* * *

Сё арӧса пӧльӧ!
Олӧм помыд локтӧ...
Аддзывлывлін, майбыр,
Уна бур и лёк тэ.

Ой, эм бара, майбыр,
Пузчужӧм и тӧбӧм...
Сылы, кыдз султанлы,
Быдсӧ дасьтӧм, ньӧбӧм.

Дас арӧса питор
Кыдз султан жӧ-й олӧ,
Ай-мам копрасьӧны,
Ыджыд вокыс полӧ.

Сёрни кулӧм йылысь
Оз и гӧгӧрво на;
Сьӧлӧм вылас кӧдзӧм
Чужӧ регыд, ёна...

Кызьӧд арӧс вылас
Мыччылас и эбӧс;
Сыысь чурчут пышъяс,
Фарса нырсӧ дзебас.

Комын арӧс гӧгӧр
Батыр олӧ юрӧн...
Лёкӧн босьтас сійӧ,
Мый оз сетны бурӧн.

А нелямын лоас,
Мывкыд-вежӧр сылӧн
Аддзӧ быдсӧ кутш моз,
Коді лэбзьӧ вылын...

Сюрин-ӧ тэ, йӧрмин,
Он куж мый, он сяммы,
Сулейманным водзын
Копыртчы тэ, раммы.

Быд кыв сылӧн бӧрйӧм,
Сёрнитӧ кыдз шырӧ...
Кулас, бӧрдысь йӧзӧн
Сылӧн гувыв тырӧ.

Арӧс ветымынӧн
Сійӧ енвевт улас
Патриарк Джакуб кодь,
Шуксьӧ йӧз аулас.

Дас пи, кызь монь, нукъяс^Нук (йӧз кост сёрниысь) — внук — Е. Г./^—
Матыс ас йӧз быдсӧ.
А то межъяс, вӧвъяс —
Ен кӧ тӧдӧ лыдсӧ!

Со квайтымын арӧс...
Ой, квайтымын арӧс!
Синмыс пемдыштӧма,
Чукыртчыштӧм парыс.

Сизимдас — и пиньяс
Чирйысьӧны анас;
Чиныштӧм и вежӧр —
Он тӧд Сулейманӧс!

Кӧкъямысдас лоис —
Сылӧн кокъяс-кияс
Зор помъяс кодь чорыд...
Разьсьӧны нин лыяс.

Чери сьӧм кодь кӧдзыд
Пӧрысь яй-лы. Оліс
Ӧкмысдасӧдз — оз ков,
Мый сідз важӧн коліс!

Эм кӧ эмбур, ветлысь
Тэ гӧгӧр, дерт, сюрас;
Абу кӧ, и пилысь
Тэ эн виччысь бурӧс!

Сё арӧсӧн, тӧдан,
Сьӧкыд пӧрысь олӧм;
Томлун-майбырлуныс
Коркӧ-й сылы волӧм!