БРАМИН КУЛАН ВОДЗВЫЛАС

Пӧрысьӧдз овмысьт
Ӧти брамин
Лӧсьӧдчис кувны,
Куньӧма син.

Петкӧдчас сэки
Вишну: «Оз сюр
Меным брамин пӧ
Тэ кодьыс бур.

Сы понда ме тэд
Сии, мый лов
Некор эз аддзыв:
Выльысь тэ ов.

Ов тэ ас бур нэм;
Важ ног, брамин,
Оз эльт, оз серав
Тэнӧ некин.

Мусав и, майбыр,
Мусалӧм ло,
Томлунсянь висьтӧг
Пӧрысьӧдз во».

— «Вишну, дерт, вермас, —
Шуас брамин, —
Томмӧдны; сӧмын
Ог восьты син.

Важ олӧм абу
Аддзывтӧмтор;
Умӧдіс сійӧ —
Томлун ог кор.

Мый вӧліс муса,
Ловзьӧдан мем,
Югыд кӧть вӧрзяс,
Бергӧдан нэм, —

Бур нэмӧс менсьым! —
Сӧмын ме ог,
Ог ов нин выльысь,
Дыш мем и шог»...

Зумыштчис Вишну;
Муніс минут,
Мырдӧдны бур ен
Мортӧс эз кут.

Шмыньмуніс сӧмын,
Буракӧ, сэн
Тшӧтш жӧ и бӧрдіс
Этшаник ен.

Ӧти кад вӧліс
Шонді и зэр,
Ганг вылын тӧдчис
Зарни и сер...

Зонпи, браминпу,
Морӧсыс ван,
Котраліс няйтӧд
Ю дорас тан.