ЭДВАРД

— Ой, кинжал вылад со вир,
	Эдвард, Эдвард,
Со кинжал вылад эм вир —
И зэв мисьтӧм синмыд, пиӧ.
	«Да, бур кутшӧс вии ме,
		Мамӧй, мамӧй,
	Да, бур кутшӧс вии ме —
	Менам ӧти-й вӧліс сійӧ!»

— Кутш вир абу сэтшӧм гӧрд,
	Эдвард, Эдвард,
Кутш вир абу сэтшӧм гӧрд,
Висьтав веськыда, мый вӧліс.
	«Вии ассьым вӧланӧс,
		Мамӧй, мамӧй,
	Вии ассьым вӧланӧс —
	Ог нин аддзы татшӧм вӧлӧс!»

— Пӧрысь вӧліс сійӧ-й жеб,
	Эдвард, Эдвард,
Пӧрысь вӧліс сійӧ-й жеб,
Мыйкӧ мӧдтор тэнад вӧлӧм!
	«Вии ассьым батьӧс ме,
		Мамӧй, мамӧй,
	Вии ассьым батьӧс ме —
	Со мый кузя потлӧ сьӧлӧм!»

— Мыйӧн вештан сьӧкыд мыж,
	Эдвард, Эдвард,
Мыйӧн вештан сьӧкыд мыж,
Регыд висьтав меным тайӧ!
	«То караб, ме пуксьышта,
		Мамӧй, мамӧй,
	То караб, ме пуксьышта,
	Кывта-ката море сайӧ!»

— Код вылӧ тэ колян горт?
	Эдвард, Эдвард,
Код вылӧ тэ колян горт,
Коді сійӧс видзас, шондас?
	«Сулалас мед ӧтнасӧн,
		Мамӧй, мамӧй,
	Сулалас мед ӧтнасӧн —
	Чож тӧв нуны менӧ пондас!»

— А кыдз пиыд, гӧтырыд?
	Эдвард, Эдвард,
А кыдз пиыд, гӧтырыд?
Эновтан кӧ найӧс ылӧ?
	«Мед сэк корны мунасны,
		Мамӧй, мамӧй,
	Мед сэк корны мунасны,
	Оз нин усьны синъяс вылӧ».

— А кыдз тэнад мамыд сэк,
	Эдвард, Эдвард,
А кыдз пӧрысь мамыд сэк,
Отсалас код сылы, пиӧ?
	«Нэмсӧ сійӧс ёрасны,
		Мамӧй, мамӧй,
	Нэмсӧ сійӧс ёрасны,
	Менам велӧдысь тай сійӧ!»