ЛЫЙСЬЫСЬ И НЫВ
Кыакӧд кай садьмис нин,
Радліг тулысса лун вылӧ.
«Мунам ягӧ, мича нылӧ —
Вуджӧр сэн и шойччанін!
Сэн кок дінад копыртча ме,
Ӧкта дзоридз волӧдз тыр...»
— Лыйсьысь! Пола: тӧдас мамӧ!
Лыйсьысь! Меным некодыр!
«Пырам пыдӧджык ми: он,
Мам, сэсь аддзы нывтӧ! Кылан:
Сисьйӧг, кутшӧм нора сьылан
Тэныд сьылас сэн бур зон!
Сьылан сідзи дзугыльмӧдӧ,
Мый тэ кывзан синва пыр».
— Лыйсьысь! Ме та сьылан тӧда!
Лыйсьысь! Меным некодыр!
«Мойда ме, кыдз ӧтпыр тай
Верӧс ас том гӧтыр дінӧ
Гусьыс воліс аддзысьлыны
Войын. Киськасяс вир-яй
Кӧдзыд пӧсьӧн, кывзіг, нылӧ!
Гуас кыскас сійӧс пыр...»
— Лыйсьысь! Тайӧ мойдкыв кывлі!
Лыйсьысь! Меным некодыр!
«Мунам, шонді! Мися эд
Лёк ош-кӧин раммӧдала,
Висьӧмъясысь бурдӧдала,
Видзны кужа — вашка тэд —
Вомдзалӧмысь, тшыкӧдӧмысь,
Отсӧдлі ныв-зонлы дыр...»
— Лыйсьысь! Ладанторъяс эмӧсь,
Лыйсьысь! Меным некодыр!
«Кывзы инӧ: югъёвтӧ,
Аддзан, кыдз ме морӧс вылын
Зарни перна. Сійӧн, кылан,
Парскан тэ став нывъястӧ!
Сэсся лӧсьӧдчан ме сайӧ...
Босьт и новлы тшапитчиг!..»
— Ой, кыдз югъялӧ! Шань тайӧ!
Лыйсьысь, мунам регыдджык!
Комиӧн гижис
Ӧльӧш Иван