. Сэні и тупыль кодь Толик да сырчиклань мунысь Вера. А со и Марпа бабыс да мамыс. Абу сійӧ серпасыс, кодӧс рисуйтіс праздник кежлас, а мӧд, кӧні Федя серпасаліс сӧмын мамыслысь ыджыд лӧзов синъяса чужӧмбансӧ.

— Феня, мыйла нӧ ӧшлін ставсӧ, сераласны ӧд?! — уськӧдчис сійӧ чойсӧ видны, а Феня ыстысис Яна вылӧ: со пӧ коді ӧшліс, мича пӧ.

И Федялы нӧшта на яндзим лои, эз тӧд, кытчӧ и воштысьны. Яна сэтчӧ тшӧтш сюйсис:

— Федечка, а ты будешь в художественную школу ходить, когда сюда переедете? Наши ребята из интерната ходят.

Но Федя сӧмын пельпомъяснас топӧдліс — ог пӧ тӧд. Некыдз сылӧн Янакӧд сёрниыс эз артмы. Эз на ӧд вунӧд, кыдзи Толиккӧд нывка вӧсна вензисны да мыйӧн тайӧ помасис. И турун пиас, йӧй моз, дзебсясис, помнитӧ, да ӧнӧдз абу лӧсьыд Яна водзас. И Толиккӧд, код тӧдас, бурасясны оз.

Но Федялысь мӧвпъяссӧ торкис чойыс да тувкнитіс Яналы:

— Яна, а ты про письмо расскажи.

— А-а, что про него рассказывать, — кыдзкӧ веськодьпырысь вочавидзис нывка.

Но Феня ачыс радпырысь висьталіс вокыслы да папыслы, мый Яналы воӧма Украинаысь юӧр кутшӧмкӧ ылысса рӧдвужсянь, кодъяс кӧсйысьӧны велӧдчан во помасьӧм бӧрын локны да босьтны нывкасӧ. А Яна пӧ велалӧма нин тані овны да оз кӧсйы мунны. Феня кӧ эськӧ муніс: сэні шоныд, орччӧн море, быдсяма фрукты. «Но и Феня, тайӧ кӧть кытчӧ мунас, — кӧритіс думсьыс чойсӧ Федя. — Ме кӧ некытчӧ татысь эг мун. А кор вуджам Джуджыдъягӧ, Янаӧс тшӧкыдджыка кута аддзывны. А, гашкӧ на и, миянын нывкаыс овмӧдчас». Со кутшӧм мӧвпъяс майшӧдлісны зонкаӧс. Сійӧн и чӧв оліс, синсӧ улӧ лэдзӧмӧн рама пукаліс улӧс вылын.

БАРА ГОРТЫН

Федяӧс гортас видзаалісны ыджыд мортӧс моз. Мамыс локтігкежлас быдсяма чӧскыдторсӧ дасьтӧма, весиг мырпома пирӧг пӧжалӧма. Но медводз сійӧ бурпӧт топӧдліс да окаліс писӧ, ӧтарӧ-мӧдарӧ бергӧдліс, быттьӧ быдса во эз аддзыв.

— Но и быдмӧмыд, пиук. Сӧмын тай омӧльтчӧмыд, чужӧмыд кельыд и. Эн ӧмӧй ывлаас петавлы?

— Петавлі. И шоныд нин сэні, Сыктывкарас. Сӧмын ме карсӧ эг и аддзыв. Мый висьтала тэныд, мамӧ, — тшӧтш зіля кутчысис сёрниӧ зонка. — «Би кинь» журналын конкурс лоӧ. Колӧ миян сикт йылысь серпас да висьт мӧдӧдны редакцияас, а коді вермас, найӧс и корасны августын Сыктывкарӧ. Меным кӧ татшӧм шудыс усьӧ? А, мам?

— Ок, Федя, Федя, мед эськӧ тадзи и лоас. Но олӧмад оз пыр кӧсйӧм серти артмыв. А тэ эн майшась, видлы, мӧдӧд серпастӧ, гашкӧ, и сетасны журналас. Верман ли он, а лача мед пыр вӧлі. Сытӧг нӧ кыдзи олан, лачатӧгыс. Со и ми папыдкӧд эскам, мый олӧмыс бурмас да кокниджык лоӧ. И тэ эскы,.. — такӧдӧ писӧ Татьяна Васильевна да ышловзьӧ.

А Федя видзӧдӧ мамыс вылӧ да быттьӧ оз и тӧд сійӧс: вежсьӧма жӧ. Ачыс кӧ сійӧ быдмӧма, то мамыс гӧгрӧсмӧма, кутшӧмкӧ лабутнӧй да ньӧжмыд лоӧма. Абу важкодьыс. Сійӧ ӧд пыр кытчӧкӧ тэрмасьліс, тэрыба да ӧдйӧ ставсӧ вӧчліс.

— Мам, а мыйла нӧ папӧ Катшыстӧ нуис? Сійӧ ӧд бӧр вӧзйысьӧ? — водзӧ юасьӧ зонка.

— Сідз и вӧзйысьӧ?

— Оз, дерт, сёрнит, а синнас висьталӧ: босьтӧй пӧ менӧ гортӧ, — кӧсйӧ мамыслысь сьӧлӧмсӧ нормӧдны Федя.

— Ог и тӧд, мый сэсся вӧчны, папыдлысь и юась, — бать вылас ыстысис Татьяна Васильевна.

— Федя, вай сёрнитам мужик мортъяс моз, — шыасис тшӧтш Пётр Иванович, — виччысям Степан дядьсяньыд письмӧ. Сійӧ кӧсйис юӧртны: оз кӧ велав Катшысыд, бӧр сетас. А ме ветла да вая. Веськыда кӧ, аслым зэв сьӧкыд. Но кыв сетӧма вӧлі Степан дядьыдлы да бӧрсӧ эг веж. Гуга-бана шаньгаӧн мед ог ло.

Федялӧн морӧсын быттьӧ мыйкӧ кокняммыштіс. Ас кежсьыс сэсся кевмысьны кутіс: «Мед эськӧ гижас, мед эськӧ папӧ Катшысӧс бӧр ваяс...».

Но зонкалысь кевмысьӧмсӧ торкисны. Вералы катша бӧж помас вайӧма нин Федя локтӧм йылысь юӧрсӧ да со — тані нин сырчикыд.

— Ой, Федя тай воӧма! А ме керка дортіыд муна вӧлі да, час, мися, пырала, оз-ӧ ков Татьяна Васильевналы отсыштны, — зэв збыльысь эскӧдіс нывка.

— Но, Верук, а ме тэнӧ лун вит нин виччыся, да эн и волы, — гӧгӧрвоис нывкалысь мудералӧмсӧ Татьяна Васильевна да нюммуніс.

— Некор, Татьяна Васильевна, некор: ӧтитор да мӧдтор мамӧ тшӧктӧ вӧчны. Юр выв тыр уджыс. А мыйкӧ колӧ оз отсавны? — эскӧдана синмӧн видзӧдӧ аслас велӧдысь вылӧ Вера.

— Оз, оз, Вера. Лок водзӧ, ӧдзӧссӧ эн пык. Федя дорӧ ӧд пырин?

Вера родӧмпырысь воськовтіс Федялань. Мый нӧ такӧд лоӧма? — чуймалӧ Федя. Мукӧддырйи кӧть оз и петав, а ӧні мыйкӧ педзӧ места вылас. Тыдалӧ, дыр эз аддзысьлыны да неуна яндысьыштӧ нывкаыс.

— Федя, ок и бур, мый локтін, миян гаж нин бырис тэысь, — быттьӧ ас садяс воис Вера да важ мозыс кутіс тэрыба китшкыны.

— Кодлӧн — миян? — юасьӧ зонка.

— Кыдзи кодлӧн? Менам да Толиклӧн!

— А сылӧн... тшӧтш? — эз эскы Федя.

— Сылӧн меысь на ёнджыка!

— А эз и волы колльӧдныс да?

— Эз, дерт, узьсьӧма кыз тупыльлӧн да. Тӧдан ӧд, мый сійӧ медъёна радейтӧ? Сёйны да узьны, — водзӧ таргӧ Вера.

— А мый нӧ ӧні эз лок?

— Бӧрсянь тай вӧтчис-а. Сійӧ ӧд ньӧжмыд Ласей моз, кӧнкӧ, пыр на варгыльтӧ. Эз кӧ понъяс уськӧдчыны, банйӧм кӧвдумӧн рожасӧ чайтісны да. Часлы, ӧшиняд видзӧдла, — шуис Вера да ляскис ичӧт нырсӧ ӧшиньӧ. — Да то сійӧ — кильчӧ бокад сулалӧ. Оз лысьт пырнысӧ.

Сэсся тай кыдз горӧдіс керка тырӧн:

— Толик, лок пыр! Тані пӧсь пирӧг виччысьӧ!

Тайӧс кылӧм бӧрын ёртыс пыр и воши кильчӧ вылысь. Пырис да Вера моз жӧ ӧдзӧс дорас джӧмдіс, быттьӧ тӧдтӧм. Но зумышасьны сылы эз сетны, кыскисны пызан дорӧ да регыд мысти Толиклӧн бан бокыс польдчис нин мырпома пирӧг азыма курччалӧмысь.

Зонкаяс некоднанныс вензьӧмсӧ эз казьтыштны, быттьӧ нинӧм абу и вӧлӧма. Важ мозыс варовитісны ӧта-мӧдкӧд.

Сӧмын ӧти морт эз вӧв на ордын — Марпа пӧчыс. Ёна пӧ нин нёрпалӧ да сӧмын ӧшинювса лабич вылас пукыштны и петавлӧ. «Ачым ветла бабӧ дорӧ, — мӧвпыштіс Федя, — Сыктывкар йылысь висьтала, гашкӧ, сійӧ сэні некор эз и вӧвлы...»

ОДА-КОРА

Вера да Толик мунӧм бӧрын Федя котӧртіс орчча керкаас Марпа пӧч дорӧ. А бабыс, вӧлӧм, ӧшинювса лабич вылын пукалӧ, быттьӧ Федяӧс и виччысьӧ. Казяліс зонкаӧс да сьӧкыдпырысь и шыасис:

— Видза, видза, дитяӧй. Бабыс со рытъя шонді водзӧ лысьӧмӧс шонтыштны петі. Кынтӧ мыйкӧ пӧрысь выжывӧс... Мися, вежапиӧ воӧма да петала, а эг и во тіянӧдз.

— А ме ачым и локті, бабӧ, — лӧня шыасис Федя. — Ме ӧд Сыктывкарын вӧлі. Тӧдан?

— Висьтавлісны. Но и кутшӧм Сыктывкарыс? — юасьӧ пӧч.

— Ог тӧд. Автобусӧн вокзалас мунігӧн видзӧді ӧшиняс да ыджыд. Керкаясыс джуджыдӧсь, вит да ӧкмыс судтаӧсь. Ме думысь, ӧти керкаӧ Ниакерӧсысь став йӧзыс тӧрасны. А машинаыс мыйта! Дзик быдсямаыс, — висьталӧ Федя, но казялӧ, мый бабыс кутшӧмкӧ жугыль, абу варов, да ланьтіс.

— А ме, кагук, эг и веськавлы Сыктывкарад, а ӧні, тыдалӧ, тайӧ лабичсьыс водзӧ некытчӧ ог и слӧймы ветлыны.

— Бабӧ, а бурдан да ветлан, — эскӧдӧ Федя пӧчӧс.

— А и забыль, мыйкӧ дыш рунь да седун моз вольпасьӧ зуляси да ог и вӧрзьыв. Тулысыс со кутшӧм гажа. Аски-аскомысь Изъяюным вӧрзяс, сэсся ӧдӧбӧн лымйыс сылас, веж турун-кор письтас. Май тӧлысьыс кыдзи коминас шусьӧ, кагук?

— Ода-кора, — пыр жӧ и вочавидзис Федя.

— Сідз, дитя. Пу гаръяс потасны да выль коръяс мыччысясны. Ог и тӧдлӧй, кыдзи гожӧм воас. Рытнас водам да коръясыс чаль гыж ыдждаӧсь, а асывнас нин пев гыж кодьӧсь лоӧны. А шонді-мамныс малыштас найӧс югӧръяснас, муыс юктӧдас вежа ванас, видзӧдан да кышакылӧны нин небыд тӧвру улын тэнад ки пыдӧс пасьта коръяс.

Марпа пӧч ланьтіс да быттьӧ вугыртіс.

— А водзӧ мый, бабӧ? — телепит тӧдмавны Федялы.

— Водзӧ? Козлӧн посни гӧрдов исерга кодь коляоз быдмас, пожӧмлӧн аслас жӧ кузьмӧс выль петасъяс чужасны, сэсся быдмасны да чутласьысь лысъясӧ пӧрасны. А кутшӧм мичаа ниа пу ловзьӧ: нэриник веж лысъясыс мыччысясны да чӧскыд кӧра небыд лыс розъяс наысь артмасны. Сэсся и кыдз пу ассьыс кузьмӧс исергасӧ ӧшлас...

— Ой, бабӧ, дзик тэ мойд моз висьталан. Быттьӧ коръясыс да лысъясыс и збыль ловъяӧсь, — шензьӧ Федя.

— А ловъяӧсь и эм. Ставыс му вылын ловъя, ставыс туӧ-быдмӧ, ставыс овны кӧсйӧ. Вӧр-ваыс тӧв кежлас унмовсьлӧ сӧмын, а ӧні буретш садьмӧ, выль петасъяс чужтӧ. Сэсся водзӧ сетӧ выль тшак-вотӧс, выль пиянӧс, выль гут-гагӧс. Гырысь и посни — ставӧн выльысь чужӧны, олӧмсӧ водзӧ нуӧдӧны. Тадзи оз и орлы олӧмыс — помтӧм-дортӧм.

— Кутшӧм лӧсьыда тэ висьталін, Марпа баб, — лӧня шуис Федя да юаліс: — Бабӧ, а тэ дзикӧдз бурдін? Ме моз?

— Тэныд, кагук, кузь нэм на овны, а менам нэмыс тайӧ му вылас помлань нин матыстчӧ, — висьталӧ пӧч.

— А тэ шуан — оз орлы олӧмыс, — вензьӧ сыкӧд зонка.

— Оз, дерт, бабыс муна шойнаягӧ, мӧдар югыдӧ веськала, а татчӧ, му вылас, ме пыдди мӧд морт локтас.

— Кытысь локтас? — некыдз оз инась Федя.

— Кыдзи кытысь? Выль морт чужас. Кор ӧд мортыс кулӧ, быть выль лов чужӧ. Тадзи олӧмыс оз и помасьлы, — водзӧ висьталӧ пӧч да кывкӧрталӧ: — Кагук, тэ сэсся аски волы. Бабыс гортӧ пыра. Мудзи.

Сэсся сьӧкыда чеччис да пырис гортас. А Федя пуксис сылӧн лабич вылӧ да мӧвпыштіс: «Кор папӧкӧд бабӧ ӧшинь улӧ садитам ниа пусӧ, кутас сійӧ пукавны тайӧ лабичас да видзӧдны ичӧтик пу вылас, кыдзи сійӧ ловзьӧ да быдмӧ, и вунӧдас шойнаягӧ вуджӧм йылысь». Ышловзис да тшӧтш мӧдӧдчис гортас.

ЫТВА

Лун-мӧд мысти, кыдзи и шуліс Марпа пӧчыс, Изъяю вӧрзис. Чашкаліс-потіс кыз йиыс, сэтысь торъялісны гырысь и посни йи торъяс да ӧта-мӧдыскӧд йӧткасьӧмӧн-венласьӧмӧн заводитісны кывтны войвылӧ. Сэні, дерт, и Вой саридзӧдз воасны да разаласны-янсӧдчасны. А гашкӧ, сэтчӧ вотӧдз на удитасны сывны, пӧрасны ваӧ.

Ытва дырйи ю дорӧ кыскис быдӧнӧс: посниӧс и верстьӧӧс. Торйӧн нин челядьӧс. Дерт, и Федя эз ӧтчыд вадорӧ котӧртлы, кӧть бать-мамыс и ӧлӧдісны зонкаӧс, кодкӧд пыр мыйкӧ лоӧма. Но пиыс эз ёна и кывзысь, мукӧдкӧд тшӧтш радліс тулыслы, виччысис гожӧм.

Ӧти асылӧ Федя сідзжӧ кӧсйис уйкнитлыны вадорӧ видзӧдлыны, ёна-ӧ нин паськалӧма Изъяюыс. Петіс кильчӧ вылӧ, читкыртліс синъяссӧ яръюгыд шонді югӧръясысь да сӧмын удитіс лэччыны пос кузя, кыдзи кильчӧ улысь радпырысь тявзігтыр сы дорӧ уськӧдчис сьӧдовруд вуджӧр да муртса эз уськӧд кок йывсьыс. Катшыс! Гӧныс ва, сьыліас ӧшалӧ чептор, ачыс эз и тӧдлы, кыдзи радысла весиг Федяӧс кок йывсьыс уськӧдіс, друг вылас чеччыштіс да. Куйлӧ зонка кильчӧ пос помын, а Катшыс чеччалӧ сы гӧгӧр, нювсьӧ, никсышталӧ. Кытысь нӧ Катшысыс веськаліс татчӧ, керка йӧрас? Радлӧ и шензьӧ Федя. Вадорӧ мӧдӧдчӧмыс вуніс весиг. Тэрыба бӧр пырис гортас да горӧдіс:

— Мамӧ! Тӧдмав, коді миян кильчӧ вылын?

— Коді нӧ? Толикыд, буракӧ, тэкӧд тшӧтш нӧрӧвитӧ ю дорӧ лэччывны?

— А вот и эн тӧд! Катшыс сэні, Катшыс!

— А сё дивӧ тай, Степан дядьыдкӧд али мый воис? Ытва дырйи? — чуймис мамыс.

— Абу дядькӧд, ӧтнас!

— Ноко, корлы коньӧрӧс керкаӧ, кынӧмыс, кӧнкӧ, сюмалӧ, — тшӧктіс Татьяна Васильевна.

И Федя лэдзис понсӧ гортас. Катшыс, кыдзи и важӧн, ӧдзӧс дорысь водзӧ эз мун. Кокъяснас педзӧмӧн да бӧжнас ӧвтчигтыр мыжа синъясӧн видзӧдіс мамыс вылӧ: со пӧ ме и локті гортӧ, эн менӧ видӧй. Дерт, туй выв понмӧс некод эз и пиняв, мӧдарӧ на — вердісны-чӧсмӧдлісны да весиг ывлаӧ эз вӧтлыны. Мама-пиа дыр на тайӧ лоӧмтор йывсьыс сёрнитісны, виччысисны, мый висьталас папыс. А пажын кад кежлӧ воӧм Пётр Иванович гӧгӧрвоӧдіс:

— Со ӧд, чепсӧ орӧдӧма, мынтӧдчӧма да пышйӧма Джуджыдъягсьыс. Эз, сідзкӧ, Степан дядьыдкӧд лӧсявны.

— А юсӧ кыдзи вуджис? Пыжӧн? — юасьӧ Федя.

— Ыджыд ва дырйи ӧдвакӧ кодкӧ пыжӧн ю вылӧ петіс. Ачыс кывтӧма.

— А и збыль, гӧныс дзик сулик ва вӧлі. Ӧні косьмис нин, — юӧртіс пиыс.

— Ок и Катшыс, тадзи менӧ Степан водзын янӧдін, — шыасис папыс пон дінӧ да малыштіс юрӧдыс.

— Пап, сэсся бӧр нуан Катшыстӧ Джуджыдъягас? — лӧня юаліс Федя.

— Оз позь, пиӧ. Нуа кӧ, вузалӧма лоӧ понсӧ, ылӧдлӧма. А сійӧ ӧд миян вӧсна ассьыс нэмсӧ вермис помавны. Вӧйис кӧ? Ог ну, Федя, мед олӧ гортын. Кутасны Шариккӧд кыйсьыны. Коркӧ писӧ велӧдіс, а ӧні Шарик да Лыско мамныслӧн син-пельӧн лоӧны.

— Ура-а-а! — радпырысь горӧдсис Федялӧн.

А батьыс кывкӧрталіс:

— Он и куж думыштны, мый кывтӧм пемӧслӧн морт дінӧ та ыджда муслун, весиг ас олӧмыслысь донсӧ вунӧдӧ. Гӧгӧрвоин, пиӧ?

Зонка довкнитіс юрнас, кӧть эськӧ некор на эз мӧвпыштлы непӧштӧ пемӧслӧн, но и морт олӧм дон йылысь. А Катшыс да ас семья-котыр костысь муслунсӧ бура гӧгӧрвоис. Сійӧ эськӧ пон моз жӧ ытва дырйи ыджыд ва вывті гортас уйис.

НИАПИЯН

Коркӧ ӧтчыд шойччан лунӧ Федяӧс садьмӧдӧ папыс:

— Пиӧ, гашкӧ, чеччан нин? Кодкӧ ӧд кӧсйис ниа пуяс садитны.

Федялы эськӧ нюжмасьны на окота, но ӧд збыль — ачыс сэтшӧма окотитіс асланыс да Марпа пӧчлӧн ӧшинь улӧ ниа пуяс пуктыны. Эз сэсся и вуграв, звирк чеччис. Нуръясьыштісны ая-пиа, папыс и шуис:

— Асъя шондіыс мусӧ шонтіс, пуяслӧн вужъясыс небзисны. Ӧні и колӧ ниапиянтӧ садитны, шоныд муас. Вай, пиӧ, ветлам керӧс помӧ, сэтысь и ваям пиянсӧ. Гырысь ниаяс налы оз сетны рӧдмыны, асланыс вынӧн вермасны, а ме видзӧдлі да олысь пиян сэні быдмӧны. Колӧ вайны.

— А кымынӧс, пап?

— Шуим тай кыкӧс, сэсся ачыд видзӧд. Толикыд да Вераыд, гашкӧ, тшӧтш ыззясны?

— Часлы, ме найӧс кора, а тэ эн на мун. Но, пап? Виччысьлан?

— Ог коль. Мун ветлы.

Федя тэрыба лэбыштіс ёртъясысла. Регыд куимӧн нин локтісны. Керӧс помын, ю весьтын, и збыль пӧрысь ниаяс пиялӧмаӧсь выль петасъясӧс, подуланыс быдтӧны. Весьтаныс плавкнитчӧмаӧсь, быттьӧ видзӧны посни челядьсӧ. Оз и тӧдны, мый асланыс вынӧн вермасны эштӧдны налысь олӧмсӧ. Ньӧти ем на абу петӧма некодлӧн, а чӧскыд сир дукыс кылӧ нин.

Перйисны мунас и эжанас нёль ниапиӧс. Федялӧн батьыс найӧс васӧд дӧраӧ гартыштіс да и мӧдӧдчисны гортланьыс.

— Кытчӧ медводз садитам? — юаліс папыс.

— Миянӧ, Петя дядь, — пыр и водзӧ сюйсис Вера.

— Гашкӧ, миянӧ да? — содтіс Толик.

— Папӧ, а вай Марпа баблы медводз нуам да садитам. Кӧсйысьлім ӧд, — корис Федя.

— Да, сэтчӧ и нуам, — сетчис Вера, но ассьыс кыв эз на веж, — а бӧрас нин миянӧ пуктам, но?

Серӧктӧмӧн ставӧн «нонитісны». Тӧдісны ӧд Вералысь этшсӧ. Чукӧрӧн сэсся мунісны Марпа пӧч йӧрӧ. А сійӧ быттьӧ виччысьӧма найӧс: пукалӧ ӧшинювса лабич вылын, кань моз шонді водзын куткырвидзӧ.

— Марпа бабӧ, петкӧдлы, кытчӧ ниаписӧ садитны? — шыасьӧ пӧч дорӧ Федя.

— А потшӧс дзиръя дорас и пуктӧй, мед вӧля вылын быдмӧ-сӧвмӧ да локтысь-мунысьясӧс видзаалӧ, — индіс Марпа пӧч.

Сэтчӧ, дзиръя дорас, и садитісны ниа пусӧ. Кильчӧбокса пельсаысь на дэбыд ваӧн киськалісны. Марпа пӧч сэсся корис гортас тшаюйтны. Челядь шуисны мукӧдлы пуяссӧ садитны да бӧрыннас и пыравны. Сэсся и збыль челядь волісны Марпа пӧч ордӧ, быдӧн аскӧдыс мыйкӧ чӧскыдтор босьтіс да. Пукалісны-тшаюйтісны. Быдсяматор йывсьыс сёрнитісны. Гортаныс челядьӧс колльӧдігӧн Марпа пӧч корис:

— Волӧй на, дитяяс. Вежон мысти ниалӧн веж лыс розъяс письтасны, Марпа бабыслы и кокниджык лоӧ. Сэки и виччыся кагукъясӧс. Волӧй, волӧй, эн вунӧдӧй, менам вежапиян да вежанылӧй.

ШОЙНАЯГ

Вежон мысти челядь и збыль ветлісны Марпа пӧч ордӧ. Да эз ниа пу видзӧдлыны, а муса, дона бабнысӧ бӧръя туйӧ — шойнаягӧ колльӧдны.

Асывнас Федя садьмис мамыслӧн гуся бӧрдӧмысь. Мамыс ыджыд пач дінӧ и нёровтчӧма, быттьӧ кынмӧма либӧ пачсяньыс кокнилун виччысьӧ, да гусьӧникӧн шлюпкӧ-бӧрдӧ. А Федялысь сьӧлӧмсӧ быттьӧ кузь лыс емӧн бытшнитіс: садьмис, сьӧлӧмыс чеччӧ... Кывзысьӧ...

Ай-мамыс сёрнитӧны. Бӧрдігсорӧн мамыс висьталӧ батьыслы:

— Асъявылыс коньӧр и эштӧма... Лӧня... Володь писӧ ӧд рытсяньыс корӧма. Бурасьӧмаӧсь мама-пиа, Ен сыкӧдӧн. Гаражад тэнад ветлігкості и локтіс миянӧ Володьыс да сьӧкыд юӧрсӧ вайис... Петалі миян баб ордӧ, а сэні нин пӧрысь пӧчьяс мыськӧмаӧсь-ладитӧмаӧсь Марпа бабӧс.

Папыс жугыль жӧ сэні пукалӧ. Юаліс сэсся, чӧв олыштӧм бӧрын:

— Танюш, сьӧкыда кулӧма Марпа бабным?

— Код нӧ тӧдас, Ен кындзи, кыдзи мортыс кулӧ: сьӧкыда али кокниа... Босьтӧма тай пиыслысь кисӧ да шуӧма: «Пиӧй, ов бура, ме вылӧ ин скӧрав». Сэсся ышловзьӧма да и ланьтӧма. Нэм кежлӧ...

Ставсӧ тайӧс кылӧм бӧрын Федя ёкмыльтчис вольпасяс. Эз кӧсйы эскыны кылӧмторйыслы. Сэсся дзик нин сьӧкыд лои и тапиктіс ай-мамыслань.

— Мамук, Марпа бабӧ шойнаягӧ мӧдӧдчис? — жугыля юаліс.

— Сэтчӧ, дитяӧй... Нуасны сійӧс шойнаягӧ, коньӧрӧс.. Вай пасьтась да петалам бабыд дорӧ, кагук.

Оз, оз кӧсйы Федя мунны сэтчӧ. Оз эскы, мый Марпа бабныс куліс... Бӧр муніс аслас вежӧсӧ зонка, нюкыртчис вольпасяс да лӧнис...

— Федя, пиӧ, колӧ ветлыны, — матыстчис пиыс дінӧ батьыс, — гашкӧ, миянлы, мужик мортъяслы, сэні мыйӧнкӧ отсавны ковмас. Ветлам? Мунісны ая-пиа. Лӧня куйлӧ Марпа пӧч, быттьӧ узьӧ. Оз нюмдышт, оз сёрнит, оз кор пызан сайӧ... Абу ас кодьыс.

«Мыйла нӧ бабӧ эз виччысь, кор ниа пуыслӧн лыскыс петас? — шогалӧ Федя, — гожӧмсӧ эз виччысь ни... Бурдіс эськӧ».

Но воча кыв бабсянь зонка эз кыв. Сэсся и ачыс куим лун чӧв оліс. Коймӧднас, лун шӧр кадӧ, грездыс ставнас лэччис Изъяю дорӧ колльӧдны Марфа Ильинична Каневаӧс, изьватасса нывбабаӧс. Сэки сӧмын Федя тӧдмаліс баблысь нимсӧ дзоньнас. И ӧдвакӧ сиктас кодкӧ «Марпа пӧч» кындзи кыдзкӧ мӧд ног шыасьліс изьватас ань дорӧ.

Пуктісны Марпа пӧчӧӧс пыжӧ да вуджӧдісны мӧдлапӧлӧ: шойнаягӧ. Коркӧ Ниакерӧс грездсӧ мӧдлапӧвкӧд йитліс морт ветлана пу пос, сэсся и сиктыскӧд тшӧтш сійӧ киссис да кӧнсюрӧ сӧмын сюръяяс колины. Тӧвнас йи кузя вуджӧдлісны кулӧмаясӧс, тулыс-гожӧм-арнас — ва вывті пыжӧн...

Дзебисны Марпа бабӧс Федялӧн пӧчкӧд орччӧн пашкыр пожӧм улӧ. Кыдзи и кӧсйыліс.

...Муніс Марпа баб Федя ордысь. Дзикӧдз муніс...

ТІЛЬГУН

Марпа пӧчӧс дзебӧм бӧрын лун-мӧд мысти ниапиянлӧн мыччысисны веж небыд лысъяс да син водзын кутісны быдмыны-сӧвмыны. Сэсся мичаа розъялісны, яръюгыда турунвижалісны да син пӧртмӧдана мӧдісны вежавны-радлыны.

Сэк кежлӧ велӧдчан во помасис. Висьӧмъяс вылӧ видзӧдтӧг Федя бура помаліс первой класс. Гортаныс тайӧ лунсӧ пасйисны. Федялы чужан лунас моз бара вичмисны выль альбом да уна рӧма краскаяс. Толик да Вера, дерт, волісны жӧ. Ӧтлаын тшаюйтісны, ворсісны. Но... Марпа бабтӧг кыдзкӧ эз сідз луныс коль... Эз кывны сылӧн брунган сёрниыс, шмоньыс, висьт-мойдъясыс...

Татьяна Васильевна казяліс челядьлысь шогалӧмсӧ да ылӧдіс найӧс могӧн:

— Челядь, а вайӧ ми тіянкӧд школаса тільгун-звӧнок весалам да мыськалам. Мед выль моз дзирдаліс да выль велӧдысьӧс виччысис.

— Татьяна Васильевна, а код нӧ лоӧ тіян пыдди, кор мунанныд Джуджыдъягас? — юасьӧ сырчик Вера.

Челядь тӧдӧны нин, мый Кармановъяс мӧдӧдчӧны Джуджыдъяг посёлокӧ и налысь Татьяна Васильевнасӧ вежас выль велӧдысь.

— Он и тӧдӧй? Анна Никитичналӧн нылыс педучилище помалӧм бӧрын локтӧ миянӧ, — висьталӧ Федялӧн мам.

— Наташа? — чуймӧ Вера.

— Вӧлі Наташа, ӧні — Наталья Юрьевна. Тіянӧс, Толик да Вера, мӧдас велӧдны.

— Ой! А ми колян гожӧм на ӧтлаын купайтчим да гожйӧдчим. Наташа менӧ ваын вартчыны велӧдіс, — варовитӧ Вера.

— Тэныд шуисны — абу Наташа, а Наталья Юрьевна, — пузис Толик нывъёрт вылас.

— Но мед кӧ сідз, — сетчис Вера, — Татьяна Васильевна, а ме ог кӧсйы, мед ті мунінныд. Коді нӧ математика кружоксӧ кутас нуӧдны? — водзӧ висьталӧ Вера.

— Наталья Юрьевна и нуӧдас. Сійӧ ӧд таво университетӧ пырӧ заочнӧя велӧдчыны, математика юкӧнӧ, — тӧдчӧдӧ Татьяна Васильевна.

— Заочнӧя? А кыдз нӧ тайӧ? — юасьӧ ньӧжмыд Толик.

— А сійӧ — Наталья Юрьевна, — кутас уджавны и ӧттшӧтш гортас велӧдчыны. Сэсся помалас да лоас математикӧн. И, тӧдӧмысь, сылы быть ковмас мунны татысь,.. — висьталӧ Татьяна Васильевна.

— А мыйла нӧ татысь быть колӧ мунны? — оз кӧсйы сетчыны Толик.

— А кӧні нӧ Наталья Юрьевнаыд кутас математикасӧ велӧдны? — юалӧ Федялӧн мам, да сэк жӧ и вочавидзӧ: — Вермас, дерт, и татчӧс школаӧ кольччыны. Сӧмын кутас посни классъяс велӧдны. А сійӧ — ыджыд вежӧра морт, математикатӧ бура тӧдӧ. Ӧдвакӧ татчӧ кольччас. Сылы ковмас гырысь классъяс велӧдны... Гашкӧ, миян моз Джуджыдъягӧ сетчас, — сёрнисӧ помаліс мамыс да юаліс: — Челядь, а ми ӧд кӧсйим школаса тільгун весавны. Али вунӧдінныд?

Дерт, ныла-зонма эз вунӧдны та йылысь, сӧмын неуна ылалісны сёрнинас. Сэсся ставӧн петісны ывлаӧ. Татьяна Васильевна сетіс налы пызьдӧм кирпич и куимнанныс вензьӧмӧн босьтчисны весавны школаса тільгун-звӧнок. Сы выйӧдз весалісны, мый чусмӧм ыргӧн тільгуныс кутіс яръюгыда дзирдавны зарни рӧмӧн. «Тінь-тінь, тінь-тінь», — шуышталіс велӧдчан воысь мудзӧм тільгун. А ӧд школаын урок вылӧ коригӧн ёна яра и тіньгис, кор стӧрӧжыс летіс сійӧс аслас киын.

ЯНА МУНІС

Феня локтіс! Гортас! Дыр кежлӧ, — радліс Федя. Эз на некыдз эскы, мый регыд найӧ ставӧн лоӧны ӧтлаын Джуджыдъягын и Феня кутас овны ас гортын, а оз интернатын...

Федя гусьӧн виччысьӧ, мыйкӧ шуас оз чойыс Яна йылысь. Оз юась весиг. Вежавидзӧ. А Феня ачыс и висьтасис:

— Федя вокӧ, на — тайӧс тэныд Яна мӧдӧдіс, мунігводзас.

Зонка эз на нинӧм удит юавны, чойыс сетіс нин сылы тупкӧса конверт.

— Мый сэсся, мед кӧ мӧдӧдіс, — веськодьпырысь быттьӧ шуис Федя, кӧть сьӧлӧмыс и кутіс чеччыны.

Сэсся ньӧжмыда, дышпырысь босьтіс письмӧсӧ да керка сайӧ дзебсьӧмӧн лыддис:

«Милый Федечка, я уезжаю в посёлок Южный. Он возле Азовского моря. Там растут фрукты и шелковица. Меня увозит дальняя тётка Ганна. Она из шелковицы делает вареники.

Спасибо тебе, Федечка, за рисунки, Феня мне их подарила и сказала, что ты не будешь сердиться. Я тоже так думаю. Ты добрый. Иначе не назвал бы меня «пыста» — синичка. Я это уже знаю. Эти птички не вредные.

Если хочешь, приезжай. Все приезжайте. Ко мне. Я скажу тётке Ганне, она вас примет.

До свидания и до встречи.

Яна — «пыста».

Федялӧн мыйлакӧ доршасис синваыс. Гусьӧн сулаліс керка пельӧсын да бӧрдіс. Тӧдӧмысь, горадзуль юрсиа, пӧлӧзнича синъяса роч нывка Яна муніс дзикӧдз. И найӧ некор оз аддзысьны...

Да, коркӧ Федя чайтіс, мый радейтӧ сырчик Вераӧс, весиг окыштліс сійӧс, но ӧні зонка гӧгӧрвоис: сылы муса сӧмын Яна... И батьыс сэки, Яна волігӧн, шуис: «Менам тайӧ вӧлі жӧ, сӧмын тэысь сёрӧнджык». Ӧні Федя, Янакӧд янсӧдчӧм бӧрын, тӧдіс, мый сэтшӧмыс папыслӧн вӧлі сёрӧнджыксӧ. Сэки, тӧдӧмысь, папыс и радейтчис Федялӧн мам вылӧ.

«Яна, Яна, — мӧвпалӧ Федя, — мунін со, сідз эн и волы выльысь миянӧ... А ми ӧд ниа пуяс садитім... И Марпа бабӧс мӧдлапӧлӧ, шойнаягӧ, нуим». Ышловзис Федя. Сулалӧ керка пельӧсын да видзӧдӧ аслас ниа пу вылӧ. Мича сійӧ: небыд лыска, яр турунвиж, вывлань сетчысь... И ывлаыс шоныд. Гожӧм...

ТУЙВЕЖ

Федялысь мамсӧ папыс нуис Джуджыдъягӧ, больничаӧ. Чоя-вока колины горт олысьясӧн. Кыкӧн. Марпа бабтӧг...

Кор чойыс воис гортас гожся каникул вылӧ да тӧдмаліс пӧч кулӧм йылысь, вокыс моз ёна жӧ шогаліс, инас эз ӧшйы, гажтӧмтчис. Чӧв оліс локтан лунас. Важ моз эз радлы гортсаяскӧд аддзысьӧм бӧрын. Радліс эськӧ, но мӧд ног: лӧня, ур моз ышмытӧг да чиктывлытӧг. Федякӧд эз дур ни. Сӧмын корис видзӧдлыны серпасъяссӧ. Но вокыслӧн Сыктывкарысь воӧм бӧрын эз лыб киыс мыйкӧ рисуйтны. Майшасис, мый сідз нинӧм оз и мӧдӧд «Би кинь» журналас. А конкурс вылӧ сетӧм тӧлысьыс быттьӧ сыліс-лэбис. Вот-вот бӧръя лунъяс помасясны. А Марпа пӧчлӧн шойнаягӧ вуджӧм да Яналӧн Украинаӧ мунӧм бӧрын зонка дзик уси ловнас, эз кӧсйы нинӧм серпасавны.

Эз кӧ мамыс мунӧм водзас пан зонкаӧс майшӧдлысь сёрнисӧ, сідз эськӧ эз и кыпав.

— Федюш, тэ нӧ вунӧдін нин конкурс йывсьыд? — юаліс сэки Татьяна Васильевна.

— А менам оз артмы, — вочавидзис нюрсмунӧм зонка. — Сэні, больничаас, эг куж, а ӧні ог кӧсйы.

— Тадзи, пиук, оз позь лэдзчысьны, — небыдика видӧ мамыс. — Усян кӧ ловнад, олӧмад некор нинӧм он вермы шедӧдны.

— Оз и ков,.. — нурбыльтіс Федя.

— Сідз и лэдзчысян? — водзӧ дэльӧдӧ писӧ Татьяна Васильевна.

— Мед кӧ, — сетчӧ Федя.

— А тэ, пиук, эн шогсьы: тайӧ тэнад олӧмын выль тшупӧд, — кывлытӧмтор на шуис мамыс.

— Кутшӧм тшупӧд? — оз вежӧрт пиыс.

— Аслас олӧмын быд морт вуджӧ тшупӧдысь тшупӧдӧ. Ӧтитор венас, сэсся мӧдтор босьтчӧ вермыны. Тэнад, тӧдӧмысь, ӧні татшӧм кад и эм. Тэ быттьӧ туйвежын сулалан. И ачыд он тӧд, мый водзӧ лоӧ, — ыджыдлы моз висьталӧ мамыс да видзӧдӧ пи вылас: гӧгӧрвоас-ӧ.

— А мый водзӧ лоӧ? — юасьӧ Федя.

— А водзӧ, тӧдӧмысь, тэнад кага олӧмыд помасяс. И лоан он нин ичӧт кагаӧн, а шӧр арлыда зонкаӧн.

— Збыль? — дивитана юасьӧ Федя.

— Збыль. И вай эн эновтчы да мӧдӧд серпастӧ журналас, — тшӧктіс мамыс.

— А кутшӧмӧс?

— Ме чайта, позяс «Керка-пӧльтӧ» и ыстыны.

И нинӧм выльторсӧ оз и ков думыштны.

— А сійӧ мӧй чужанін йылысь? — эз на эскы зонка.

— А кыдзи нӧ? Тайӧ керкаас чужин тэ, и тэнад батьыд, и пӧльыд... Сӧмын, ме чайта, ӧтитор серпасад оз тырмы?

— Мый? Сэні ӧд и керка-пӧльным, и мӧдлапӧвса яг, и керӧсса ниаяс, — лыддьӧдлӧ Федя.

— А мый нӧ вежсис? — юасьӧ мамыс.

— А-а, ми ӧд ниа пу ӧшинь улӧ садитім, — гӧгӧрвоис зонка. — Сійӧ оз и тырмы вӧлі.

И сылы выльысь окота лои пуксьывны рисуйтчыштны. Выль краскаяссӧ видлыны и. Федя пыр жӧ босьтчис уджӧ. Бӧрйис медся веж турунвиж краска да рисуйтіс пӧрысь керка-пӧль дорӧ ичӧтик ниа пуӧс.

И збыль, серпасыс быттьӧ ловзис. Сэсся зонка гижис ичӧтик висьттор. Та бӧрын Федялӧн письмӧыс мӧдӧдчис Сыктывкарӧ, «Би кинь» журналӧ.

ТШАПКУН

Вежон сайӧ горт олысь чоя-вока виччысисны мам-батьсӧ. А Федя гусьӧнмоз и «Би кинь» журналысь юӧр. Быд лун челядь дзим-дзурк идралісны керкасӧ, пуисны аслыныс да понъяслы сёян. Федя кымыныськӧ ветліс вуграсьны, мед кыйыштны черитор Рудук каньпилы нур вылӧ. Сэк кежлӧ налӧн Рудук быдмис нин пӧшти верстьӧ каньӧдз. Чери да яй вылӧ вывті ныриса вӧлі. Дозмукас кӧ пуктасны шыд либӧ рок, зэв на чуймана и видзӧдлас: мый нӧ пӧ ті менӧ ылӧдланныд, вайӧй чери, вайӧй яй — нявӧстас...

Ывлаыс зільӧ шондӧдны, но войвыв шоныдыд скуп: оз пыр ыззьы мортлы радлун вылӧ, кӧть и кӧсйӧ мый вынсьыс. А челядь и та вылӧ радӧсь. Кодсюрӧяс нин видзвывса ва гӧпъясын шполькӧдчӧны. Чоя-вока эз жӧ кольччыны: лягуша тыторйын уявлісны да бипур дорын сэсся шонтысьлісны. Сэтысь жӧ дӧра сакӧн ёсъясӧс кӧвтлісны Рудуклы.

Дерт, накӧд тшӧтш и сырчик Вера да тупыль Толик бергалісны. Пуксясны сэсся бипур дорӧ да быдсямасӧ сёрнитӧны.

Татьяна Васильевналӧн гоз-мӧд лун мысти воис грездӧ юӧр, мый Кармановъяслӧн чужӧма коймӧд кага — зонка! Ёрт чукӧр ӧтвылысь и виччысисны выль мортӧс. Весиг быдсяма нимсӧ думыштлісны.

Сэсся и чоя-вокалӧн бать-мамныс ичӧт кагакӧд локтісны... Федя, найӧс ылісянь аддзис да, пыр жӧ уйкнитіс гортас. Сэтшӧма гажыс бырӧма бать-мамсьыс, но мыйлакӧ воча эз уськӧдчы, а пышйис да дзебсис аслас радейтанаинӧ — паччӧрӧ да кутіс сэтысянь кыйӧдчыны.

А найӧ... дона ёкмыльӧс моз пуктісны тубрассӧ крӧватьӧ да кутісны сы гӧгӧр ноксьыны. Дзик быттьӧ коркӧя моз Яна гӧгӧр... Та дорынсӧ нӧшта на ёнджыка бергалісны.

А Федя поліс мыйыськӧ да дзебсясьӧмӧн и кыйӧдчис аслас паччӧрсянь. Папыс петіс пывсян ломтыны, а мамыс эськӧ и юаліс:

— Кӧні нӧ вокыд, горт видзысь кӧзяйка?

— Ӧні на тані вӧлі, гашкӧ, ывлаӧ удитіс уйкнитны, — дорйысьӧ чойыс да нӧшта на и удтысьӧ: — Лягуша тыӧ Толиккӧд лэбисны, кӧнкӧ.

— Мый нӧ сэні вӧчӧны?

— Сэні? Ку... Кӧвтӧны, Рудуклы ёс кыйӧны, — муртса эз висьтась Феня, но ас кадӧ веськӧдіс, вежис висьталанторсӧ.

— Но локтас, — кыдзкӧ мудзӧмпырысь да веськодьпырысь шуис мамыс да бара копыртчис кага весьтас.

Разис рузумъяссӧ. А Федялы сэтшӧм окота видзӧдлыны, кутшӧм сылӧн вокыс. А сійӧ... кутшӧмкӧ номыр кодь. Ньӧти абу и мича. Чукыля вӧсни кокъяса, истӧг тувъяс кодь вӧсни чуньяса, ыджыд юра. А весиг юрсиыс абу. Куньӧм синъяса, вомсӧ восьтіс да кутіс лёкысь авзыны: «Ав-ва да ав-ва!» И дзик ӧд пиньтӧм вомыс. И тайӧ лягуша кодь кагаыс — сылӧн вок? Шемӧс Федялы.

И нӧшта на и мамыслӧн сы дінӧ веськодьлуныс сьӧлӧмсӧ дойдіс. Быттьӧ Федя и абу нин сылӧн пи! И сэтшӧм дӧсаднӧ лои зонкалы, кӧть бӧрд. Шы ни тӧв пукалӧ. Оз нин весиг и кыйӧдчы, медым ноксьӧны лягушаыскӧд!

Сӧмын «Ванюш» и кылӧ. Ванюшӧс тубралісны, Ванюшӧс нёньӧдӧны-вердӧны. А Федя кӧть тшыглы тані кув!..

«Тшапкуныд — со кутшӧм азыма тшапкысис менам мам морӧсӧ! — эз кӧсйы да бара кыйкнитліс Федя. — Сёй, сёй, а ме тані и кула вердтӧгыд...»

Сэсся, кылӧ, папыс пырис да шыасис:

— Феня, мун ветлы воктӧ корсь. Ме пывсян горйӧ би чутки, ог жара ломты, регыд ваймас. Колӧ ичӧт воктӧ пывсьӧдны-корӧсявны.

Чойыс эськӧ оз кӧсйы вешйыны тшапкун дорсьыс, но быть пет, папыс кӧ тшӧктіс.

А Федя... абу. Вӧлі и абу. Некодлы оз ков. Мед кӧ и. Сійӧ и ачыс олас. Натӧг. Тайӧ тшапкун Ваньтӧгыс.

Кор пывсянӧ мам-батьыс лэччисны, Федялы сюри стрӧка да пышйӧмӧн уйкнитіс керкасьыс. Мунас ӧні, дзикӧдз мунас!..

«МАМ БӦЖ»

Федя эз на тӧд, кытчӧ пышъяс. Тӧдлытӧг и котӧртіс Изъяю дорӧ. Пывсян бокті. Гашкӧ, казяласны на сійӧс... Но зонкаӧс некод эз казяв пывсянсянь. Некод эз кор. И сійӧ лэччис ю дорӧдз. Матыстчис пыжъяс дінӧ, разис асланыс пыжлысь кӧртӧдсӧ, мый вынсьыс йӧткыштчис да кокньыдика чеччыштіс пыжас. Ӧні Федя тӧдіс, кытчӧ мунас. Сійӧ мӧдӧдчис мӧдлапӧлӧ, шойнаягӧ, Марпа бабыс дінӧ.

Пыжыс пыр и сетчис ва кывтчӧс. Федя уськӧдчис пелысла, медым вуджны мӧдлапӧлӧ. Но... ни пелыс, ни зіб пыжас эз вӧв. Папыс, тыдалӧ, дзебӧма зонпосниысь, мед оз дурны. Федя видліс кияснас пыж ӧтар-мӧдарладорсянь сынны, но киясыс ичӧтӧсь, а Изъяюыс тані, катыдас, зэв визув. И пыжыс мыжапырысь сетчис ю визувлы да мӧдӧдчис кывтны увлань. Со и шойнаягыс коли бӧрӧ, а пыжыс ни ӧтарӧ, ни мӧдарӧ оз сувт.

«Но и мед, — лӧнис сэсся шӧйӧвошӧм зонка, — мед кывтӧ. А ме вода татчӧ да мед нуӧ, кытчӧ кӧсйӧ». И друг Федя юрын звиркнитіс мӧвп: а воас кӧ ылі Украинаӧ? Яна дінӧ? Яна ӧд корис сійӧс аслас письмӧын гӧститны. «Сэтчӧ и муна», — шуис зонка да лӧнис. Водіс пыж пыдӧсас да кутіс видзӧдны еджыд баляяса енэжӧ. А баляяс пӧрисны ошъясӧ, ошъясыс — ӧшъясӧ, наысь быдмисны ыджыд, ыджыд... Татчӧ мудзӧм, рудзалӧм зонкалӧн мӧвпъясыс орисны, и сійӧ унмовсис.

Садьмис юрас малыштӧмысь. Унйывсьыс пыр на чайтіс асьсӧ лӧзов енэжысь. Быттьӧ небыд гӧна баляяс сійӧс малалӧны. А восьтіс синъяссӧ да... Пера багатыр сы вылӧ нор синъясӧн видзӧдӧ.

— Федя, пиӧ, чеччы, зонка, — шыасис багатырыс да друг пӧся топӧдіс морӧс бердас Федяӧс.

Видзӧдӧ зонка да чуймалӧ: Пера багатыр батьыс сійӧс топӧдлӧ. Бӧрдӧ кӧ-а? Бать синъяс бердсьыс зонка аддзис посньыдик скуп войтъяс. Оз, батьыс оз вермы бӧрдны. Тайӧ енэжсьыс войтъясыс тёпкыштӧмаӧсь папыс чужӧмӧ. И сэтшӧм шоныд да лӧсьыд лои Федялы папыс морӧсын, мый и аслас войтъяс тюргисны-тёпкыштісны чужӧм кузяыс.

— Пиӧ, Федюшӧ, тэ бӧрдан али мый? — чирӧм гӧлӧсӧн юасьӧ Пётр Иванович.

— Ог, папӧ, тайӧ зэр войтъяс тёпкалӧны, — шоналӧм сьӧлӧмӧн батьыслань сетчӧ зонка да нӧшта на ёнджыка топӧдчӧ Пера багатырлӧн вына морӧс бердӧ. И сэтшӧм ичӧтикӧн асьсӧ кыліс...

И друг казьтыштіс ассьыс воксӧ, тшапкунсӧ. Яндзим весиг лои зонкалы, быттьӧ и ачыс сэтшӧм — морӧс нёнялысь — да вешйис быдӧн бать дорсьыс. «Абу ӧд ме тшапкун, абу Ванюш, мый нӧ папӧ ме йылысь думыштас?» — майшасьӧ зонка да муртса выльысь оз бӧрддзы. Но батьыс босьтіс сійӧс пельпомъясӧдыс да пуксьӧдіс орччӧн. Чӧв олыштӧм бӧрын воссис ая-пиалӧн сёрни:

— Федя, тӧдӧмысь, тэныд тайӧ войсӧ бур вӧлі? — юасьӧ папыс.

— Мыйла войсӧ? Рыт ӧд ӧні? — шензьӧ пиыс.

— Асыв, пиук, асыв. Ми ӧд тэнӧ войбыд корсим. Быдлаысь. Мынӧм пыж серти папыс и гӧгӧрвои, мый тэ кывтін.

Федя друг казяліс, батьыс дзик Марпа баб ног шуис «папыс». Пӧчыс ӧд тадз жӧ ас йывсьыс вӧлі висьталӧ — «бабыс»... И сэтшӧм яндзим лои Федялы, мый эновтіс мам-батьсӧ, чойсӧ... Ванюш воксӧ зонка эз на гӧгӧрво, нинӧм на эз куж сы йылысь шуны. Сэки буретш батьыс выльысь топӧдіс писӧ ас бердас да кутіс водзӧ сёрнитны:

— Федя, ме чайта, гӧгӧрвои, кытчӧ кӧсйин мунны, но Енмыс тэнӧ сэсянь водзӧ мӧдӧдіс. Кывтін, кывтін и сутшин тайӧ льӧм кустъясас, таладорсянь, миян грездладорсянь. Ме тэнӧ аддзи и ӧні некытчӧ ог лэдз. И мамыд оз лэдз, и Феняыд...

— Некытчӧ? — юалӧ Федя.

— Да, некытчӧ, кытчӧдз он быдмы.

— Мыйла?

— Тэ миянлы колан! И тэтӧг ми ог вермӧй овны!

— А тшап... а Ваня? — водзӧ юасьӧ зонка.

— Пиӧ, сійӧ медъёна тэтӧг оз вермы овны. Вошин да войбыд бӧрдіс. Тӧдӧ, мый тэ абу гортын.

— А кысь тӧдӧ? Оз кӧ нинӧм кыв да нӧшта на и синтӧм? — оз на эскы Федя.

— Кылӧ ставсӧ, и аддзӧ. Сӧмын пытшкӧснас — ловнас. Сійӧ ставсӧ гӧгӧрвоӧ, Федя, сӧмын нинӧм на оз куж шуны, — висьталӧ батьыс.

— А менӧ Ваня тӧдӧ?

— Дерт, тӧдӧ. Кор локтім пывсянысь да гортын Феня тэ вӧсна майшасьӧ вӧлі, Ваня вокыд пыр и бӧрдны кутіс. Мамыд шогӧ усис. Тӧдӧ ӧд тэнсьыд руа этштӧ, сійӧн повзис,.. — кывкӧрталӧ батьыс.

Федя чӧв олӧ. Дзик нинӧм оз гӧгӧрво. Быттьӧ вӧтын ставыс...

— Пап, а ме?.. — друг юалӧ зонка.

— Тэ ӧд ӧні чайтін, мый некодлы он ков, сідз?

— Ог тӧд, — нурбыльтіс зонка, но сэк жӧ зэв ёна кӧсйис, мед сійӧ ставныслы: мам-батьыслы, чойыслы и весиг... тшапкун Ванюшыслы коліс.

— Кывзы, пиӧ, тэнад дзоля вокыд, код дорӧ миянӧс вежӧгтан, тэ моз жӧ бӧжалысь лоӧ, пӧльыдлысь ним новлӧдлысь. Тэ ас ногыд бӧжалан, сійӧ — ас ногыс жӧ. Ми ог на тӧдӧй, кодӧн лоас Ваня, быдмас да, но тӧдам, кодӧн лоан тэ — Педӧр Иван Петыр Педӧр.

— Кодӧн нӧ ме лоа? — лӧня юасьӧ батьыслысь пиыс.

— Лоан тэ художникӧн!

— А Ваня?

— Гашкӧ, тэ моз жӧ художникӧн, а гашкӧ... вӧралысьӧн, — мӧвпалӧ Пётр Иванович.

— Папӧ, а кыдз нӧ ӧні ме гортӧ муна? Ме вылӧ ӧд скӧралӧны ставӧн? — шога юасьӧ Федя.

— Оз, пиук, оз скӧравны. Тэ вӧсна шогсьӧны. Тэ ӧд ёна вежсин бӧръя каднас.

— Кыдзи — вежси? — чуймӧ Федя, кӧть ачыс кылӧ, мый сы пытшкын и збыль мыйкӧ вежсис.

— Казьтыштлы, кутшӧм ним тэныд пуктылісны ёртъясыд? — юалӧ батьыс.

Чӧв олыштӧм бӧрын Федя жугыля вочавидзис:

— «Мам бӧж»...

— А ӧні тэ мам бӧжсьыд орин.

— Кыдзи?

— Тэ ӧні, зонка, верстяммин, ичӧт Ванюшлӧн ыджыд вокӧн лоин, — зэв эскӧдана шуӧ батьыс.

Федялы лои тешкодь: ӧд неважӧн на мамыс тадз моз жӧ шуліс. Сэсся батьыс шыасис сы дінӧ:

— Эн вунӧд, детина, тэ ӧд Педӧр пӧль вужысь.

И батьыс нуӧдіс писӧ гортас. Мунісны найӧ кымынкӧ верст, и тайӧ кадколастас Федя эз нин мӧвпав аслас вок йылысь, кыдзи «тшапкун» йылысь. И весиг кажитчис, мый ӧні сійӧ радейтӧ жӧ ассьыс ичӧт воксӧ. Эз на кыв муслунсӧ, но тӧдіс: кутас радейтны Ваняӧс, коді новлӧ Иван пӧльыслысь нимсӧ.

БӦРЪЯ ЮКӦН... МЕДСЯ ДЖЕНЬЫД

Дерт жӧ, ёртъяс, тайӧ гижӧдсӧ лыддьысьяс, гӧгӧрвоинныд, мый Ниакерӧс грездса Кармановъяслӧн семья муніс Джуджыдъягӧ. Выль велӧдчан во водзын.

Гожӧмыс колис. Быд челядьлӧн сійӧ ӧткодь. Но посёлокӧ мунтӧдз на Ниакерӧсӧ воис «Би кинь» журнал, и миян ичӧт Федя, сылӧн семьяыс, ёртъясыс, грездса войтыр лыддисны сэтысь: «Чужанін йылысь конкурсын вермис Ухта районысь Федя Карманов. Сетам сылысь «Керка-пӧль» серпас да висьт: «Ме ола Ниакерӧсын. Олам ме, Шонді мам, Пера Багатыр бать, Ур Феня чой да чужас на миян выль морт. Тані жӧ олӧны Сырчик Вера да Туган Толик. Миян рӧдным шусьӧ тадзи: Педӧр Иван Петыр Педӧр. Ме — ичӧт Педӧр. Керка-пӧльын ми ставӧн олім и олам. Ӧні ми мунам Джуджыдъягӧ, но ог дзикӧдз. Велӧдчыны. Ме бӧр локта Ниакерӧсӧ. Тані быдмӧны гырысь ниа пуяс, а таво ми садитім керкаяс дінӧ налысь дзоля пиянсӧ. Найӧ зэв мичаӧсь и ловъяӧсь. Сӧмын Марпа баб абу ловъя, сійӧ муніс шойнаягӧ. Но шуліс, мый сэсянь ставсӧ кутас аддзыны. Видза колян, «Би кинь». Федя Карманов. 8 арӧс».