КЫК ЯНСӦДЧӦМ

— Сідзи кӧ инӧ,
Мича ныланӧй,
Ӧтпырйысьӧн тэ
Воштін кык зонмӧс?
Висьтав жӧ тэ мем,
Медводз зонмыдкӧд
Кыдзи янсӧдчин,
Кыдзи прӧшщайтчин? —

«Сыкӧд янсӧдчи
Ме зэв долыда,
Сыкӧд прӧшщайтчи —
Вак-вак сералі.
Коньӧр сійӧсӧ
Морӧс дінӧ тай
Юрнас копыртчис,
Куйліс, чӧв оліс,
Курыд синванас
Чышъян кӧтӧдіс...

— Но й-нӧ ен тэкӧд! —
— Сійӧ шуис мем,
Бӧрас видзӧдіг
Шог-шог мӧдӧдчис
Ылын-доръясын
Нэмсӧ дженьдӧдны».
— Сідзкӧ та вылын
Сералӧмыд тэ,
Бӧрдӧм вылас зэв
Эн и видзӧдлы.
Висьтав жӧ тэ мем,
Мудер бур аньӧй,
Кыдзи мӧдыскӧд
Тэсӧ янсӧдчин? —

«Мӧдыс эз сідзи,
Эз лэдз войт синва,
Ачым сы пыдди
Пыр на бӧрда ме.
Ой-ой, сывйыштіс
Сійӧ кӧдзыда,
Сэсся сы бӧрын
Со мый шуаліс:

Недыр кежӧ пӧ
Муна-ылӧдча;
Чӧв пӧ, бара на
Ми тай аддзысьлам,
Сэки, ныланӧй,
Эн пов, эштам на
Бӧрдны-й серавны,
Пӧттӧдз майшасьны.

Татшӧм чорыда
Сійӧ шыасис,
Кинас шеныштчис,
Эз и копыртчышт,
Чужӧм вылӧ мем
Эз и видзӧдлы;
Пуксис вӧв вылас —
Сымда-й аддзылі!»

— Висьтав, кодсӧ нӧ
Шогсян сьӧлӧмыд
Дырджык, ныланӧй,
Пондас гаравны? —
«Мем и воддзасӧ
Эз ков лэдзны, дерт,
А код муса мем,
Муса бӧръяыс!»